金鐘返工才明白的6個無奈


在南港島線準備通車之際,除了海怡半島街坊同一眾鐵路L 「開心到訓唔著」外,其實社會遺忘了一群苦主:所有在金鐘返工的人。

平時放工時間的金鐘站,已經熱鬧迫人過星期五晚的蘭桂坊,正如某蘇姓局長所講 「大家等多幾班車」啦!撇除此蘇姓仁兄本身呢番說話都已經係「何不食肉糜」,而實情係,在金鐘站隨時等10班車都未上到車。

香港人窮其一生就是為左「上車」,而金鐘站則正好完美示範了香港人的命運。

已經有專家出來講,將來開南港島線後,金鐘需要實施人潮管制:即大家須要在地鐵站閘口外排排企20分鐘排隊,好似排隊等過關一樣。本來已經沉重的地鐵人潮負擔,快將百上加斤。

其實,在金鐘返工的人,對金鐘呢個地方從來都係愛恨交錯。SJ彙集了金鐘返工才明白的6大無奈,睇下大家金鐘人有無同感:

 



1. 金鐘 = 終極美食沙漠

打工仔一日最開心的時間,莫過於放Lunch同其他同事出街搵野食,試新野。

但金鐘食Lunch搵好野食,慘過係沙漠找個游泳池。

鑑於金鐘特殊格局,只有寫字樓下面的商場,沒有任何街鋪。金鐘寫字樓樓下的商場,餐廳基本都係得果幾間連鎖大品牌,悶到痴線。想食碗雲吞麵,茶餐廳或食印度咖喱,基本上可以節省少少。

當然,在那些大集團食垃圾,其實都$50起跳,因此想節省少少都唔得。連想食個M記,見到海富樓下果間「Mcdonalds  概念店」,乜mood都無晒,簡直令人搖頭嘆息。

除非閣下花得起錢,行過一條天橋去到太古廣場PP,食個$200以上的Lunch……其實一樣無乜選擇。

 

2. 金鐘係最方便的地方 亦係最麻煩吊腳的地方

金鐘本身位處於港島的戰略位置:全港最多人搭的港島線與荃灣線merge在金鐘,線都唔使轉就返到公司,其實非常方便。金鐘又有政府總部,高等法院,公司註冊處等重大政府機構,去中環又快,去灣仔又快,可謂商業機構兵家必爭之地。

然而,正如前言所述,金鐘正因為擔當了九龍香港的分流站的角色,地鐵有著極重負荷。日日放工都係逼逼逼,除非轉登搭返中環,再坐過來。但其實也非常浪費時間。

因此,金鐘有著全港唯一「避Rush Hour」而OT的族群:寧願等到7點後先走,原因係反正都等,不如係公司舒舒服服等。

admiralty mtr

 

 

3. 金鐘返工 越來越似一部機器

金鐘並非自然而然發展而成的一個社區,與中環上環灣仔都唔一樣,而係一個由幾座大型商業大廈組成的「商廈群」,其中又以天橋接駁:從金鐘廊上來,去海富,統一,PP,都係一條天橋接駁,然後仲有力寶,遠東金融中心,政府總部,遠少少的中信大廈,美銀,東昌,和記大廈等,全部都係天橋接駁。

雖然中環Landmark英資大廈商場一帶也有天橋接駁,但Landmark那邊的繁華的氣氛就是不一樣。金鐘的商場與接駁天橋,除了去PP那邊,總是很depressing很落後的感覺。

在金鐘,基本上無任何原因行落條街,而行落條街其實也無任何店鋪,而且處處都是此路不通。

在1980年代時大興土木,金鐘的原意就是變做一個好 futuristic 的一個地方,但隨年月演化,同時都變成一個缺乏社區靈魂的地方,與將軍澳一樣。

試想想,中環,上環同灣仔都有自己歷史與故事,放假都有人會去呢幾個地方行:Soho一帶延綿的山路與樓梯街,一百年歷史的殖民地老建築,上環一帶見證華人百年奮鬥經商的海味店,及灣仔各樣的店鋪與食肆等消遣場所。

