「叻人」的問題: 創業不是請客食飯

大概從2012年-2016年,或者受美國眾多的超級科網IPO所影響,香港的「創業風氣」吹得正盛。

坊間的Co-working space以及創業「比賽」及活動如雨後春筍,搞Startup變左一件好潮的時,幾乎係人都一係已經做緊Startup,一係就計劃做Startup。

每逢週末,20來歲的一班朋友食飯,酒過三巡80%機率會出現呢種對話,「反正工字無出頭,一萬幾千的人工,每年加幾百或一兩千,幾時先買得起樓,漿糊山莊都唔使諗啦!」「人生如戲,倒不如大幹一票。」「不如搵d野搞!」「賣xxxx / 做xxx App 有得做,暴利行業,一上軌道就印銀紙咁!」

 

正如SJ文章所講,同朋友創業基本上都係三個字:晒9氣 / 傷感情。

講錢傷感情就係人都知,為左兩個錢好多時兄弟反目成仇都有。所以,係真正好朋友,如非必要真係唔好合作搞生意,以免以財失義。

但今次講講「晒9氣」。同朋友創業失敗率高,尤其假若大家都係「叻人」或精英,呢種「合作式」創業幾乎註定失敗。

 

何謂合作式創業? 即係大家其實各有很有前景的正職或本業,月入幾皮野甚至更高。

但基於各種感性因素,以及偽理性因素 (工字無出頭),你同幾個精英朋友,個個一年都交6位數字入息稅,卻立志要創業,要做下一個Billion dollar valuation的企業。

聽起來,幾個 合作,各自在自己範疇獨當一面,一定係一個無堅不摧的團隊。

但正如當年的足球明星隊皇馬五條A陣容,個個都係超級球星,加埋一齊卻未必係贏得最多的團隊。

 

撇除大家性格太強橫未必適合Teamwork之類的Obvious reasons,「叻人」合作式創業,最大的弊病係本身「各自擁有太多」。

除非大家立即辭職,而且一齊訓身只做呢個Startup,否則大家的利益肯定不一致:

假如3個人,每人份工本身月入10萬,而大家都有共識「暫時兩邊做住先唔辭工住,等上軌道先一齊辭工Full time做」,則其實大家的最大利益依然來來自本身份工,而唔係呢個Startup。

首先,呢個Startup十劃都未有一撇,遑論每月賺到30萬 (相等每人本身月入10萬),更要大家出錢出力。

3位精英之中,又有邊個真係會犧牲本來放在月入10萬的工作的精神與苦幹,而轉投在呢個Startup呢?

再者,我而家月入10萬,假如我更努力就可能升到月入15甚至20萬,但我在Startup努力,又會得到成績嗎?就算有都可能講緊係其中的1/3。大家的利益完全不一致,而依然牢固的停留在本身的工作或本業。

 

好多人以為「我可以50%時間精力做自己野,其餘50%做呢個Startup」,其實不然。人的一日,時間與「腦力」極度有限,即使你本身月入10萬份工,依然可以6,7點走人,但其實你的腦力可能在非常Intense的朝9晚7一樣燃燒殆盡。即使有僅餘創意與體力,可能都寧願去做下運動,或進修下同本業有關的技能,因為所得的得著對自己係100%,而未必會選擇投放在呢盤只得33%的Startup。

 

創業的確唔係一個Part time endeavour,亦唔係幾個朋友興之所至的一個Project。當真正開業做生意,個個月有條數要背負著,失敗甚至要付出極度沈重代價,才明白創業同革命有幾分相似:

「創業不是請客吃飯,不是做文章,不是繪畫繡花,不能那樣雅致,那樣從容不迫,文質彬彬,那樣溫良恭儉讓。創業是暴動,是一間公司推翻另一間公司的暴烈的行動。」

 

SJ早前有幸同一位香港的神級高人深度交流,傾到「合作創業而利益不一致,而『Project』最終不了了之」呢回事,究竟有無任何解救方法?

