打工仔 如何由15k爬升至月入十萬

相信無乜人會唔同意:人生在世,「打工」其實都係為左過好生活,起碼可以養活自己,甚至成家立室,報答父母等等。

當然,對工作內容的興趣都係重要一部分,但相信對絕大部分人而言,工作的一大部分Motivation,正正就係搵食,因此「人工」佔頗大比重,而無論你承認如否,你的收入高低好大程度亦Define了你自身的價值,無論係你自己的自信心以及他人眼中的你。同一個人,月入15k 時同後來月入十萬,成個「氣場」都唔同晒。

尤其係打工而言,你所身處的行業與公司,對你收入高低起碼佔了一半的影響,而呢個亦係 SJ收集各行各業人工資訊的作用:同一個人,身處一份好工定係伏工的分別,對其收入及快樂指數等一樣差天共地。

然而,另一半的影響,就在閣下本身。你想月入十萬,但首先個問題,係你配唔配月入十萬?

以下係SJ認識一位過來人的心得,短短幾年間,成功由他所屬的行業的最底層,在無任何既有人脈及家底下,爬升至Fast Track晉升風口位置,三十歲不到已經月入十萬,遠遠超越當初同一起跑線的同事,雖然並非已經發達或已經創造甚麼驚天動地的事業,但以本身平平無奇的人生來說,其實已經頗為傳奇。這位朋友分享的心得如下:

 

1. 踏出Comfort Zone

Credit: AFP/Getty Images

第一步,正正就係踏出Comfort Zone,哪怕看似係吃力不討好的小事。

無論你身處咩行業,無論你公司大定細,好多時都有一些演講,Presentation等的機會,而亦正正就係踏出Comfort Zone的機會。

當你身邊的人日復日,年復年都係做「分內事」時,你自願甚至係爭取一些自己鍛鍊及Exposure機會,尤其係Public Speaking相關的,其實已經係你同其餘的平庸大眾的分野的開端。

 

2. 唔好有「依靠」公司的錯覺

Credit: TVB

SJ呢位朋友表示,當年有一位猛人前輩一番話啓蒙了他:唔可以有「依靠」公司的錯覺,公司無欠你任何野,亦無義務幫你成功,要成功升職加薪,要令公司有「必要」加你升你,而重點始終係你自己實力。

對絕大部分公司來講,你就係人力資源 (Human Resources)而已,每月比15k你,你應該幫公司賺30k,假如比得10萬你,你最好幫公司賺最少20萬。本質上,你同機器資源無分別。假如你有幸入了好公司,跟了好老闆,公司願意栽培你亦關心你長遠發展,呢個簡直可以話係非常幸運。 (可參考StealJobs.com上快樂指數超過7的公司)

但絕大部分情況,你公司及老闆完全對你的前途發展沒有任何興趣,亦話知你人生有咩需要(讀書進修/ 成家立室/ 結婚買樓 / 供養父母等等),總之盡量壓你價,理得你,最好一世都踩住你唔比你上位。

呢的情況,唯一就係增加自己價值,逼令公司必須加你人工,而否則你亦可以另謀高就。

 

3. 立志成為最Top

承上題,要增加自己價值,最直接就係自己個人要立志成為行業翹楚,自己要變成Somebody一個了不起令人敬佩的人物,令自己對公司而言係 Indispensable 不能替代的。

你不強大,再多人脈都係虛無飄渺的。要係職場有尊嚴地立足,甚至希望月入十萬,必須努力令自己實力足以成為行業頂尖精英,最好亦係一些大家有目共睹而可量化的成績。

而呢個社會亦越來越有呢個現象:80/20 變為 99/1,即1%人賺了99%的錢。呢個全球一體化年代,「中間」甚至「中上」已經無乜空間,而變為贏家通吃 winner takes all的巨面。就一件事,或一個事業,假如你做得厲害,而且在行內出埋名,錢係追住你等你賺。相反,假如你做一段時間都不甚了了,即使你願意減價,一樣無人問津。而呢個亦解釋到Headhunt行業的存在:基本上獵頭公司都係找那些高收入人士高薪挖角過檔,但對中下游的則往往興趣不大。越高收入的人,越係大家爭住想請,而無需好似你同我咁要寫Cover Letter去「求」職求Interview,反而係調轉,Headhunt公司求個Candidate去見工。