唯獨是金鐘:無人會專登去金鐘玩,金鐘從來只是一個交通轉乘站( 海馬公園同埋荃灣線 x 港島)

相比起中環日夜的多姿多彩,上環的海味店古董店,灣仔滿街$23碗的雲吞麵:金鐘夜晚則死寂一片,令人格外空虛。

公司設在金鐘,實現了 “人力資源” 流通的最大效率。或者咁講,在資本主義社會下的Employment market,無論你是月入15k的 small potato或是月入5萬的經理 / VP,你是一項投資,就是所謂人力資源,像一部機器。你產能越高,價值越大,對每月投入的資本的回報越好。

在金鐘,你能心無旁騖做野,食lunch 半粒鐘搞掂繼續做野,去附近寫字樓的公司與政府部門可以seamless地來往,而不用被紅綠燈及交通阻礙,呢個就係“人力資源” 流通的最大效率。

Credit: Apply Daily

4. 金鐘返工 朋友較少

正如以上所講,金鐘只有幾座大型商廈群組成,其實辦公人口遠比中環為少。

中環固然也有大型商廈群,但同時也充滿各種大小寫字樓,密度高到插針都插唔入,辦公人口全港最多。

因此,在金鐘返工,很可能無乜其他朋友在附近返工,要與區外朋友約食Lunch,也是難過登天。相反,在中環返工的,在Whatsapp Group一聲令下,隨時10個8個人出來食飯。

 

5. 金鐘買野極唔方便

正如以上所講,金鐘得幾個商場仔,因此除了食肆選擇少,店鋪選擇更少。

中環乜都有得買,金鐘則非常有限,買乜都要過中環 / 灣仔 / 銅鑼灣。

 

6. 但始終 都要留係金鐘

厭倦金鐘的原因有好多,但要留在金鐘只需要一個原因:搵食。

無可否認,以金融及專業類工種來講,係金鐘返工做野其實效率極高:近政府,近法庭,近其他大公司,去邊都方便。

在金鐘做野,可謂最少distraction,係樓下食個Lunch 好可能 30分鐘搞掂,然後返上樓繼續做野。因為唔似得中環返工,日日都有朋友約食飯,太多選擇日日都要揀食乜,食完飯又去行下街,去下書局,去試新開的咖啡店,2個鐘都唔夠用。人在金鐘,無任何野好行或好睇,除了天氣好行出去添馬公園海邊以外。

同樣地,中環放工去happy hour太方便,自然會更多。金鐘則要專登去中環,大家都覺得麻煩,寧願自願OT做多少少野順便避Rush Hour,然後直接返屋企算。

假如中環是法拉利,金鐘則應該是Tesla電能車。法拉利雖刺激,但食油之餘,速度分分鐘比唔上Tesla,Tesla雖快,但缺乏靈魂。金鐘搵食係最低耗能,最高效率的。

習慣了,其實金鐘都幾好。

Credit: http://photoblog.hk/wordpress/126605/金鐘

Credit: http://photoblog.hk/wordpress/126605/金鐘

 

SJ結語

金鐘的朋友,永遠都join唔到大家食lunch。

其實他們也很想來的,TAG 一個你關心的金鐘朋友吧!

 


StealJobs全面透露各行各業人工,工時,晉升前景,以及入行攻略,歡迎匿名提供收入資料

Employers or publishers who object to or otherwise complain about the above content please read SJ Community Guidelines and contact us via email or Facebook message. The above content is mere opinion of the submitter(s), not facts, not from an official source, and might be inaccurate.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確。 


立即加入StealJobs@FB 更多90後上位攻略

以下係默默支持SJ的廣告商,啱用去睇:




按下圖,立即向StealJobs匿名爆料人工資料 Submit Job Review

comments

Tags:

Comments are closed.