改寫「騰訊」命運的3個香港人

香港人對騰訊的最大感覺,一言概之就係「又愛又恨」。

呢個年頭「有早知無乞衣」最貼地的應用,就係話「早知2004年唔做生意,買100萬騰訊,而家已經值幾億!」

無他的,2017年的騰訊貴為股王越升越有,年底時一度升到$440高位,市值超越Facebook,而微信及微信支付等「Game Changers」完全改寫全中國甚至部分外國地區的溝通及消費模式,劍指全球科網寶座指日可待。

然而,呢間總部設在深圳的科網巨頭,除咗在香港上市外,其實同香港總好有淵源。其中,甚至可以話,有最少3個香港人,可謂改寫了騰訊的命運。究竟係邊3個?SJ今次同大家揭曉:

 

1. 一個做「Call機」生意的香港商人:消失的天使

好多人都知道,騰訊就係做山寨ICQ起家的,原本叫做OICQ,後來改名做QQ而且不斷改良擴張而生存並繁盛至今,反而ICQ (以及後來的MSN)一早就消失於互聯網的歷史洪流了。

同樣消失於歷史洪流的,就係一個做「Call機」生意的香港商人,可謂「消失的天使」。此人名叫「陶法」,如今身處何方所幹何事已不可考。

但點解叫做「消失的天使」? 原來,馬化騰創辦「騰訊 (Tencent)」之前,在一家叫「潤訊 (Lucent)」的Call機公司打工做Programmer (無錯,個名都頗有「參考」意味)。

期間,可能因業務所需,馬化騰認識了這位同樣做Call機的香港商人陶法。那個連「手提電話」都未出現的年頭,Call機就係科技潮流尖端,而且係暴利行業。呢位陶法賞識當年呢個小朋友馬化騰,多次邀請對方轉投其陣營。

無耐,馬化騰同幾個Co-founders決定創辦騰訊,陶法知道他們經費唔多,就免費借出佢擁有的深圳科技園一個400呎單位比呢幾個後生仔試下。雖然歷時只係幾個月,但騰訊的千億帝國,其實就在這個唔起眼的地方誕生。陶法可能係騰訊最早期的一位Angel Investor,提供了寶貴的辦公地點。但分別係佢完全義務,無拿過任何股份。

 

2. 與騰訊神話擦身而過的李澤楷

早在1999年的科網狂潮,出道無耐的小小超已經在商界活躍大搞M&A及投資,並睇準QQ的發展潛力大,投中呢間成立無耐的騰訊,用HK$860萬買咗20%股權 (如今值$6000億)。2年後,李澤楷以$9,800萬將呢20%賣給南非的投資公司MIH,短短兩年賺十倍,套現接近一億,可謂其點石成金的得意之作。 當然,市面上亦有分析指,當年Richard用「蛇吞象」法買香港電訊,搞到債台高築,要賣嘢減債,包括騰訊股份。 真正動機,大概只有李澤楷本人先知。 但常理推斷,尤其當年新出道的李澤楷,點都有Daddy撐腰支持,如果睇準騰訊將來的重大發展,又何須用區區$9,800萬賣出股份? 需知道,對誠哥而言,呢個數完全係零頭而已。

但點都好,李澤楷可以話係騰訊早期的重大投資者,呢1000萬唔到的投資,協助當年毫無盈利模式而每日燒錢的QQ解決燃眉之急。據說,當年在找到李澤楷前,馬化騰曾經打算用100萬人民幣賣走QQ,可惜同買家的出價相差幾十萬而告吹。因此,李澤楷的投資,亦可謂改寫了騰訊的命運。

 

3. 騰訊裡最重要的香港人:前Goldman Sachs 劉熾平

2003年任職Goldman Sachs,職位為Executive Director的香港人Martin Lau劉熾平,與馬化騰第一次見面,地點係金鐘港麗酒店的咖啡室。劉熾平代表GS去Pitch 馬化騰,讓GS協助騰訊在香港上市。當時的QQ,已經找到各種盈利模式,而且用戶增長勢頭頗猛。

其實,早在2000年,騰訊已經向GS提交過融資建議,不過當時的GS未看清QQ的價值而選擇放棄。

相對其他投行經理的高姿態,相對低調平實的劉熾平建議騰訊先用較低估值申請上市,並運用融資金額實在地增長,讓股價反映價值而自然地增長,而非一上市就Cap水走人。這種平實的建議,深得馬化騰認同,亦直接造就了後來升幾百倍的騰訊神話。

上市前,劉熾平陪同騰訊創辦人團隊周圍飛參加路演,遊說各地投資人入股做機構投資者。期間,騰訊的創辦人團隊對劉熾平的為人十分敬佩,與表現而很滿意,於是邀請劉熾平過擋加入騰訊。上市後不久,劉熾平真的離開GS而加入騰訊,人工只得以前1/3,但獲得唔少股權作為報酬。劉熾平一直留任至今,仲做埋騰訊CEO,如今手持騰訊股份市值超過200億。

是的,好多人唔知道,原來當今的騰訊CEO,竟然係個香港人。

 

SJ結語

3個香港人,一個千億富豪家庭出身,一個憑著眼光而白手興家幾百億,一個卻消失在歷史洪流,可謂命運迴異。

調轉頭睇,騰訊改寫的,肯定唔止3個香港人的命運。

其實,除咗9Gag同Gogovan呢D創業例子外,香港人在世界創科舞台依然可以大有作為,大家努力吧!

關注高質內容,讀神科又想入行頂級MNC / Banking / Law Firm? 即時填妥以下表格,SJ將不定時推送獨家行業活動 (絕不SPAM)

* indicates required




StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Tags: , , ,

Comments are closed.