 

4. 創意: Think outside the box 敢想敢做

呢個年代,個個都識講 Think outside the box,但唔係幾多人真係做到。

即使係打工,你有否利用科技來改善你的工作,而其他同事無做到的?當然,更進階的,就係學寫Programme甚至用呢D自製Programme來令自己工作更有效率,呢個分分鐘係另一個超級Startup的開端。

科技以外,你有否做到出其不意呢?

孫子兵法都講「凡戰者,以正合,以奇勝。」打仗必須出正規軍同敵人會師,但往往贏出,係靠另外一隊出其不意的奇兵,突襲制勝。職場上都係一樣,老闆交給你的分內事做好,就係「以正合」,而工作分內事以外,當大家返工放工食Lunch時,你能否額外對公司甚至行業有更大貢獻?呢個就係 「以奇勝」了。

一位前Goldman Sachs banker,亦在其自傳《Why I left Goldman Sachs》中,講述自己仲係一個小人物Analyst時,每日自發將行業及公司動向以表列形式列出撮要,並發佈予全個Department。雖然呢個並非咩驚天動地之作,但好多資深的Associates, VP, 甚至Directors等依靠呢份「Cheat sheet」可以非常有效率地對Client作出匯報,幫左團隊唔少忙,亦令到公司上下唔少人因此對他有好印象,而不久後順利升職加人工。呢個其實唔單止係Think outside the box,亦係 Go the extra mile。

 

題外話:係香港,成日聽到人講「Think out of the box」,每次都覺得怪怪地,但又唔敢肯定呢個講法係錯,有否英文高手解答下?假如Uncle Siu路過都不妨解答下。

 

5. 要有「做大事」的心態 願意犧牲

大部份行業與工作都一樣,當你月入四萬以上,你的工作壓力與責任,會比從前大十倍以上,公司同客戶都期望你係24/7要隨時候命。呢個時候,可能你必須犧牲唔少野,例如興趣,同朋友吹水時間等等。係咪值得就另一回事,但肯定係必須有呢種做大事心態,先有可能月入十萬,

 

6. 堅持 堅信努力最終有回報

即使你做齊以上1-5項,都唔保證你會好快人工升到一個你滿意水平。

反而,當你做咁多野,更容易有種迷失,自己做咁多野為乜?你走去自告奮勇做Presentation,對住成百個行家,又要準備Powerpoint同講稿又盛,又無錢收又佔用你僅餘休息時間,真係可謂貼錢買難受。

而且,到頭來人工都係咁,咁倒不如Hea做算。

或許堅持正正就係最困難的,假如你放棄了,咁人生事業就係咁大。但你一直堅持付出,始終有一日你會有回報,問題係幾時有回報,呢個無人知,亦有際遇成分。

但可以肯定的是,大量付出係必須的。

咁在無保證回報情況下,你又肯唔肯堅持繼續付出?

起碼,以SJ親身觀察,雖然回報期長短個個都唔同,但其實只要有大量付出,多數都最終有重大回報。

「我都有勇氣 尚存一顆心
這種高貴尚未曾脫軌
我更要信 未爬的天梯
會不久以後一一發現
在這俗世」

 

SJ結語

其實只需努力做,你都做得到。

年輕人,無論生活與工作如何磨滅意志,一齊停止找藉口,立即尋回鬥志吧!

 

關注高質內容,讀神科又想入行頂級MNC / Banking / Law Firm? 即時填妥以下表格,SJ將不定時推送獨家行業活動 (絕不SPAM)

* indicates required




StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Tags:

Comments are closed.