滿懷理想做NGO 其實都真係幾伏 (下)


讀者連連上一篇高汁分享NGO工作趣聞,其實未完。NGO 文化可能仲有呢幾樣, 繼續去文:

 

之前分享咗入NGO之前的考慮的三件事,好多謝有網友FORWARD。香港的NGO真係有好多,如果有多啲人講下自已認識的NGO文化,或者補充一下,咁就更好啦。

 

等我講埋入NGO之前要考慮的另件三件事。等讀緊書或者想入行的朋友參考下。

 


義工、員工要分清

 

唔少NGO的主要OPERATION工作都係由義工組成,員工係做管理組織、分配資源、定立路線、溝通傳訊等工作。呢樣嘢有好有唔好,你首先要諗的就係自已想喺NGO做義工定係員工。

 

如果你想做的是義工… SORRY,其實好多NGO需要你的錢多過你的工作。

有位大學教授朋友同我講,佢好想幫人,於是打俾好多間NGO,佢地都不約而同咁話,其實你捐款就得啦。教授感到不解就同我呻。我同佢解釋,管理義工其實好煩。因為最有用的義工,係可以喺朝九晚五呢段時間長期幫到手的人,但香港大部分人都係放咗工先得閒。就算係闊太或唔使DO的人,生活好多時都係超忙,有太多誘惑或責任令佢哋好難長期幫手。你試諗下,花三個月TRAIN一個義工,佢做三個月就走,然後呢個過程不停重覆。如果你係員工,會有咩感受呢?

 

如果你想做的是員工,你可以打探下間機構的義工文化係點,從而諗下間機構適唔適合自已。

有啲機構的義工只會做一啲如賣旗、文書呢啲非決策性的工作。有啲機構文化非常深厚,佢哋請義工係會登求職廣告的。義工要面試同打咭不在話下,最資深的義工除咗會管理其他義工,仲會負責招聘員工!

有啲NGO因為資源所限,難以請到有一定資歷的人,就可能會從董事局或(高層)員工的朋友入手。於是佢哋的朋友/仔女/老婆就可能成為義工,一星期嚟兩日… 過咗一排,原來你個個星期都見面的義工,原來已經成為員工,仲要係MANAGER GRADE添。於是個關係就會由你多謝佢幫手,變咗要你個個星期REPORT佢….

 

因此,好多人會話,做NGO的CAREER PATH(如有的話)同私營公營機構都係一樣:不論你有的是年資、經驗或表現,都唔保證有得升。



拋個心出嚟,容易一跌即碎

 

有本輯錄Harvard Business Review文章的暢銷書The No Asshole Rule, 係講辦公室暴力。

一開首作者就為它的粗魯書名作出解釋。Bully or jerk “do not convey the same degree of awfulness (as assholes)”。(容許我翻譯為,話佢哋係壞人或者怪人,都顯示唔到嗰班人的仆街特質。)

 

相信不少人番工起碼有一半的壓力是嚟自(西)人。

喺香港,與其話「一世人流流長,總會遇上幾個仆街」,不少人恐怕「一份工八個鐘,起碼會遇上幾個仆街」。個仆街可能係一直同你扮FRIEND然後套你料周圍唱的同事、對新入職同事不屑一顧的老屎忽,或者笑面迎(高層的)人但壓迫小薯的中層經理。每日對住呢D人番工,煩惱點樣防備人多過點樣做好份工,都實在係一件好攰的事。

 

但係,如果你想尋求較真誠的人際關係而做NGO,好容易會失望。

 

仆街(ASSHOLE)係唔會揀工種的。意思即係話,幫人的工種,仆街唔會特別少。香港冇乜人做呢方面的研究,但是如果想窺看教師、社福界及醫護界等傳統幫人工種的人性黑暗面,可FOLLOW面書「老師心聲」、「NGO SECRETS」及「HA SECRETS」等群組,並自行判斷。

NGO有一啲特質,容易令人拋個心出嚟,例如有偉大的遠景(每個人都有屋企、每個人都有嘢食)、(對CLIENT)好有愛心、服務弱勢社群等。如果你好彩,就真係可以寓興趣於工作,兼且識到一班志同道合的人。但係,如果你觀察不足就茂茂然拋個心出黎,分分鐘十條命都唔夠用。

