月入6萬的香港人: 裝修佬 完勝 中環精英

早前有條短片《月入三萬的香港人》在網絡爆紅,講一個上位中的年輕人好不容易躋身月入三萬的階級,假假地算係個經理,本來過著頗為瀟灑偽中產生活,自己租樓住,開寶馬3系代步

直到有左女朋友,準備結婚,成家立室,才發現月入三萬根本乜都做唔到,甚至如SJ文章所指,可能係傾家蕩產的開端。其中一個原因係:當你月入三萬時,外界(身邊所有人) 自然會期望你使更多錢:買樓,買車,年年去旅行。計落計落,其實無幾多錢剩。

 

月入三萬固然脫貧,至於月入六萬,係香港地更加係中產中的中產,甚至已經有點離地。一個人拿住一份六萬蚊的人工,絕對唔失禮,而且對於月入一萬幾千的Small Potatoes而言,更加係望塵莫及,既羨慕又葡萄。對月入一萬五千的人而言,月入六萬簡直係夢想成真:就算癲到一個月去一次日本,仲有幾皮野剩,真係發達。

 

但究竟,月入六萬又是否真係等於優越生活,定係更加多煩惱的開端?

920_hsbc_01_1

 

而家,想像一下你係 「Kelvin」,係匯豐HSBC 做一個 “Senior Project Manager”, 月入六萬幾,每日大概朝8晚8,做12個鐘。

坐得呢個位,你好可能已經35歲左右,而當年同齡入匯豐的同事,好多已經抵不住競爭,離開左匯豐,去左細銀行或轉行。你係同期10個同事裡面,經過多年,事業上依然做得比較好果3-4個人。雖然稱不上坐上升職的火箭,但能夠係職場屹立不倒,都已經算唔錯,而且必須使出渾身解數:OT係家常便飯,隨傳隨到係基本。

月入六萬蚊,而又晚晚OT,一定唔可以住得太遠。試想下如果晚晚8點後先放工,而又住係大埔,則差唔多10點先返到屋企,然後再食野,嚴重影響健康。為了健康,要適應OT生活,起碼要住係港島,例如太古城,日日坐地鐵返工放工,所謂30分鐘生活圈就係咁。

Credit: Internet

Credit: Internet

然後35歲的匯豐中高層,正常都已經成家立室,有老婆加2個仔女。老婆亦係細仔出世後,乾脆辭左份2萬5蚊的工而全職揍仔,因為想珍惜同仔仔相處時間。從此菲傭都唔請,自己打理家頭細務。一家四口,係太古城都起碼住700呎,否則真係住唔掂。月供另加水電煤平極都起碼2.5萬。

老婆而家無做野,家用起碼都比返一萬蚊,買餸交雜費係基本。

另外雙方父母,含辛茹苦養大Kelvin自己同老婆,點都要象徵式孝敬下,每邊各五千(月入六萬,家用比五千,是否不孝?可能係。)。

然後再加成家人保險,交通費,細路學費,書簿費,補習費,間中買下衣服吃喝玩樂的各種卡數等,一個月又係起碼一萬蚊。

如此一來,月入六萬的Kelvin,每月開支已經最少五萬五千。月入六萬,其實個個月只剩下五千蚊,還未算一年去一次旅行同過年包利是,同埋各樣one off的開支等。

 

其實,由此可見,即使月入六萬,其實可能一樣過著餐餐清的生活,銀行戶口長期處於5位數字,其實也是甚為狼狽。

 

好似Kelvin呢種例子,其實係香港十分普遍,尤其係衣冠楚楚的中環精英,更為普遍:當成個圈子都係呢種生活同消費模式時,其實好難跳出來別樹一幟,否則容易遭人閒話,甚至影響職場表現。

係Kelvin呢個案例,最典型的解決方法,就係兩公婆都全職做野,請個菲傭搞掂屋企所有野,包括小朋友。如此以來,家庭月入隨時十萬八萬,以每月五千的菲傭開支,換來價值月入2-3萬甚至更多的高學歷老婆薪金,則財政壓力會細得多。

因此,非正式統計,傳統中產地區半山的羅便臣道,10個家庭9個都係呢種模式,這也不失為幾十年來獅子山下的典型中產生存模式。

 

另一邊廂,香港過得最快活的,很可能唔係Banker與醫生律師,更加唔係一早同鐵達尼號一樣命運的 CPA,而係地盤佬,裝修佬,甚至美容院Sales屎。係學位氾濫而又消費主義盛行的香港,呢d工種可謂悶聲發大財行業,月入5-8萬並非天方夜譚,而係活生生的例子。SJ就認識一個人,A-level有B有C,港大都入到,但最終唔讀大學,竟然選擇做地盤,幾年過去,當Kong U仔著住件平價Zara西裝係中環扮高級出入Sevva,其實仲還緊 “關窿” 個個月餐餐清,呢位地盤佬據說已經月入超過6萬,而且已經係地盤做管理的職位而唔使再落手落腳。

worker

Credit: Internet , note: 笑鳥

即使唔係高學歷地盤佬,就算係普通裝修師傅,自己接Job做,一單住宅裝修都閒閒地20-30萬,所謂用料成本其實都好海鮮價 (行內潛規則,單據莫盡信),純利潤幾多,大家自己估下。有生意頭腦又夠勤力,一年接多幾單裝修,以賺錢計其實已經好過做飛機師。不過,灰塵滾滾就真的,唔係個個捱到。

而且,對於呢d非精英類別的月入6萬香港人,唔少其實依然係住公共房屋(一直長居),圈子裡面亦無話咩高消費活動,細路亦無需讀名校返補習,開支自然更低,所以反而呢班工友,只要唔買馬買波,個個月賺6萬儲5萬咁擠,一年都儲幾十萬,幾年就幾百萬,再拿去買樓收租(住公屋點買樓? 少年你太年輕了。)

所以,香港過去十年過來,以打工仔而論,其實最有錢果批,反而唔係中環精英,而係新一批的「藍領精英」。

 

結論,單純以錢銀論,月入6萬的香港人,SJ正式宣布: 裝修佬 完勝 中環精英!

 

SJ結語

細時唔讀書,大個做運輸?

其實,都好過做文員吖。

 

PS. 帶定頭盔: 稱呼地盤佬 裝修佬 絕無貶意,「佬」即雄赳赳之人,相信本行人士對這禮約俗成的稱呼,亦不會覺得冒犯,期望大家無需政治正確上腦。

關注高質內容,讀神科又想入行頂級MNC / Banking / Law Firm? 即時填妥以下表格,SJ將不定時推送獨家行業活動 (絕不SPAM)

* indicates required




StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Tags: ,

Comments are closed.