點解香港中產 難以發圍

對香港人而言,傳統來講的夢想,就係「發達」。

當然,唔同人對「發達」有唔同定義,SJ身邊有人覺得「月入十萬」已經係發達,亦有人覺得起碼身家上億先算。

但以客觀標準來看,月入十萬屬於中產(甚至係頗為Well to do的中上產 Upper Middle),而真係要發達起碼要以身家計有幾千萬淨資產,最好同某位官員收取的金額一樣,即五千萬左右。

有數得計,假如月入十萬,其實已經係社會上(靠出糧的人)最高收入的 Top 1%,每年就有120萬,10年就1200萬,30年做到退休先有3600萬。到退休時,減去各樣開支,假如唔太大洗而又假設無買樓或炒股票致富,其實可能淨返一兩千萬。

相反,假如你有一天「發達」了,例如你開左間補習社,憑著你的拼搏同頭腦,好快就越做越大開分店,每年盈利成千萬,咁你就可能可以仲後生時已經賺左幾千萬,賺左一個中產專業人士成世人到65歲退休先可能賺到的錢。而且你仲後生,大把世界。

 

當你仲後生,尚係一名窮L時,可能月入一萬幾千,其實你面前似乎有兩條路:努力進修工作,希望升職轉工,過幾年人工加到兩萬,再考埋CFA CPA 或一些Project Management的課程 之類,到時人工Double變做人生勝利組,有望30歲時人工升到3-5萬。

另一條路,就係創業做生意,而呢個更多時候係逼出來:假如搵到份好工月入幾萬蚊,真係會肯展開創業路途的人其實唔係太多,因為唔好話無左月入幾萬呢個opportunity cost,仲分分鐘要投入幾十萬到幾百萬,然後可能血本無歸。好多時候,係無份好工做的人,先會被逼上梁山去創業做生意。

 

而當你行左上Corporate世界的康莊旅途,努力工作然後終於上位,出入甲級寫字樓而終於月入十萬八萬,呢種感覺固然係好正,但絕大部分人一旦有幸走上呢條康莊大道,就永遠無發達,永遠只會係中產。

原因如下:

 

1. 當你成為中產,或當你預計自己會成為中產時,你就想過「中產生活」

對好多人而言,月入3萬至10萬不等,其實已經同「中產生活」掛鉤:衣食住行都要Premium的。

買名牌衣服手袋;假如金鐘返工,則食個Lunch一定要去PP樓下Per Head HK$150以上的餐廳,而直接拒絕海富樓下那些大快活甚至意粉屋之類的幾十蚊貨色,而且每日飲Starbucks亦係平常事;住就要住有會所的新樓,返工放工就的士代步,然後再買部寶馬4系獎勵下自己人工加到5萬,「反正車價只不過係一年人工」,你負擔得起。

而這些一切,某程度亦係身邊的同濟壓力,同事去PP食飯,你唔係唔Join啊? 身邊人亦告訴你,月入5-7萬,點都要對自己好少少,唔通仲日日食$25雲吞麵?就算食壽司,都未必食元氣,而係食那些日本人開的壽司店,人均消費$500。

然後再引伸出去,一年要去幾次日本旅行,而且最少要住四星級酒店,每晚幾千蚊,然後再自駕遊,因為「搭車好麻煩」。而香港書店的旅遊書賣得火熱,亦可見一斑。

大陸曾經有個「奔小康」的講法,SJ將香港版本稱之為「奔中產」:努力工作,升職加人工賺多少少錢,然後已經急不及待去過世俗而物質的「中產生活」。

中產最愛:Party, for the sake of it.

 

2. 一旦「奔中產」,你會被緊鎖在「老鼠轉轉輪」裡面

 

當你30歲剛結婚,家庭月入7萬時,固然已經算幾高,而你亦覺得過好少少的生活無可厚非:買車買樓去旅行,出入高級餐廳,每月開支閒閒地要4-5萬。

然後你生細路,開支急增至6-7萬,幾乎每月餐餐清,你唯有告訴自己要咬緊牙關,更加努力工作,有得加人工固然好,但就算無,都起碼要確保自己唔好被炒魷魚,如果唔係真係大檸樂。

一入做呢個「奔中產」Mode,隨即就係「老鼠轉轉輪」,有養過倉鼠的朋友肯定唔會陌生:隻倉鼠在轉輪裡面跑,跑得越快,個輪轉得越快,但倉鼠都要Keep住跑得同樣地快,假如疲勞或分心,一旦自己跑的速度不能Keep up轉輪的轉速,立即會被高速「Fing」走,隨時受傷。

