香港分5大個生活圈:旺角人 vs 銅鑼灣人

搬過幾次屋,住過幾個區的朋友,難免會發現:香港地其實又幾得意,細細地但其實分幾個大生活圈自成一國。

呢度講的「生活圈」,就係你同朋友Hang out消遣時,二話不說就直接會的地方。

而會有咁樣的「預設」老地方,正正因為你同成班朋友都住係呢個生活圈30分鐘範圍內。

例如,你中學時在何文田讀中學,自己和最好的朋友都住在何文田,紅磡,土瓜灣,甚至九龍城等地區時,你地每次星期五晚打完波,基本上自動波Natural instinct 一齊坐小巴「落旺角」食飯,然後各自散Band回家也只需半個鐘車程。

這樣一來,旺角就係你的生活圈,呢個生活圈就係你同朋友的首選社交地點

多年過去,呢個生活圈就會充滿你地的回憶:唱Neway K Lunch,買二手書,影貼紙相,食撈麵,食放題,一班人坐在公園吹水到凌晨先肯和平散去。

假如有一天你搬屋了,依然在呢個生活圈的輻射範圍內,依然無問題。但假如你因為工作或其他關係,搬離開了呢個生活圈,而到達一個全新地區,最唔慣的大概莫過於失去左呢個生活圈的人和事:假如你離開了旺角生活圈,而搬到沙田生活圈,你當然依然可以約朋友在旺角食放題(坐那夜凌晨開往大埔的紅Van都幾快),但你就唔會好似以前咁,隨時打個電話「喂而家得唔得閒,落樓下飲杯野。」

 

旺角人

Credit: Hong Kong With You

 

香港以人口稠密程度而言,相信係成個九龍半島係最多人住。

旺角生活圈位處九龍半島的正中心,成個「輻射地區」包含了四周住宅區: 何文田,紅磡,土瓜灣,九龍城,黃大仙,長沙灣,大角咀,深水埗等。

正如以上所講,一班朋友(尤其中學同學) 一約食飯,二話不說不經思考就直接篤定去旺角。當然,尖沙嘴都有,不過相對高檔反而係拍拖約會更多。一班朋友的真正生活圈始終係旺角。

係朋友既,乜都唔使講,約見面一定係E出口。

旺角雖然公認烏煙瘴氣,龍蛇混雜,卻又非常真實。相比尖沙嘴,旺角少了虛偽,多了坦誠。正如一班真正朋友,何須下下約去中環SOHO食$400 per head的所謂土耳其菜? 只需去劣食如譚仔或茶餐廳,每人 $60 埋單,笑下阿姐的惠州口音,一樣興高采烈,Happy Friday。SJ有日本通朋友,話旺角其實同東京新宿有幾分似 (當然旺角混亂1000倍),尤其歌舞伎町一帶,一切不言而喻。

 

銅鑼灣人

Credit: Internet

無論對本地人抑或對外國人,香港最Symbolic的生活圈,大概非銅鑼灣莫屬。成個港島,基本上放假或星期五晚,亦係二話不說約去銅鑼灣食飯,正如九龍人約去旺角一樣。 如果話旺角似新宿,銅鑼灣大概就係渋谷:同樣五光十色,但少了一分危險感。

銅鑼灣點解Symbolic? 可能因為始終港島都係被視為香港的核心,縱然唔係住係港島的人,都難免有幾分嚮往銅鑼灣,就好似MK始祖《古惑仔》陳浩南都要做銅鑼灣楂Fit人,而非MK本身。當然,時至今日,陳浩南來到銅鑼灣,對住莎莎同IKEA,都唔知有咩佗地費好收。

