雖然「讓座遊戲」已經盛行咗好幾年，但鑒於近日有熱心記者將年輕人嘅「不讓座」行為以紙筆記低……呀唔係！係以「手機記低」，再廣發大眾「善心勸諫」，確係賺人熱淚。
同時令人反思「究竟年輕人點先可以坐呢」？
今日我就搵嚟有25年搭地鐵經驗嘅強哥，親身教導大家，話你知後生仔想坐嘅話，究竟要有咩STEP！
第一步：心理調整
所謂希望愈大，失望愈大。
就好似你去O Camp咁，抱住溝到女嘅心情入去，往往會好唔開心。因為獸父當前，你跟本咩溝唔到。
相反，你直情唔覺得個Camp會有女仔嘅話，你去到跳營舞掂到佢隻手仔都已經喜出望外！
Yes！道理一樣！
你成Ｑ日想坐，冇位坐又會唔忿氣、唔開心，只因你有「搭地鐵應該有得坐」呢個先入為主嘅觀念。
引致一個唔清晰嘅大局觀，從而令你身體反射動作見位就衝！增加做錯決定嘅機會！
所以由今日起，你要催眠自己：「地鐵係冇位嘅！有都唔係畀你！」
甚至要同自己講，地鐵冇故障，安全送到你去目的地，已經要謝主隆恩。
心理調整成功，一切就好辦事！
你可能感興趣：脫離廢青 成功人士的7大特徵！
第二步：預留陀地位
就快農曆7月，分享下你知，以前啲舊式戲院係有幾個陀地位嘅！(即係唔會出售但又冇人坐。)
啲位留畀邊個坐？你懂的，自然唔係人間界嘅朋友！
而我哋亦要將呢個概念搬去地鐵上面。
有啲後生仔，見到有位冇人坐就行埋去，實在太膚淺。
佢哋唔明白後生仔坐根本係一種罪！
你個屎忽一掂到個位，隨時已經有5個人心中小到你爆菊花！
所以若然得一個空位！
呢個就係陀地位，你係唔應該坐！
因為你一坐，其後一個阿伯孕婦嬸嬸入咗嚟，你立即瀨嘢。
班粉皮會一致裁定「你坐咗，搞到人哋冇得坐！」
所以，你要坐，永遠等到至少有兩個空位，先作考慮！
第三步：三秒的思想空間
《旺角黑夜》中，嘉樂仔講過：「開槍前，要諗三秒。」
即使有幾個空位，你坐之前，都要企定定三秒。
地鐵車廂嘅3秒，時間速度會否定物理法則，貼近光速移動。
換句話講，3秒前有4個空位，3秒後可能得返兩個企位。
這就是地鐵！（尤以金鐘與北角最為嚴重）。
呢3秒好重要，你見位即坐嘅話，啲人會覺得你係「狗衝」，同啲強國大媽嘅「抵疊式」搶位係無分別。
唔好彩後面個阿嬸都行去你個方向，啲人就會認為你涼薄冷血，以速度去奪走嬸嬸嘅座位！道德上輸到貼地。
你可能感興趣：在Tesla China 工作的10個月
第四步：閉目入神
歌都有得唱：「閉上眼似無呼吸～閉上眼我會消失～」
每次唔讓座，一定有「望手機扮睇唔到」嘅罪名出現！
無錯，年輕人視野良好，頭頂都應該有隻眼。
有見及此，要全力避免畀人覺得你係「扮睇唔到」，而係真係「無可能睇到」。
我嘅Suggestion係「閉上眼睛」！到時佢拍片又好，影相又好，你隻眼無?大過，一定屈你唔到！
再盡啲帶埋眼罩，話畀人知你嘅決心，係幾咁出塵同瀟灑！
最後一步：瞬間判定何謂「有需要人士」嘅的心眼
雖則你閉目，但亦唔係萬能。因為麈世間有種罪名叫「扮訓」！
所以不時你要利用「心眼」（即係瞇一瞇隻眼）望下周圍嘅「企友」，睇下有冇讓座必要！
咁其實咩人需要讓座？
超過65歲？未過3歲？大肚婆？行動不便者？
上述都未必係正確答案，正確答案係「有需要人士」。
你細心諗下呢個「有需要人士」，實諗死你，玩死埋自己。
要全身而退，必需心眼關七，掃一眼，
就知呢個係肥婆定大肚婆；
知佢係老當益壯定年紀老邁。
如果見佢腳步浮浮，可能係之前做完手術或者身體唔舒服。
你唔可以錯過每一個細節，
成為一個讀「身」神探，將人體奧妙一一參透。
喺必要時侯跳起身，讓座畀「有需要人士」！
恭喜晒，當你完成呢5個步驟，我寫包單你可以坐得安安落落，享受由中環去上環嘅一分鐘舒服車程！
如果你對上面其中一項抱有疑問，或感到力不逮，我有個建議畀你：
咪X好坐。
你可能感興趣：我係做IT…不過我並唔識整電腦既
SJ 結語
讓座是種美德，如果大家係地鐵眼見有需要的人士不妨主動提醒下對方，或許對方是真的沒有察覺到呢。
原文轉載至 張晨（“鳥”不起），獲授權轉載。
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略