港式「堅離地人」的8大特徵,你有無份?

所謂「物以類聚,人以群分」,每個社會都有唔同階層的人,而每個階層的人都有類似特徵。

今日星期五SJ同大家講下輕鬆D的話題,就係港式「堅離地人」。

點解要講呢個Topic?確實,港式「堅離地人」的離地,其實當你深入了解他們的背景,正正就係地地道道的香港歷史重要一章:華人買辦階層。 然而,雖然時移勢易,今時今日呢個階層卻比以前覆蓋更多人口,總有一個堅離地朋友在左近。其實都係個有趣現象。

 

 

1. 海外留學 但並非真係好「鬼仔/妹」

人在亞洲,無論係日本香港台灣定大陸,要離地,當然要同西方有一定淵源。

離地特徵如下:

– 擁有西方外國護照 但在香港長大

– 曾在外國留學 其中又以英文幾好,但並非最鬼仔/鬼妹的香港人最為離地

呢度值得解釋下。外國讀書主要三大種類人:

第一類係最普遍的香港Locals,雖然身處英美但都係成班香港人聚埋一齊,讀理/商科,如非必要從來唔講英文,緊貼My TV Super的所有TVB節目,韓劇,及以前的《康熙來了》。呢類人通常好貼地,分分鐘仲係唐人餐館打工兼職。

第二類係最鬼仔鬼妹的香港人,自少在國際學校讀書,講英文係母語水平,講中文有嚴重障礙,更加唔識讀寫中文字。呢類人通常都頗貼地,性格似真鬼仔鬼妹,比較真性情,唔特別好名牌或者高檔消費。

Also on SJ: 香港Top 6國際學校排名(Top HK International Schools)

第三類,就係港式堅離地人,在外國留學前,多數在DGS, Maryknoll之類名校讀文科,自少成績名列前茅,雖在中文環境長大但極度努力學好英文,因此中英皆極度流利。通常,最 「Class-conscious」就係呢類人,勤力之餘,亦最識飲識食。

 

 

2. 中高收入 但並非真正發達 賺大錢

低收入固然無條件離地。但原來真正賺大錢的,反而相對亦唔咁離地,原因係賺到大錢的,大部分都係做生意,而做生意往往係一點一滴做上來,體驗過貧窮,完全明白金錢的意義以及睇野往往係睇「值唔值」,有無內在甚至投資價值,反而較少「感覺良好/值得擁有」地消費。甚至係,好多已發跡的人,依然保持當初的節儉習慣,清茶淡飯,呢個在富豪階層都頗為常見。

因此,反而係月入 40-120k左右的高收入打工仔,通常係金融業,專業人士,同大公司管理層,逗份豐厚的糧,出入甲級寫字樓玻璃門,西裝革履,返工後可以安枕無憂去睇戲食飯,以食遍世界米芝蓮餐廳 (及Post上IG) 為己任,一年去幾次日本/熱帶海島/歐洲旅遊。

Also on SJ: 究竟大律師收入有幾Shit?

 

3. IG接近 1,000 – 2,000 followers

呢個係承上題。假如以Likes及Followers數為指標,IG簡直係「堅離地人」的天堂。

一個IG貼自己去深圳消費,在北角搭叮叮,踢足球,一班朋友打邊爐;

另一個貼自己在馬爾代夫的Resort房間望出去一望無際的蔚藍大海,飛機商務艙+香檳+機票的指定配搭,打馬球,同埋幾個「高級朋友」在極Fancy的私房日本料理合照。

肯定係後者超多Likes 同Followers。 但當然,堅離地人,又唔係靠開IG博知名度然後賣廣告,因此通常就千零兩千Followers左右,唔似咩電競Model下下幾萬人Follow。

 

4. 經常搭的士 UBER

堅離地人絕跡巴士是常識吧。

地鐵都勉強可以搭,但假如夜晚食飯後10點零鐘,肯定係搭的士或者Call UBER,因為「好累」。

朝早返工,亦可能有30%以上次數係搭的士,「廢時等」。

 

5. 住在「堅離地城」

正如以上所講,堅離地人唔係窮人,亦唔係最有錢已發跡的人,反而更多係中上階層的人。

以香港而言,較多堅離地人聚居的地區包括:

跑馬地 – 香港No.1 傳統中產地區

大坑道 – 跑馬地的進階版

九龍站 – 後起之秀,可謂新晉堅離地人俱樂部

堅尼地城 – 其實巧合個名話堅離地,比起前三者唔算太離地,因為舊樓臨立,雖然都邁向個離地方向

南區/貝沙灣 – 如其話堅離地,不如話係外星人住的地方罷了,因為收入已經超越堅離地人個Range

 

相對而言,咩太古城其實反而有點失色了。

 

6. 離地興趣 而且係家族流傳下來

離地興趣例如打Golf,帆船,騎馬/馬球等,都係離地指數最高的運動。而且,好多仲係第二/三代的興趣:屋企係遊艇會/Country Club Member,齊齊揚帆出海參加勞力士帆船比賽。其實都可謂類近貴族了。

另外仲有去跑馬地Football Club踢波或者打網球,之後在裡面食個$200的餐,都係頗離地的港式堅離地活動。

 

7.  熱愛中英混雜 但又確實有一點點美感

香港人講嘢向來中英混雜,好似以上話IG幾多個Followers,中文講就好蹺口,呢個都係香港特色。

但堅離地人確實英文根底更深,好多嘢對佢地而言,用中文表達唔到個意境,例如話:「係London我自己中意星期日一朝早去Fernandez and Wells坐低,一邊睇Sunday Times,一邊飲杯Espresso,覺得好Chilled,環境好Tranquil。下午去Chinatown同朋友食飯,行下同埋買Grocery,傍晚搭Tube返去住Pasta。」

確實,好似紅樹林在鹹淡水交界生存而繁衍,堅離地人就係呢種中西文化下成長同生活。唔好盲目扼殺呢種看似異類的堅離地人,呢個都係香港的獨特歷史背景產生的文化同階層。

 

8. 雖然看似玩世不恭,其實對社會一樣重要

所謂食得招積,住得舒適,在一個極端而憤怒的時代,呢班堅離地人看似同社會脫節,但其實佢地同時亦係社會上的中流砥柱,支撐了一定程度的文化品味同理性。好似作家陶傑,其實都係某程度的堅離地人,嬉笑怒罵的文章,其實一樣帶來貢獻,無論係娛樂大家定係帶來更深層思考。 即使國際關係殿堂級MK教授沈旭暉,FB專頁係自詡係《堅離地城:沈旭暉國際生活台》,由此亦可見一斑。

好似一個Ecosystem一樣,社會唔同階層的人各司其職,都係令個社會運行得更好。 只是,在樓價瘋癲的年代,堅離地人容易被「仇富L」針對,其實本身亦係「吠錯樹 (Barking up the wrong tree)」。

好多嘢,你可以唔認同甚至唔中意,但往往無必要攻擊甚至試圖消滅掉,呢個就係理性了。

有人想發達,有人甘願沈迷打機,亦有人只希望繼續「毫無代價唱最幸福的歌」。或許,亦無可不可。

 

SJ結語

你身邊有幾多個堅離地人中晒呢D criteria? 快D Tag佢地睇下佢點認唔認同啦!

關注高質內容,讀神科又想入行頂級MNC / Banking / Law Firm? 即時填妥以下表格,SJ將不定時推送獨家行業活動 (絕不SPAM)

* indicates required




StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Tags: , , , , ,

Comments are closed.