有得「返屋企幫手」其實應該慶幸


眾所週知,今時今日大學生畢業雖然有工做,但人工往往高極有限,而且仲要你OT賣命,然後先得一萬幾千。

據說,三十年前買層樓,先至幾十萬,而當時人工即使做藍領工人都有$5000-$6000。時至2017年的今日,三十年前的同一層樓,如今當然殘舊不堪,但已經升到差唔多四百萬,升幅達10倍。

相反,如今的大學生月入中位數,卻停留在HK$12,000左右的水平,即使相比當年的藍領工人,收入其實只升了2倍左右。

樓價以外,各樣物價一樣年年通脹,十年前食個大家樂25蚊左右都搞掂,如今則大部份都50蚊以上。

香港人的怨氣,其中一個重大原因,就係呢個人工無點加,但各樣消費通脹嚴重,而導致香港人的Purchasing Power大幅降低所致。

Credit: CC Flickr user Kullez

近年尤其常見的現象,就係越來越多大學畢業生,一畢業後做最多2-3年野,就直接「返屋企幫手」,加入家族生意。


以前,有志氣的年輕人,除非屋企真係做好大生意,大多都不屑返屋企幫手,因有所謂「好仔不論爺田地」的思想,而本身亦對未來充滿希望,立志自己從零開始闖天下,從自己雙手建立從無到有的事業。即使係大生意,二代三代更多會自己考取醫生律師等專業資格,或加入銀行或其他企業,歷練返十年八年,先考慮要唔要「返去幫Daddy手」,而亦領到第一代廣泛有著Succession「承傳」的問題:仔女只中意自己做自己事,而唔想返來聽我地呢的老野指指點點,而擔心生意後繼無人。

而家一個有趣現象,就係無論屋企生意大唔大,首先大家都會一早確定要返屋企幫手,其次就係在外面「捱下苦」同「見識下」的「Time Lag」大幅縮小,尤其係在外國讀書果批。

最常見係,從澳洲返來香港後,做3年Big 4,攞埋牌就二話不說立即返回家族生意。

無他的,能供得起仔女去英美澳加等地讀書,大都本身做有一定規模的生意,才能負擔得起外國高昂的學費,住宿費及各種洗費等,家庭月入都起碼閒閒地10-20萬以上,有唔少更加做大生意,每年生意以千萬甚至億計,甚至做到上市公司都大把。

相反,在外國大學讀完書返來,即使你屋企只係中小企,有個場在元朗,或在旺角有個唔起眼的小辦公室,有10個8個員工,但可能月利潤已經幾十萬。而你在Big 4打工,雖然出入中環歷山大廈與Pacific Place,做到隻狗咁卻落得一萬幾千,而且所謂晉升前景亦不過係販賣青春換取幾萬蚊。

呢個時候,選擇已經顯而易見:任何有正常判斷力的人,都會決定「返屋企幫手」,而非繼續留在一個無乜晉升前景的職場。

再者,憑著你的「國際視野」以及IELTS 9分的流利英文,以及在UCLA所學的Business Management理論,你有信心可以幫屋企革新生意,生意流程變得有系統化,高效管理,以及充分利用Social Media等平台做Branding及大肆宣傳,「阿爸果代無讀過書,一味講個信字,而且太保守。我希望做大佢,而且設計個App,擴張到年輕人市場,目標係5年後上市!」

無論會咁講到出口的人是否膠左少少都好,無可否認,可以「返屋企幫手」,其實代表父母已經為你奠定好事業根基,他們經歷了從0到1,最神奇卻又最艱苦的創業期,而待你海外學成歸來,無論公司規模,一樣已經直接培養你Fast Track升到管理層,因為你最終亦係要接受呢盤做得幾好的生意,而如果你有能力從1到10,更加叻仔。但始終,arguably,從0到1,其實遠比從1到10困難得多。

從0到1,係講緊一個乜都無的後生仔,原本打份牛工,人工都唔點夠食,仲要養妻活兒,無人脈又無學歷。如何可以搖身一變,從無錢無人的打工仔,建立一盤有盈利,出到糧交到租的生意?途中辛酸,恐怕只有自己最清楚。

相反,從1到10,就係你讀完書返來,拿住個Business Management學位,而且英文接近Native程度,出國幾年亦見盡世界,結識了唔少「XXX個仔」 「YYY個孫」之類的「人脈」。隨即便接受一盤你已經認識20年,生意模式行之有效的企業,亦可以全身貫注研究企業,而無需遭受打工必經的無謂受氣與瑣碎工作。

出來打工,絕大部分情況就係「Slow Track」情況,有幾多人上司或老闆真心栽培你,希望你將來成為管理層可以接手公司?相信絕無僅有。大部份只希望出一萬幾千,然後當你機器咁用而已。



即使你創業,都係呢個0至1問題,所經歷的艱辛大概非外人所能道,而且失敗率亦極高。相反,返屋企幫手,亦係等於一半創業,你有辦法有Idea,可以令本身每月賺15萬的家族小生意,增長到月賺50萬,則一樣係成功。起碼,呢種「創業」的起點,已經係月賺15萬,而且員工寫字樓等已經現成一應俱全。

 

因此,無論呢個「返屋企幫手」趨勢,是否代表社會經濟出現毛病,但在呢個時勢,有得返屋企幫手,其實已經應該慶幸。

 

SJ結語

贏在起跑線,或許不過如此。

 


關注高質內容,讀神科又想入行頂級MNC / Banking / Law firm?即時填妥以下表格,SJ將不定時推送獨家行業活動 (絕不SPAM!!!)
* Required
    This is a required question
    This is a required question
    This is a required question
    This is a required question
    Never submit passwords through Google Forms.


StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ個仔 ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Submit Job Review

comments

Tags:

Comments are closed.