香港新四大才子:陶傑以外,仲有邊三個?


好多人話,香港傳統來講係文化沙漠,人人眼裡只有錢:炒股同炒樓係香港人話題的 “最大公約數”。

但其實唔覺唔覺,香港的下一代,慢慢已經從本質上與上一代唔同。80/90後世代,沒有上一代的銅臭(也有說缺乏上一代的拼搏精神,則是後話),反而更多以 “文青” “廢青” “抗爭者” 自居。 每年書展,人流多到逼到水洩不通,早年的靚模現象慢慢已不復再,轉而代之是真正的閱讀者與作家的互動,雖然件事依然非常Commercial,但可見香港人已經有廣泛的閱讀習慣。

香港四大才子,向來公認係:金庸、倪匡、黃霑、蔡瀾。 從寫武俠小說到寫專欄講風花雪月,科幻小說及寫歌詞,此四君皆各有特色,令香港人過去幾十年的生活生色不少。 其實,以而家的標準來睇,呢四位才子真係非常非常屈機。例如,金庸的武俠小說可謂深深影響了全球華人,連馬雲都係個金庸小說狂迷;黃霑寫的歌,亦將廣東歌帶到大陸台灣及海外華人社區,琅琅上口。

那個年頭,呢幾個香港人憑著無比創意與文采,編造出各種對全世界華人影響深遠的作品。除了賺錢以外(金庸作品大多已經幾十年前發布,但時至今日,金庸依然係大陸的作家版稅榜的Top 10),呢種 “文化輸出”,其實就係省靚 “香港” 呢個金漆招牌的 “軟實力”。

 

時移世易,香港發生好多事,雖然好多香港人自覺好似條咸魚一樣,愛以廢青自居,但其實,香港依舊人才輩出。其中,SJ嚴選了呢個世代的香港新四大才子,自娛之餘,都歡迎大家點評下。


 

首先,係呢個互聯網世代,叫得才子肯定係某種 “Opinion Leader”,亦即係今時今日完全濫用的 “KOL” 呢個term。但點都好,叫得才子,肯定要受歡迎,要有大的following,大影響力。才子講一句話,一定要係可以影響好多香港人。正如Obama當年都靠Facebook贏總統選舉,呢個年頭的才子亦肯定係Facebook有自己的 “地盤”。

然而,正如以上所講,唔係係人個Page有10萬8萬,就配得上做 Opinion Leader,更遑論才子。 叫得才子,肯定係某個範疇有驚人的深入學問,學識淵博,再可以深入淺出將呢的深奧學問,帶到比普羅大眾。呢的就係才子啦!

 

入正題,ladies and gentlemen,SJ嚴選新四大才子如下:

 

1. 陶傑 – 公認香江第一才子

Credit: 蘋果日報

Credit: 蘋果日報

其實陶傑真係唔使點講,更多人公認陶傑係 “香江第一才子”。

咸豐年間,陶傑曾經受報章專訪,佢個答覆大概係以下 (時代久遠,已經搵唔返原文,SJ 單憑記憶憶述): “我一定唔會認自己係才子。 人地叫你才子係害你。等你飄飄然,然後行入夜總會篤篤自己個鼻,同人講:有無搞錯,你唔識我啊? 所以叫才子其實係害你。”

陶傑出身左報家庭,早年留學英國,曾經係BBC做過一段時間。後來回流,係多份報章以唔同筆名寫專欄,據說仲成人比人搵笨唔找稿費。

2003年後聲名大噪,成為蘋果日報皇牌專欄作家至今,亦主持多年長青商台節目 《光明頂》。

陶傑係香港少有的通才,乜都吹得好多句(雖然成日比人話錯facts,但其實無傷大雅),而且有強烈個人立場,成日發 “怪論”,從來不怕得罪幾多億人,從其多年來的小農DNA論可見一斑,因此陶傑亦成日比一些人鬧 “種族主義者” “崇洋” “法西斯” 等。陶傑多年來亦強調自己是 “崇優” 而非崇洋,其亦熱愛中國古典文化。