相比MK的龍蛇混雜,銅鑼灣又高檔而安全返少少 (灣仔就比較雜但主要因為各種外籍人士)。

銅鑼灣約朋友見面,只需指明 a) SOGO 等 定係 b) 時代等,其餘一切心照不宣。

Credit: Internet

無論食野定買野,SOGO果邊就平的,時代果邊就貴野多的。近年多埋誠品進駐,其實都進一步鞏固銅鑼灣本身已經牢不可破的港島唯一生活圈的崇高地位。

港島的Fall back options 可能係中環(主要放工就腳以及LKF),及太古城,後者尤其係港島東的朋友。講到太古城,始終都係要讚英國人管理規劃一流,多年來成功經營一個中產得來唔會離地到太離譜的社區,孕育了一大班港島中產人口,為各行各業資深文職以及中高級公務員帶來源源不絕勞動力。

 

觀塘人

Credit: Internet

觀塘人,觀塘事。觀塘人雖然位處九龍,但向來自成一國。成個九龍東都係觀塘的輻射地區,從九龍灣開始,牛頭角,到藍田,秀茂平,甚至將軍澳等。

外區人無幾可真係唔會去觀塘,一無自然靚景,二無精彩的消遣場所。

但對於九龍東的居民而言,「出觀塘」就係一家大細及幾個朋友的最好消遣:以前就越係裕民坊間麥當勞,而家就去APM食韓燒。除左觀塘,九龍東仲有九龍灣Megabox,德福,以及將軍澳的「高度商業化的商場」。但始終都係觀塘先係九龍東的生活圈中心:無論幾夜,好多區分都有通宵紅Van去觀塘,可見其九龍東非凡地位。

 

沙田人

鏡頭一轉,我地跟著SJ去新界。新界幅員遼闊,對於「市區」人而言,新界就係那個遙遠的國度,仲有好多牛同農田。

當然,呢個Stereotype唔係錯得晒,例如沙頭角而家都仲好多農田。

但其實新界都By and large市區化,大部份人都係住高樓大廈,同港島九龍人完全無分別。

以新界東而言,沙田大概就係生活圈:無論你住大圍,大埔,馬鞍山一帶,甚至粉嶺上水,最近的一個「市中心」莫過於沙田市中心:幾個大商場連住乜都有得買有得食,落返地面又有好多街鋪。

即使對於外區人而言(尤其市區人),沙田都可以話係全香港的後花園:

每逢秋高氣爽季節,一大班朋友約踩單車,就算唔係沙田出發,都肯定以沙田為一個重要的中途站,一直踩到大尾篤。沿途經過沙田的香港文化博物館,城門河以及馬場等,景色優美之餘又多有本地歷史典故,沙田本身就係一個地靈人傑的社區。

 

元朗人

Credit: Internet

Last but not least,元朗作為成個新界西的生活圈中心都有舉足輕重地位:成個「元天屯」,基本上以元朗馬首是膽。元朗「大馬路」,有輕鐵穿梭與行人熙來攘往,頗有特色。有人甚至講元天屯獨有的輕鐵,與同樣穿梭鬧市的東京都電荒川線相比,話好有Feel。

元天屯一帶的人一定唔會對B仔涼粉陌生,隨時落元朗食碗涼粉,傾下計,又係愉快的一晚。

元朗大棠每年秋冬更吸引全香港去睇紅葉,除此以外又有一大堆圍村,可謂活生生的博物館。

另一邊廂,元朗西鐵站一帶又係大量大商場,一應俱全。

新西人的Fall back option大概係屯門:一出西鐵,幾個大商場一個連一個又有戲院,加上遠眺青山景色,令人心曠神怡,星期六日來到好容易消磨一整天。

 

SJ結語

大家又屬於邊一個生活圈?有否曾經搬離原本生活圈的經歷?歡迎留言分享。

 

其實,香港裡面都真係幾多有趣事,未必會差得過台北上海之類。

更何況,香港呢度,每個區分都有我地真真實實的親身經歷與回憶。

雖然好多區份都變化好快,但不變的可能就係我地在呢的生活圈裡面的友誼與回憶。

Btw. 其實香港都真係好正,希望大家好好珍惜: Take pride in Hong Kong.

 

 

關注高質內容,讀神科又想入行頂級MNC / Banking / Law Firm? 即時填妥以下表格,SJ將不定時推送獨家行業活動 (絕不SPAM)

* indicates required




StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Tags:

Comments are closed.