一個普通香港醫生的興衰史:命運的永恆嘲笑

最近香港有兩名醫生分別搞到滿城風雨,一個係康宏曹貴子,另一個就係最近誤殺罪成的DR美容集團創辦人周向榮。

兩人共同之處,就係本身已經係醫生,相信雖非大富大貴,但起碼肯定過著優渥的中產生活。

然而,可能係際遇加上個人野心,以及與普通醫生缺乏 (或在多年醫學教育與訓練刻意壓抑) 的商業頭腦,各自在不同範疇創出一番驚人事業而攀上人生高峰,卻又同樣地狠狠摔下來,後者甚至到萬劫不復地步。

先唔講曹貴子,因為太多版本而且係個Live issue。而DR周向榮經歷的個人榮辱興衰,固然最終始終係個失敗者,卻引人入勝得可以拍電影,戲劇張力可能不亞於前兩年荷李活的《華爾街之狼》。畢竟,都係一個平凡人成為暴富Rags to riches,卻又埋下自己的失敗伏線而最終陷落的故事。

 

被控誤殺,周向榮在高等法院庭上曾提及自己的創業經過。1979年香港大學醫學院畢業後,一直任私家診所醫生。雖然話「平凡」,周向榮未必係醫生行業內的明日之星 On track做星球人名醫,但其實以社會標準,做得醫生已經係高高在上的專業人士,月入十幾二十萬應該都唔係太困難,尤其在80-90年代的香港,醫生律師等「發三師」本身就係社會精英,不愁收入。

創業契機係1994年,已經做咗15年醫生,三十幾四十歲的周,因為自己有皮膚敏感,而自製護膚品同藥膏,有病人建議周將呢D藥品正式生產「發大來做」。

審時度勢的周向榮,終於在1995年正式開公司添置工場,製作護膚品生產,個Brand就叫「DR」,後來他解釋,意思係Dermal rejuvenator(肌膚再生)。當然,亦有其Doctor簡寫的含義,暗示其產品背後的醫學專業及權威。原本,周向榮只係想做個製造商,大概好似藥廠咁。

然而,唔知係好彩定唔好彩,命運驅使周向榮最後係做直接對客的美容集團,而且仲好好賺。

周向榮在庭上作供時話,在香港最初找不到護膚品的銷售渠道,所有自己開美容院散貨:

好似一般創業者咁搲晒頭,唔知點賣,惟有自己開美容院賣返自己嘅產品,美容院好細賣得好少,不過經過時間累積,好嘢係有人發現嘅,之後越賣越好,美容院一間一間咁開落去。

 

1995年到2005年十年間,周向榮將重心放在DR,而無需靠本身醫生執業來維持收入。畢竟,睇病人係賣時間,一個醫生自己「睇得幾多症」? DR生意越做越大,無論賣美容服務定藥膏,係一大班人幫你賺錢而且係錢搵錢,同醫生執業自己一個賺取診金的「體力勞動」,係兩個世界的差異。

到2009年,周向榮甚至同外商合作,成立更High End的亞太幹細胞科研中心(APSC),業務做到好Pro,例如有血幹細胞的儲存服務。普通人聽完都好可能唔知咩來,反正都係昂貴的醫學產品。

無論係自由行的其他原因都好,眾所周知香港近十年經濟數據好到一個地步,係對於好多美容/零售等消費類公司遍地黃金的年代,租金又未貴到離譜,但消費者又好肯使錢,錢太容易賺。

終於,2012年,DR在香港已經有38間分店,有800個員工,有廠有實驗室,並且同年準備申請上巿做IPO。而上述的Spin-off公司APSC年收益亦以億元計算,當時周亦打算待DR上市後,再將APSC業務分拆上市。

周向榮風頭一時無兩,回想當初在診所做醫生日日睇症收一百幾十診金做微觀嘢,如今則管理幾百人的醫學美容王國,睇Big Picture睇大數,並且敢於走在醫學科技尖端,簡直「敢叫日月換新天」。

本來,周向榮將成為2間上市公司大股東兼主席,身家隨時以十億計。

本來,周向榮從一個寂寂無名的普通醫生,一躍成為革命性的醫學美容富豪。

人生哪有這麼多本來與假如。

 

在2012年10月,大概在周向榮忙於準備IPO事宜時,DR卻爆出香港歷史上最嚴重的一宗醫學美容事故,造成一人死亡、兩人殘廢,而往後發生的一切已經是歷史了:周向榮作為集團話事人兼實際上的CTO,與前線醫生與技術員一同被捕起訴。

在歷時超過100日的法庭審判中,證據顯示周向榮確實極具生意及銷售頭腦,他孜孜不倦地教導職員要了解顧客的背景,要令顧客覺得DR真心關心他們。並以DR獨步的「明數人/暗數人」推銷手法及會員Referral計劃等,並激勵員工大喊口號「DR之女無窮人!搵錢要用腦用心神!」 領導員工頻頻爆數,令員工又賺取高收入,DR又賺大錢。案中死者丈夫透露妻子曾在在DR花過百萬,而另外月入僅7,000元的一位清潔工則曾經支付7萬元購買案中出事的CIK療程。其銷售「能力」可見一斑。

終於,事隔五年在2017年冬天,現年62歲的周向榮被判誤殺罪成,監禁12年。從商業王國的寶座,一摔到關押重犯的監獄。除非上訴成功,否則出來後可能已經係個74歲的老人,可謂萬劫不復。

對於受害人及他們的家屬,如此判決結果可能係無補於事,但起碼總算有個交代:一個罔顧顧客安全的美容集團裡,事件的始作俑者與前線執行者受到法律制裁,可謂罪有應得。

而周向榮本來係一個普通香港醫生,假如佢無皮膚敏感,假如無個客提議佢發大來做自製的藥膏,假如佢無開DR,假如無做醫學美容,假如無咁搏命搵錢而推這些未經證實安全性的療程,或者周向榮依然係個普通平凡的香港醫生,但起碼今年冬至可以在家中度過。

或許,這位普通香港醫生的個人榮辱野心興衰史,伴隨而來的是短暫的美夢,緊隨的卻是命運的永恆嘲笑。

 

SJ結語

真係「如果命運能選擇」。SJ團隊無意落井下石,也非常同情受害人及家屬,但不得不驚嘆周向榮的經歷,充滿人性本善 vs 人性本惡,進取 vs 貪婪等的辯論。好與壞的分隔,往往只係一條模糊界線。如此糖衣包裝的人生陷阱,極危險,不得不察。

關注高質內容,讀神科又想入行頂級MNC / Banking / Law Firm? 即時填妥以下表格,SJ將不定時推送獨家行業活動 (絕不SPAM)

* indicates required




StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Tags: ,

Comments are closed.