有趣的是,後來有個中國大陸的大法官指中國人DNA不適合司法獨立制度,間接地 “確立” 了陶傑多年來的DNA論,據說陶傑亦頗為飄飄然。



Chip Tso

Btw. 鑑於其抽水能力之強,陶傑亦有香港抽濕機之外號

 

 

2. 沈旭暉  – 國際關係年輕專家

沈旭暉呢個國際政治教授,早年已經有客串陶傑《光明頂》,沈教授主力講國際政治,從地緣政治講到各國歷史及宗教派系,一一能鉅細無遺娓娓道來。沈旭暉將 “國際政治” 呢個香港的冷門話題,多年來非常consistent地以各種渠道灌輸給香港人。如果話香港人比以前更有國際視野,某程度亦拜沈教授所賜。在香港,沈旭暉可謂國際關係的皇牌專家,國際間發生咩事,事無大小各傳媒都會追訪並報導沈旭暉的意見與評論。

沈旭暉係社交媒體非常活躍,擁有《堅離地城:沈旭暉國際生活台 Simon’s Glocal World》《瀛寰志略:沈旭暉國際學術台 Simon’s IR Basilica》《等非常受歡迎的FB page,加加埋埋估計有幾十萬個followers,絕對不容忽視。 其中,《國際關係研究月刊 (The Global Studies Journal)》更加係一份非常嚴肅的期刊,非常深度分析國際關係話題,雖然好多文都係TLDR,但亦可見沈教授對學術的執著。

長袖善舞的沈旭暉,幾年前結婚就大搞一場世紀婚禮,政商名人紛紛出席,從梁振英到民主派,到城中富豪及學者等,亦成為一時佳話。

Credit: 堅離地城:沈旭暉國際生活台 Simon's Glocal World

Credit: 堅離地城:沈旭暉國際生活台 Simon’s Glocal World

另外,有趣的是,Happily married而育有一女的沈旭暉,愛Post與時下靚模的合照,經常亦有網友好事之徒留言話教授肯定要 “跪玻璃” 。其愛妻Bonnie會否吃醋,則不得而知。

Btw. Bonnie都有個FB page,叫做《Hello Bonnie 國際親子台》,專講親子話題,但都不忘強調係 “國際親子” 而非單純的本地親子,可見沈教授一家都對 “國際視野” 非常執著。

 

3. Ben Sir – 非典型中文教授: 不文Ben

如果話上一代有黃霑,呢個時代的香港就肯定係 Ben Sir。

Credit: TVB

Credit: TVB

黃霑有 “不文霑” 的外號,而Ben Sir亦以講廣東粗口而聞名於世,早前更以TVB《學是學非》深度分析廣東話粗口的節目而震驚十三億人,片段在全中國瘋傳。 係香港,Ben Sir亦自此聲名大噪。

Ben Sir其實係中大教授,unsurprisingly 係專教中文。 但呢位 “不文Ben” 並非普通的中文教授,開口埋口 “之乎者也” “孔子孟子” 之類的大道理,而係廣東話粗口的 “五大將軍”: diu nan gau chat hai。

能夠將廣東粗口如此粗而不俗地講解字義及用法,實在唔簡單。

Ben Sir在網路爆紅後,更加 “變本加厲” ,將廣東話所有粗俗的字句都拿出來講,最近一個post就玩食字:女同學走光,男同學扯晒。這種廣東話食字gag,令人想入非非之餘,你又吹佢唔漲,可謂藝高人膽大。

有理由相信,Ben Sir 唔係一個粗俗的人。Ben Sir 對廣東話的熱愛的感染力,亦令人亦覺得其實都無話粗唔粗俗,尤其在呢個廣東話弱勢的年代,更加覺得粗口都係本地文化,好好研究,多多應用,其實亦無可不可。

