【粗口慎入】 做地盤 究竟係點樣一回事?

我想匿名Share薪酬資訊,並率先獲取 "香港+"職場攻略

SJ前言:今時今日香港地,單純以收入而言,做寫字樓未必夠地盤佬高,簡單Demand Supply定律而已。

因此,唔少有志之士會以「做地盤」為後路:「假如做 [某件事] 唔成功,大不了做地盤賺錢!」

咁究竟,做地盤係點樣一個概念? Day to day工作係點樣?

以下節錄自連登Post分享,無論對做地盤有否興趣,都可能有所啟發:

 

 

最近見到好多講地盤制度既問題,D判頭幾仆街果D,今日又見到觀塘地盤出事,有人講起果D問題。我想分享下我果一年既經歷,大大話話轉左10份以上,真係學到好多野,但唔係講緊D地盤技術,而係學到呢個社會既世途險惡,同工作態度…

因為都好多年前,可能唔太記得好清晰,我以每一份工咁講下個工種同體驗#yup#

1. 地基雜工 日薪 $700/日

果時初初搵,就咁係勞工處搵,我就是但搵左一間,呢個係大判公司,亦都係同我以往對地盤既印象最接近…

呢間大判公司,非常好,無論福利工人,管工,都係好好,雖一既缺點係人工低,因為果時我唔知咩價,又諗住新仔都算係咁啦[sosad]

先講下有咩福利,佢地會有埋手套,制服,護眼,口罩,只要你諗到既安全用品佢地都會無限量比你用,可能你地會覺得呢d好基本,但之前就唔會咁諗…

再講下我果時既日常工作,可以講係寫意,可能我新仔,所以一開始都唔會比d好複雜既野我做,好少重野搬,r多過做。

最重點要講班師父,講起真係有d掛住佢地[sosad]
我平時返工8點,講常大家都係係架步(員工休息
室)吹水吹到差唔多9點先出去,我地通常出到去,就係等管工分配工作,而通常一早都冇咩野做,就係睇住d外判師父係度屌哂鬼咁做,而我地就食住煙吹水。

有時d師父十點幾就會出去買料,唔係建築材料,而係火鍋配料,到十一點幾左右就成班一齊入去食,係個師父比錢,唔係夾錢。而有陣時就會出去食,佢地每日都會輪流賣單,我有時想賣單,佢地就會話:洗撚你賣咩,留返d錢溝女啦。所以我係呢返工基本上每日食飯都係免費…….

通常食完飯,就每開始賭錢,我通常就訓下教,打下機。講起訓覺,因為架步係由一個舊鋪改造出黎,所以每個師父都會自己手工做張床訓教,果時我返左幾日,有幾個師父見我成日係地下坐係度訓,夾手夾腳整左張木床比我訓,真係好撚感動:~(

基本上到十二點幾大概一點就出返去做野,做到三點就會飲茶,即係下午茶。呢個時候管工會比幾百蚊我,叫我買d包,飯品比大家。大家休息大概9個字,做開始做野,做到5點開始沖涼,等打卡…

呢個場十幾個師父,個個都對我好撚好,雖然佢地大我好多,但我地完全冇代溝,佢地有時仲聽我講溝女,幫我分析[sosad]

教我好多人生大道理O:-)

我做左兩個月左右,因為經常遲到,比人炒左[sosad]

但係炒我果個工程師其實都好好人,佢親自打比我問我係咪唔慣,好辛苦咁樣,但我一星期遲4-5日,佢都係迫於無奈先炒我[sosad]

最後管工仲話比多七日人工我[sosad]

可能係大判,大家都冇咩壓力,而且冇利益衝突,個個都好和善,完全係我印象中應有既地盤佬

唔計較#good# 好吹得#good# 大方#good# 真性情#good# 真漢子#good#

當我比人炒左之後,就係惡夢既開始[sosad][sosad][sosad]

 

之後講既唔會太作,因為做既時間太短,主要係講下當中既仆街野[sosad]


 

2. 外判雜工 人工 $750/日

呢份工我都係勞工處搵到,主要係做新樓盤外面d挖掘,裝電線……

我既工作係負責用風炮打穿個地,之後用剷剷個窿,比人地安電線…

同之前果份既分別就係,不停做,同埋對住幾個女工…

包括我有5個人,4個女工,大概30-40歲,我每日既工作就係一路係最前挖,挖左泥就用個兜裝起佢,遞比我後面個女工,佢地就係一個傳一個,到地面就推去清左架雞頭車既泥。

而5個人既工作,最辛苦就係我果個位,第二就係推雞頭車去清黎果個,佢地4個女工會輪流上去做推車果個位,而我就一直都係做最前果個位…

做左幾日,我就忍唔住問,點解你地冇人頂我個位既?佢地答我,辛苦野緊係男人做啦…

我心諗:屌你老母,大家一樣人工,點解辛苦既一定要我做?

