各位SJ讀者大家好，係呢個無希望的年代，我想借呢個平台分享下自己經歷。
小弟今年30歲，本地非三大文科畢業，第一份工月入8k，在傳統媒體做。
眾所周知，傳統媒體一早已經係夕陽行業，入到任何一間傳統媒體工作，你會體驗咩叫「世界末日前夕」的感覺。
你會見到，早你10年入行的老前輩，就算識幾多野，收入都可能不如一個餐廳經理。係裡面，成日都有人Last Day，同事坐埋一齊就係傾 「打算做到幾時？年底？」係真心Sad的環境：無高收入，無前景，無希望。
如是者，我自己都做左一兩年，走個時人工先剛剛過10k，係社會眼中的廢青。
反正唔知做乜好，之後我做左所有廢青都會做的：Working Holiday去澳洲。
所謂出國十年，老盡少年心。我出國一年，其實都有唔少體會。
其中一個重要體會，就係領略到「事在人為」四個字的意思。
係澳洲做過幾份散工，到最後係賣雪糕，但係在頗高級的名牌雪糕店賣，由朝到晚整到無停手，永遠都有人排緊隊，後來我發現原來個老闆都好後生，之前試過幾次創業都無乜作為，最後做左呢間雪糕店，結果生意大好，粗略估計係印銀紙咁好賺。一個30歲唔到的後生仔，已經賺到好多人十年都未必賺到的收入，同埋請到一大班員工。
第一次體驗到，賺唔賺到錢以外，一個人如果堅持做一件事，甚至幾件事，只要堅持，最終都好可能做到一點成績。 與其怨天怨地，不如認真思考如何做得更好，同埋努力將心裡訂立的目標做出來。
帶著呢份信念，我返來香港後做左幾份工，都係返去老本行，又轉過去Ad Agency，終於輾轉轉到一間外國媒體巨企，從Sales Assistant做起，日日幫班Sales大帝準備Powerpoint Pitch Deck，買咖啡買飯訂餐廳填Reimbursement form。
曾經，有一排我都好迷茫，經歷事業失速期，升職無望，可能呢D機會真係永遠輪唔到我，因為我學歷唔夠，英文唔夠好，無外國背景，無Connections，曾經以為自己好醒，但原來出到來點都唔夠其他人犀利等等。
心裡盤算著各種可能性：「可能我應該去考紀律部隊，人工又高又穩定。」「可能我可以去試下報國泰的Cadet Pilot Program，做機師又有得周圍飛人工又高。」「可能我應該移民去台灣，砍掉從練，展開新生活。」
每日放工時間，只會花好長時間在糾結自己的將來，究竟我適唔適合做我而家做緊的工作？我係咪永遠無機會？究竟我應該做乜？究竟我有咩叻？成日都睇好多資料，關於移民，關於其他行業，嘗試得到短暫的希望。
身邊的朋友，都係比較負面，對所有野都採取一種嫉妒或者憤世嫉俗態度，覺得所有野都唔公平。另外一些人，雖然牌面好好，係十分好的學習對象，則好似好不屑同你做朋友。
有大半年左右真係每日都陷入自我懷疑。
但唔知到邊一日，突然又再想起「事在人為」四個字。
突然間，內心有把好有力的聲音話比自己知「你無退路，你無其他野好做，無其他地方好去，你應該認真做好你而家做緊的事，係要做到最好。」
的確，大家都得24小時，點解有D人Achieve到咁多野？點解另外咁多人一事無成？
係IQ？定係運氣？
係自律啊，DLGH！
自律就係，每日大概2-6小時的工餘時間，你會點用？
知道自己英文蝕底，我立志要IELTS提升到8分，每日搭車聽英文Podcast，係認真聽個嘴跟著讀，個腦認真思考Podcast內容。
知道學歷同Connections唔夠，報左某三大的PT Master，學費認真貴，可謂孤注一擲，但個兩年真係用盡自己所有時間同精力，順利畢業而且識到好多好Ambitious志同道合的朋友。
時空流轉多幾年，終於坐正左做正式Sales，主要針對企業方案，一個一個Package賣比企業，每日都「on the road」，奔波勞碌，Pitch唔停手。
條數原本都好細，公司本身對我都無乜期望，只係咁巧合有人走又未搵到其他人做，所以有個位叫我頂上。但好快條數就慢慢Pick up，總算開始儲到自己的客源，而且唔係Hard sell，而係永遠多做一步幫人，而且對產品同市場行情比所有人更加熟悉，將工作化為自己興趣，時刻有動力做野同回答客戶問題。
託賴亦有運氣眷顧，月收入總算突破10萬大關。當然，跑數工肯定唔會穩定，所以唯有更加努力。其實好多事情，確實係「事在人為」的範圍裡面，謀事在人成事在天，但首先你真係要認真為自己的前路思考同打算，敢想敢做拼命做。
回想自己當初的困窘，想同大家講，如果連我咁都有可能去到今日呢個位，大家都一定可以，記住要積極樂觀，記住凡事事在人為，你都一定得。
原文來自SJ讀者匿名投稿，歡迎更多投稿到 StealJobs.com@Gmail.com
SJ結語
好勵志，好欣賞呢種「事在人為」的信念，連SJ小編都受啟蒙，可能真係要去讀個MBA！
Also on SJ: 2018全球MBA排名：Burnout + 一球在手值得考慮
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