 

4. 蕭叔叔 Uncle Siu - 講英文有佢一半咁好 已經無憾

香港新四大才子裡面,有中文教授,當然亦少不了英文專家。四人之中,以蕭叔叔最神秘:多年來從來唔出樣,只以其背影及哥基狗 “小朋友” 示人,徹底顛覆了 “KOL” 要 “食樣” 的刻板形象。

Credit: 蕭叔叔英式英文學會 Uncle Siu's British English Club

Credit: 蕭叔叔英式英文學會 Uncle Siu’s British English Club

蕭叔叔背景神秘,只知道他當年是港大 HKU 法律系的天子門生,雖然讀到Law,但當時英文好差,聽唔明教授的英文,從此便立志將英文學好。畢業後無做律師,亦無人知其當年的正職係乜,但 “英文” 大概已成為他的最大興趣,早係十幾年前,蕭叔叔已經拍片講香港人講英文,如何戒掉香港口音。

時移世易,蕭叔叔的一口英式口音,Posh得與英國大法官的口音不遑多讓。只係直到近期,蕭叔叔先在FB 開了個 《蕭叔叔英式英文學會 Uncle Siu’s British English Club》 page,其Like 數的增長速度估計冠絕全港,短短一年多時間已經累積二十幾萬個followers。蕭叔叔而家每日都有片出,教人點樣用英文講一些很通俗的句子。 同Ben Sir 不約而同地,蕭叔叔都會拍片教講英文粗口,以其貴族式的英文口音與聲調,講起粗口更令人忍俊不禁。

 

SJ結語

香港新四大才子出爐,各有特色。你又點睇呢? 呢幾位才子都有上一代才子的影子,亦有呢個時代獨有的風格。 最重要的,係佢地都有本事將 “文化” 呢樣本身好多人覺得好悶好嚴肅的話題,用自己的方式 “入屋” 地有效帶到比幾百萬個香港人,間接地令香港人更有獨立思想,更通古知今,對中文及廣東話有更深認知,而英文都講得更加好。

呢個就係經濟學所謂的 “positive externality” : 他們成功以自己的興趣謀生甚至賺大錢之餘,其實同時受惠緊其他人,令大家免費就可以被entertained之餘亦被educated,令大家生活生色不少之餘亦學到野,其實亦可謂香港人的福氣。

最後,其實香港仲有第5位才子,不過名額有限所以未能成為四大才子:

呢位就係香港的 “大文豪” 周柏豪。

chau pak ho

唱歌大受歡迎以外,竟然能以簡潔文字,用徐志摩的新詩風格寫出人生的傷春悲秋與哲理的感悟,亦大受好評,被網民冠以 “大文豪” 的稱號。

容許SJ以周柏豪在網絡發表的新詩《玻璃杯》 作結:

今天不小心把心愛的水杯打碎了
事後我用了十五分鐘去細心欣賞
發現打碎了的玻璃碎
竟然比起平日那個形態更美
然後我再用了十分鐘去打掃地方
再為其拍照

這短短的三十分鐘
算是今天我思緒最安穩的時間
打碎了的水杯
是我今天看過最美好的東西
而那水杯著地的那一聲
是聽過最美好的聲音
原來人生覺得最爛的事情
也未必是最糟
因為最糟的
可能一直就在眼前而未曾發現
又或者根本就是自己
我想我找到了答案

緝錄自狼文出版社的《周柏豪 新詩選集 2017》


關注高質內容,讀神科又想入行頂級MNC / Banking / Law firm?即時填妥以下表格,SJ將不定時推送獨家行業活動 (絕不SPAM!!!)
* Required
    This is a required question
    This is a required question
    This is a required question
    This is a required question
    Never submit passwords through Google Forms.


StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Submit Job Review

comments

Tags: ,

Comments are closed.