個判頭係阿叔,佢有時會走過黎同佢地幾個吹水,聽得出佢地係同鄉,都好熟果種…

如是者,我做左大概10日

到最後果日我同判頭唔撚撈…

原因係,果日我挖挖下泥有舊大石,我就叫其中一個女工拎支風比我炮打碎去,點知佢地當中有一個應該係大家姐黎,話我咁廢,用鋤頭挖咪得囉。我就話;咁你挖比我睇,佢就就去挖,挖左幾個字都未搞掂,呢個時候我就點支煙睇佢表演,之後個判頭走左過黎,問我點解坐係度食煙。我講左單野佢聽,之後話就話,咁鍾意坐不如返屋企坐啦,我就即刻起身換衫走人[sosad]

之後隔左幾日,個撚樣挖黎話加我50蚊一日叫我返黎,我就話:你叫你d女工做埋我果份啦#fuck#

 

3. 墨斗 人工$750/日

呢一個係返過咁多份最舒服,沒有之一

每日返9點…但十點前到就ok,通常我地都係架步果度hae,因為要下面管工有事先會打比師父叫我地落下就野,而每次落去唔會超過30分鐘。每日3-4次左右,其餘時間都係度hea,到大概3點半就換衫,4點收工…

事關墨斗呢一類比較舒服,所以一般起薪點都係好低,而我點解會咁高人工呢?就係因為個判頭係我親戚d朋友….

正正因為呢個原因,我每日同佢兩個吹水果時,透露左我既人工,一般新仔聽佢地講係只有$550-600,而我既人工就比呢兩個仆街眼紅[sosad]

當中果個中工,做左3-4年都係得$800,而個師父就$1100左右。亦自從佢地知我人工之後,就開始般料…

平時每日冇野做我地都會訓教,而果時開始佢兩個就會冇野做既時候練點彈墨(即係好似殭屍先生錢小豪彈d血落棺材果度咁),但明明佢教我果d我都識彈,加上平時出去做野開始都比我彈,根本唔洗練。所以我冇理佢地,照訓教

之後出到去做野我彈得ok,佢地就會叫我做d我唔識既野,我唔識佢地就會鬼食泥咁講話我拎咁高人工,但乜都唔識。

過左幾日,判頭就打比我話唔洗我返,原因係個師父話同我夾唔到[sosad]

但好老實講,新人黎講返左二個星期,做既野應該都係拎下工具,點會話有得夾唔夾,而我亦因爲知道擺明佢兩個眼紅,所以我最後都不留餘地咁踢爆佢地會日返工時間[slick](因為果度唔使打卡,平時係準時9到5返工,判頭唔知佢地返咁短時間)

 

4. 落石屎 人工 $2000/日

呢份工係我做最短時間,亦都人工最高既一份

大家可能唔太熟,但我講下,起樓係先搵紮鐵佬紮個形出黎,再搵釘板佬做個模,之後落石屎。

即係話,落屎石會係起一層樓最高既位置工作,亦都係最熱,你地可能會問,冬天咪舒服囉。但冬天係大把人做,唔輪到你做,除非你識人。

而我點解一開始就咁高人工呢,因為個判頭又係我老媽子既同鄉,正常我諗新仔應該$900-1100

因為判頭全部當大工計,連佢老婆都一齊返,佢地人工每日$2500-3000

但真係好撚辛苦,朝早8點要行十九幾層樓梯上去,之後開始得石屎黎,黎到就開始落,一邊落要一邊用碌震棒震散d石屎,等佢平均去到每個位,要知道上而係紮左既鐵,係唔會有平地比你行,落完一波石屎,就要用個拖把將d石屎拖平,每一個工序都好撚辛苦。

而每一波石屎落完,會有大概5-10分鐘比你回血,因為真係會中暑,30幾度曬住,再加面石屎會發熱,上下夾攻,而且係由上午8點做到下午4點,冇得停!

冇錯,係冇得停,因為石屎耐左會變硬,所以係唔可以停,而食飯係點?就係搵人用吊機吊盒飯上黎,食完繼續做!

所以我夠膽講,落石屎係地盤最辛苦既工種,沒有次一!

因為同樣哂住做既工,好似釘板,紮鐵,佢地有正常食飯時間,有飲茶時間,真係唔掂可以休息下

但落石屎係鼻哥窿擔遮,避無可避[sosad][sosad][sosad][sosad]

曬足7個鐘…..

我返左一日冇做…果一日我成世都記得,我7個鐘入面飲左8支野[sosad]

但我真係好佩服判頭兩公婆同仲有個師傅,佢地可以全日面不改容,有講有笑,低佢地搵咁多[sosad]

 

SJ結語

睇完之後,仲想唔想做地盤呢?

 

關注高質內容,讀神科又想入行頂級MNC / Banking / Law Firm? 即時填妥以下表格,SJ將不定時推送獨家行業活動 (絕不SPAM)

* indicates required


StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Tags: ,

Comments are closed.