早前見到StealJobs個Post講點解香港樓有買貴，無買錯。想簡單回應幾點，尤其係就住2018-2019年的世界宏觀經濟，講下點解而家香港樓而家其實高處不勝寒。
呢篇無長篇大論，主要想講幾個Points。
1. 香港地產的「Bitcoin化」
Credit：美聯
唔係話全盤否定Bitcoin的價值，當然佢有佢技術同用途，但斷定一項「投資」本身好重要係睇回報率，Return on investment，能否生產現金流。買Bitcoin，佢唔會為你生產任何回報，大部分人單純為炒而炒，搏Capital Gains，更加似賭博。
同Bitcoin相似，過去幾年暴升，香港樓同Bitcoin都造就一班人坐住泡沫快車撈一筆。但睇返租金回報而言，香港樓已經無乜投資價值，唯一係搏仲有得升，但呢個Upside有幾大？或者咁講，過去30年，好多人靠樓市升值賺大錢，但2018年再買樓，你見到Upside可以有幾多？你可以估佢永遠唔跌，但估佢再大升就真係Good luck to you。
2. 香港樓係咪真係永遠唔跌？
常言道香港樓只升不跌，呢個係新常態。
其實，樓價要撐起，始終要經濟好，失業率低的環境。
自從2010年香港(同埋全世界）在金融海嘯恢復後，失業率一直維持低水平。普羅大眾，即係讀者你同父母輩，個個都有野做，無論上至ibanker，下至零售業Sales屎，基本上全民就業。呢班就係撐起樓價的「血肉長城」，華人傳統思想係有錢的話，點都要買磚頭。因此，大家基本上空群入市。
而家當然有壓力測試，所以好似無可能會有跌市。但其實絕大部分人都係靠所謂父幹，所以隱藏了買樓者對父母的債務，父母退休後可能需要的洗費與開支，以及唔少父母有按本身自住樓套現，用作子女首期。這些風險因素可謂史無前例，相信金額巨大，而且無官方統計數字。講真，例如月入10萬的社會精英，點都要住得體面少少港島樓3房，2018年現價閒閒地都1,500萬，準備結婚30歲人，先做咗幾年野，有無可能自己儲到750萬呢？
而且，失業率低係咪永遠持續？
3. 經濟週期 必然經歷衰退期：Boom and bust
謝安琪《囍帖街》歌詞：「好景不會每日常在，天梯不可只往上爬。」
經濟週期有起有落，係永恆不變的道理。香港過往可謂逢8必跌，呢個大家留意返。
當經濟週期到達頂峰，資本亢奮，股市樓市見頂，呢個時候中央銀行就會加息抗衡通脹，然後經濟減速，資本拋售資產，商業運作減速，失業率升高。 呢個今時今日看似異想天開的現象，就係經濟週期。
4. 中國篇：唔好低估貿易戰的影響
美國長期對中國龐大貿易逆差，觸發貿易戰係無可避免的必然結果。與其話係Donald Trump發動貿易戰，不如話係美國長時間的赤字壓力，走到呢步，發動貿易戰亦係身不由己。唔發動貿易戰，Donald Trump亦難以向美國Rust Belt選民交代。現行的貿易框架底下，美國點都無著數，自己貨品就硬食重稅，再唔係就被強制「交流技術」，咁搵笨倒不如放手一搏，呢個就係美國的思維。
發動貿易戰又點？
唔好忘記當年好威好串的暴發戶國家：日本。 美國當年就係會日本發動貿易戰，以及進行各式各樣的手段，令日本從最輝煌的高峰重重摔下，一沉20年。當年的東京樓，據說都係好似今日香港樓，點分析都係永遠只升不跌：日本只有一個東京，全日本都想移居東京搵機會，日本經濟強勁，無論生意利潤定買樓投資，全民都發日本「大國夢」，人人欣欣向榮，造就大量 (紙上) 富豪。東京樓泡沫爆破後，相比其他國家首都，到而家都頗為低廉。
中國當然唔同日本，但唔同係更好定更壞？呢個大家需要自己判斷。 唯一可講係No.1 強國如美國都經歷過大蕭條以及各式各樣的經濟衰退。
5. 李嘉誠都走人啦 拜拜
賣中環中心。你問李嘉誠，肯定唔認係睇淡，肯定唔認係撤資，但身體總是很誠實。
超人眼光準就固然，而且值得留意都係「善價而沽」的道理，賣咗佢好過收租，而賣咗佢亦無係香港物色其他合適地產項目「換馬」，所以根本就退市。
6. 供應量
皆因之前當奴年代無乜起樓，而家樓價咁貴咁好賺，所有地產商瘋狂起樓。
新盤供應定必再創新高，可能觸發經濟學上所謂 Cobweb Model，增加供應時錯判將來市況，供應大增導致樓價大跌。
後記
始終買樓自住難以避免，但買樓投資就係不了，更別說辣招。假如等到下，如期交阿爸阿媽比副身家你入市幫樓市再創新高，倒不如觀察下先。
2018在Donald Trump坐暖個位後，必然大展拳腳，而且正如以上所講好多根本係必然經歷的結果，邊個上台都肯定要發生，只係是否咁明刀明槍而已。
經歷動盪，大家自求多福罷了。呢篇文純碎個人感受，亦係好多阿媽係女人的老生常談，啱睇就Share下，唔啱都歡迎賜教，或者一笑置之吧！
原文來自讀者 「師兄」 投稿，歡迎更多高質投稿StealJobs.com。
SJ結語
樓價跌跌跌？ Wake me up when September ends…. hopefully
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