中產都係一樣:每月開支4-5萬都尚算負擔到,但假如你無左而家份工,你就會落入賣樓甚至破產困局。所以你更加要努力保住份工,樓奴同消費奴隸就是這樣煉成的。

CREDIT: Internet

 

3. 當你在「老鼠轉轉輪」跑得越快 越難跳返出來

好弔詭的是,當你月入萬五時,呢個轉轉輪轉速其實幾慢,你隨時可以跳出來。但你又不甘心咁就走人。基於你的上進,你越跑越快由萬五變五萬,再升到十萬八萬。呢個時候,轉速已經非常快,拿得5萬以上人工的人,你估有幾多有Work life balance,有幾多放工就真係休息?正如以上所講,跑得越快,越難離場。

與其話追求夢想,慢慢取而代之的是Job Security:你只希望以後每年加人工,Keep到份工,最好一路升上去,穩穩定定已經要滿足。因為只要維持現有生活質素,而你的朋友幾乎都清一色係中產,其實維持到的話已經算係咁,都唔會去幻想咩創業發達。

 

4. 做中產 會有種Complacency

Complacency呢個字,好難準確翻譯做中文,但粗略來講,就係一種自滿而且覺得自己已經好巴閉的狀態。尤其常見於香港中產。

正如以上所講,當你月入十萬八萬時,其實收入已經係社會上頗高的一群人,而且你開始有Access to社會上一些高級場所與上流圈子:尤其係專業人士,Bankers與大學教授等,一年到晚有無數乜Ball物Cocktail Reception,唔係馬會就係Hong Kong Club或Island Shangri-la。一旦應約,開部Benz E350 而盛裝出席,拿住酒杯同行內三五知己小圈子吹水,見到某富豪或高官就衝去合照集郵,偶爾更加有幸上台領獎,更加自覺社會精英,人中之龍,「自我感覺良好。」

幾個呢種Complacent中產聚埋一齊,就會異口同聲非常看不起那些月入一兩萬的「廢青」無出息,買唔到樓應該怪自己。自己(稍為)上左岸,就急不急待對那些依然苦海浮沉的人踢多腳。

更重要的,就係他們已經以為自己好巴閉,而不用尋求任何人生突破,「反正而家咁咪幾好,咪搞咁多野啦。」自滿就係咁的意思。

 

5. 富人 vs 中產 vs 平民 心態大不同

其實,好多時候,中產同平民心態上無大分別,只係各種命運同際遇,以及個人的一些關鍵選擇,而導致大家行條路有所不同。但大家其實都係「打工仔」心態,只係前者係高級打工仔。

相反,富人同其他人最唔同的,係凡事以「價值為本」,並專注創造價值,而並非專注消費。

打工的人,即使係月入5萬的準高薪人士,都難免有種「Entitled」的心態,反正下個月都係出呢份人工,只要做好分內事就可以。他們往往缺乏更進一步的求知,例如究竟公司Business Model點解會Work,公司盤數點計,請每個人其實期望些甚麼等。打工仔卻大都只關心聽日會否打風,以及月底出糧好唔好去日本睇櫻花。

相反,老闆或富人心態,更多係戰略性:一盤生意,點先做到Breakeven,請咩人而用幾多錢,開發市場熱愛的產品,計算請每個人可以帶來幾多價值,以及行業及產品的週期等。一個出色的老闆,自己「好打得」固然係好,但最重要往往係做對戰略佈局同有效執行,其實要顧慮非常多問題。SJ認識的成功老闆,唔多唔少都有少少執狂。相比中產,老闆們更注重內涵而非表面野,非常針對「發掘價值」。

而呢個亦係點解,大部份創業公司都係失敗告終,因為好多人低估了做老闆的難度同艱辛。

假如無呢種執狂的創造價值心態,其實永遠都唔會發達。

 

SJ結語

其實做人無論係想過平淡安穩日子,中產舒適安逸生活,抑或想創業做一番驚天動地的事業,無話邊個好邊個唔好。

最緊要係有得揀,揀啱目標後,就要依循正確方向路徑進發,行少好多冤枉路。

及早想清楚人生想點行吧,共勉之!

 

 

關注高質內容,讀神科又想入行頂級MNC / Banking / Law Firm? 即時填妥以下表格,SJ將不定時推送獨家行業活動 (絕不SPAM)

* indicates required




StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Tags: , ,

Comments are closed.