其實唔係無,不過大部份都好Extreme。

1. 結婚

Credit:公屋潮文

每個人生來都是獨立的個體,有自己的慾望與追求。假如創業者要利益一致,結婚都未嘗唔係一個好辦法。當然,唔通要為左創業而兩個直男都要搞基? 更正確來講,係夫妻創業:夫妻同心,其利斷金。

 

1A. 結拜

三個大男人,各有各好打之處,要利益一致共同創業,就可以參照三國時代劉關張的「桃園三結義」,擇一個良辰吉日,相約在數碼港對出的草地的一棵榕樹下,斬雞頭燒黃紙,滴血為盟:不能同年同月同日生,但願同年同月同日上市敲鑼!

 

2. 齊齊辭職訓身做

正如以上所講,大家各自有高薪厚職的話,大家的重心肯肯定放在自己的正職,而非呢個Startup。

想問下大家,自古以來的「偉大事業」,有幾多係可以三個人Half-hearted咁Hea做出來?

 

3. 一係就你本身非常「抵得諗」

本文所講的一切,係假設人性本悪,以及人性本懶。假如你本身係極度抵得諗之人,願意Carry你團隊的Free-riders,自己付出99.9%努力,讓對方付出0.01%努力卻依然得到33.3%回報,其實一樣可以Work。當然,做到咁都成功,即係你自己一個做都得,咁倒不如自己做。

 

4. 三口六面 講清講楚

Credit: TVB – 創世紀

呢個可能係唯一最Practical的建議。大部份人際關係都係基於「Imperfect information」因誤會而結合:你以為女神唔會放屁而展開猛烈追求,終於成功了,卻發現原來女神腸胃差,唔止成日放屁仲又臭又響。

創業合作團隊都係,尤其係對大家的期望。

幾個男人志同道合,坐埋一齊傾創業成功大計時,只會傾鴻圖大計,而唔會傾大家股權係點,大家有咩責任同權利,例如邊個可以做銀行Primary user,有爭議時邊個話事,以及非常重要地「邊個負責做乜,而會獲分配乜野資源」等等。

正如你追緊個IG女神,大家在Soho的地中海餐廳食前菜時,只會講些輕鬆話題,即使講到人生理想咁Deep,都未必會講到好多「瑣碎事」:將來要唔要擺酒,係邊度擺,擺幾多圍,禮金幾多,邊度買樓,家用幾多,生幾多細路等等。

但往往係呢d瑣碎事,將來最容易惹爭吵。

對創業團隊最重要的,可能就係「邊個負責做乜,而會獲分配乜野資源」,因為經常發生情況係:

A係Programmer負責寫App,B係畫圖的負責Graphic,C做開HR負責搞公司賬目及法律等。

大家可能期望各自完全負責自己範疇,但 1) 究竟做幾多 2) 幾時做完 3) 是否需要額外資源,呢3樣野大家期望容易有落差。

例如:寫Programme果個拍心口搞掂個App,話好簡單。但做落,原本話1個月搞掂,最終5個月都仲整緊,話好多複雜Database問題,一定要比錢請多個人幫手,拿個Quotation,結果大家O嘴:要35萬。Not that 35萬寫App係天文數字,但本身拍心口話搞掂,令大家錯誤地有Expectation你真係搞得掂,所以一定失望,甚至乾脆放棄好過。

假如,一個很大的假如 (a big if),你的團隊能夠三口六面,講清講楚大家雖然依然Keep住正職,但每個人幾時要Deliver到Exactly乜野出來,遲的話又會點,咁呢個合作團隊都可能會Work。

去到呢個範疇,其實就係所謂Project management了。當然,做PM絕對唔止係做個Table寫Week 1,2,3…咁簡單。點樣Motivate到大家,亦需要對人性以及團隊成員性格的透徹了解。其實真係唔簡單。

 

 

 

SJ結語

以上獻給創業路上 15/16的各位朋友。

 

關注高質內容,讀神科又想入行頂級MNC / Banking / Law Firm? 即時填妥以下表格,SJ將不定時推送獨家行業活動 (絕不SPAM)

* indicates required




StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Comments are closed.