最近特首「選舉」，某女性候選人接連甩轆，從搭地鐵唔識用八達通，到最近震驚100萬人的「天水圍太遠，不了」偉論。
SJ不談政治，只關心打工仔切身話題。呢位候選人，固然來自「堅離地城」，但無可否認的是，她間接地道出了香港的「地區起跑線」的不均：以中環返工來講，住在堅尼地城，確實比住在天水圍的朋友有絕對優勢(Absolute advantage)。
人在香港，住偏遠地區的話，真係比住市區的朋友蝕底好多。
首先，必須澄清一點：偏遠地區出中環返工，其實並非講到遠得咁誇張咁悲情。坐公共交通工具，全港大部份住宅區都可以1個鐘多少少到達中環（連等車，大概1小時15分鐘）。有坐過元朗天水圍屯門 (所謂元天屯) 的96_系列巴士出中環，就知道呢條係區內出入市區的主打巴士線。即使以香港標準來講，這些巴士線唔算疏，而上巴士後 (唔塞車的話) 甚至可以快到40-50分鐘到達目的地，都算係咁。
當然，起碼以元天屯出市區而言，塞車是常識吧：從無論係屯公定大欖，然後到汀九橋，都係塞車黑點。所以趕時間最好「企」西鐵，肯定無位坐但肯肯定準時。
Credit: Internet
雖然並非遠到話要2個鐘一程，但以每日來回計，就要差唔多2個半鐘左右。相反，住堅尼地城或北角的朋友，則每日坐地鐵來回只需要40分鐘左右，而且有無得坐都無所謂。住呢的Prime location的人，每日比住元天屯，以及大埔粉嶺上水 (大粉上) 的居民，會多出接近2個鐘頭時間。
工作篇，重點來了：
假如做Hea位的人，每日朝9晚5，放工就開開心心返屋企，確實無乜所謂。
但對搏殺期的朋友而言，呢2個鐘，好好善用的話，就係勝利與失敗的分野。
在中環 (甚至全香港)，收入越高的工種與職位，傾向有更長的工時。即使好似Audit Big 4呢的人工唔高，但工時超長的工種而言，起碼都有少少晉升前景。例如做Banking之類的Front Office角色，朝9晚9係常態。
住Prime location的人，9點放工後坐地鐵返屋企，仲可以食屋企人留左的飯菜同飲碗湯，之後10點左右仲可以落街跑下步或睇下書進修下。但住新界偏遠地區的人，搭巴士或西鐵/火車 「踏上這無盡旅途」後，返到屋企食埋飯都11點幾，第二朝又要超早起身，所以就要跑步 / 進修 / 做其他有意義的事 就比較困難了。
而新界偏遠人士與Prime location居民呢個每日2個小時的差異，只計Working days，每年就差唔多係 500個鐘頭的差異。
一年500小時，好好善用的話，可以讀個Master，寫一本書，學一種語言，開始一個side project，甚至學Programming寫App了。
朋友篇：比較掃興 在所難免
星期五六晚，難得同一班朋友在中環 / 銅鑼灣 / 尖沙嘴 / 旺角等地區食飯吹水，從往事到將來，一傾就如滔滔洪水，有講不完的話題。住係市區的朋友，食完飯再去飲兩杯或食糖水之類，從創業Idea到香港的時局，聚到凌晨1，2點係等閒事，「反正聽日唔使返工」。
以旺角聚會而言，住紅磡，深水埗，何文田，美孚等而言，坐一程的士幾十蚊，20分鐘又返到屋企。但假如住大埔的話，就必須趕在火車尾班車之前的30分鐘，提前同傾得興起的大家宣布：「唔好意思，住得遠要走先。」 要睇住時間，成晚其實都就住就住，盤算住幾時要走人，通常不夠盡興。
而且，即使在聚會本身，鑑於你可能比其他朋友訓少一個鐘，所以更容易不停打喊路。
Credit: 胡杏兒 Facebook
然後係星期六日，平時已經要日日「踏上這無盡旅途」，住偏遠地區的話很可能只想好好休息，你會對市區的聚會避得就避，如非必要的話則盡量淡然婉拒。
尤其係假如朝早要出尖沙嘴辦點正經事，然後夜晚約了朋友在銅鑼灣食飯。中間有頗長的空檔，再搭車返屋企又唔三唔四，咁全日就會On居居咁在外面流離浪蕩，都咪話唔辛苦。
呢種苦，只有住偏遠地區的居民才會明白。
對偏遠地區的朋友：理解，體諒，包容
其實，香港有非常多人住係上述的偏遠地區，然後日日都係咁出市區返工。
大家雖然同工同酬，但其實偏遠地區人士的付出係更加大。
然後，朋友亦係咁樣： 假如一個好朋友應約，願意在星期六都專登從元天屯 / 大粉上 千里迢迢出來銅鑼灣見你，呢的係真正的好朋友，要好好珍惜。
如果佢地成晚總係若有所思，臉帶疲態，不怎麼投入，而且掃興提早走人。唔好怪佢地： 係你返到屋企，沖埋涼，係張床到睇緊StealJobs呢篇文章時，偏遠新界朋友依然搭緊968返元朗，巴士才剛剛駛出大欖隧道，在幽暗的山谷之間的高速公路繼續無止境的奔跑。
SJ結語
當然，住新界甚至離島依然有好多好處，例如環境優美，而且你亦可以話「無人逼你住新界」。
更重要既係，無必要亦唔應該講住新界「悲情化」，他們大部份亦對每日返工來回時間不以為然。
反正，要每日出市區返工的新界人，其實亦一早已練就一身好武功，從腳骨力到計算車程的腦力，亦係動物物競天擇下人類的一種進化。
薯片入天水圍搭輕鐵：值得一讚
但無可否認，無論因乜原因住新界都好，住新界的人日常生活確實會蝕底少少，某程度甚至係輸在起跑線。
唔係話咩都要政府幫，但政府（某些官員）起碼唔應該當呢班新界人係透明，放飛機真係連基本尊重都無，簡直係一種「膠都費時俾」的態度。
SJ向所有新界偏遠地區 （尤其係元朗, 天水圍, 屯門, 大埔, 粉嶺, 上水等）而又要出市區返工的朋友致敬！
Also on SJ： 住港島才感受到的8件事
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略