例如,某些NICE文化的NGO (詳情見文章上集),大家都好好笑容而唔鼓勵公開鬧人。有啲NGO甚至有自己的祈禱小組,食完LUNCH就會一齊(同上帝)分享下心事。入世未深的小薯以為自己有咩工作問題都可以問(任何部門的任何職位的)人,因為大家都好似好歡迎你問問題呀嘛。

 

有一日,小薯出email請教隔離TEAM好NICE的老細。一放工,小薯TEAM的老細就打佢手提,問佢做乜唔請教自己manager先,第二日佢仲黑晒面捉你入房傾計。但係一到食LUNCH有人FAIRWELL,你老細就搭實佢膞頭唔放要同佢大合照。小薯放工之後好迷惑,幾個月後先知,原來佢老細同佢SEND EMAIL的另一個老細係冇計傾的。

 

我建議啱啱出嚟做嘢的人,或者就嚟返新工的人,都應該睇下(或溫習)Toxic Workplace!: Managing Toxic Personalities and Their Systems of Power之類的書,儘早喺新的工作環境識別一啲TOXIC (有毒,疑似有人格障礙)的人同埋佢哋的行為特徵,小心建立自已的底線。

如果你冇時間睇書,我俾兩個即食TIPS你。

 

第一,相信直覺。一旦直覺某個人好似有啲唔妥,無論佢有幾NICE,都要保持安全距離,並定立一段期限觀察(例如三個月)。如果三個月後你仍然覺得佢唔妥,佢大概真係有少少問題 (或至少同你好唔夾)。同佢做到普通同事,冇事冇幹就已經好好。

 

第二,電話要有錄音功能。一旦同事發表歧視言論或機構違反勞工法例,都可以留低記錄保護自已。

你有冇為你的理想做過(足夠的)research

近年,當我和新朋友和舊同學提到自己喺NGO做的時候,都經常得到這樣的回應:「其實我做了N年XX工,都有啲唔想做啦,所以想試下做NGO。咁當然我都趁機問下佢哋想做咩。好多時,佢地的答案都有點籠統,「環保個啲囉」、「幫到人就OK」。

 

我唔排除呢種對話只係普通朋友之間的small talk,志在呻下對現有工作的不滿,並唔係真係想轉行。

如果你真係想做NGO,只係有一顆熱切的心係唔夠既。至起碼你要研究一下NGO的工作究竟係點:你有冇上過求職網站,睇下NGO有咩類型,需要咩技能同經驗? 你有冇認真同做緊NGO的朋友,了解佢哋的日常工作同生活模式?

後者尤其緊要。唔少為理想而想做NGO的人,都係想做啲前線的嘢,即所謂對client,而唔係文書處理或財務管理呢啲後勤部門。

生活模式,包括你為轉行付出的機會成本和生活轉變。香港很多NGO都要求對client的工種(至少)有個社工學位。

你有冇心理準備用三年時間(同二十萬)半工讀一個Master of Social Work,然後同每年過千個社工畢業生[1]一齊搵工呢? 過咗呢一關,你仲要諗埋生活的劇變。前線的員工因為工種的性質,未必會過普通人的朝九晚六的生活,例如要夜麻麻外展搵邊青(但近年邊青都唔愛出街,聽講都係捉得小貓三幾隻)、落基SAUNA等場所 (沒有歧視的含意,只係男同性戀CLIENT可能會出沒的地方)、日晒雨淋(多見於生態環保工作)、夜晚八九點先食飯開會等等(因為要等啲基層街坊收工先)。

最重要的是,即使你練得銅皮鐵骨,由寫FUNDING同PROPOSAL、到輔導CLIENT同整網頁都一腳踢,你賺啲錢可能都係比以前少,自由的時間又唔得比之前多。

 

如果你做晒以上的心理準備,仍然覺得好READY,咁你就快啲去馬啦!

 

SJ結語

未讀連連的文之前完全無唸過做NGO都可以咁複雜。

始終都係一份工,了解好NGO的背景先apply啦。

 

本篇文章為StealJobs讀者投稿,作者:連連 《NGO之前要考慮的另件三件事》

 

[1] 社會工作人力需求系統2015年報告書http://www.swd.gov.hk/doc/press/SWMRS_Annual%20Report%202015_Final-tc.pdf


關注高質內容,讀神科又想入行頂級MNC / Banking / Law firm?即時填妥以下表格,SJ將不定時推送獨家行業活動 (絕不SPAM!!!)
* Required
    This is a required question
    This is a required question
    This is a required question
    This is a required question
    Never submit passwords through Google Forms.


StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Submit Job Review

comments

Tags:

Comments are closed.