除非你係神科爆GPA畢業，否則好有可能Grad Job或頭幾份工，點都做過一兩份毫無前景的「牛工」。
一份牛工，顧名思義就係做到隻牛咁，而且其實無位比你上，無任何晉升前景，就算你「幾打得」都英雄無用武之地。
牛工遍佈各行各業，從會計師樓到銀行Contractual Role，從電視台到律師樓。很多中環工種 (尤其Supporting或Back Office性質)，美其明係白領，但幾時有幾年經驗，而且考得一些行業認可資格，好多時人工仲比比譚仔阿姐仲少 (據說譚仔都14k起跳)。電視台都係重災區，大把二三線明(暗)星，做左十幾年都得一萬多少少左右，仲要時時置裝扮靚，可謂慘過狄更斯。
至於Big 4是否屬於「牛工」，則可謂Debatable。人工低，工時長，眾所週知。但至於晉升前景，其實又唔可以完全話無。 正如StealJobs呢篇高質Job Review，講EY，其實晉升前景都幾高分。
「牛工」的定義，正正就係人工低，工時長，無晉升前景。
有唔少時候，固然係PK老闆剝削大家Fresh Grads小朋友，自己就賺一球一個月，你就幫公司做朝9晚11，卻依然只落得一萬幾千。呢個亦係唔少公司賴以為生的Business Model：並非靠公司創造巨大價值而賺錢，而係靠Underpay並Chur盡員工而賺取巨額差價。呢種公司亦往往民不聊生，Turnover極高。
然而，另一邊廂，亦有好多公司，其實身處夕陽行業，或自身技術水平低下，只能食老本苟然殘存，像風中殘燭。老闆通常無乜料到，而且亦無乜大志，但個個月依然賺少少執下執下，都算交到租同出人工。身在呢種低增長公司，無論閣下幾打得，恐怕都未能力挽狂瀾，而且每年加人工可能就幾百蚊。
Credit: Internet
SJ有一位朋友的朋友，叫做阿傑，早年少不更事，很早學人「跟大佬」，17歲就無讀書，出社會做藍領工種，後來幾乎出大事後，立志「洗底」重新做人。
於是奮發進修讀書，自學英文，加入一家中小型貿易公司做文員，幫手跟單，處理海外客戶及供應商的文件與電郵等。入職時人工9k，3年後人工依然只落得11k。
其實老闆都好賞識並器重自己。但無他的，他自己也親眼看見公司 (如很多港商一樣)，早年做貿易風山水起，一櫃一櫃貨，一買一賣，轉手賺幾十萬。但而家尚未轉型的，基於大陸公司自己已懂得到海外找客戶及供應商，其實已經無任何肉食，利潤細小如塵，而且一旦被人走數，則一Q清袋。呢種雞肋生意，無任何增長可言，未執已經算唔錯。
一眨眼，阿傑都邁進三十。人地話三十而立，阿傑卻自己都顧唔掂。一直未轉工，係因為老闆算好好人，在毫無文職經驗下，比左阿傑個機會去試。然而，男人邁向29+1，比女人甚至有更大心理關口，30歲起碼都要做到 Manager啦，或人工起碼最低限度見到2萬，否則真係好難同身邊人交代，尤其在女朋友家人眼中，比無樓更大罪。每逢朋友聚會，始終難免自卑，時事垂頭喪氣。
終於，阿傑都立定心腸，雖然老闆係好人，但自己仲後生，無可能咁就一世，出去闖搵份有前景的工。在這個樓價高昂而又接近零失業的2017香港，阿傑好快就找到第二份工，係一間Turnover幾千萬的中型公司做Sales Support，人工從11k立即加到兩萬，三個月試用期後再Review。新公司環境大好多，而且做的產品以及市場都有高增長。相比舊公司暮氣沉沉，新公司則係一大班人一齊拼搏。
然後不消一年，阿傑據說已晉升做 Sales Manager，底薪連佣金平均都差唔多HK$28,000-HK$35,000。唔係話發達，但總算開始脫離11k的「清貧生活」。人生有了出路，工作有前景與希望，企出來，唔會「串柒柒」，但睇得出係比以前更有自信，時時面帶笑容。
其實，同一個人，放在唔同環境，可以有截然不同的命運。即使係阿傑的例子，原本做藍領工人，有機會轉到文職，先撇除人工邊份更高，但起碼達成了他自己目的，可以學做文件野，同埋學傾生意等的技能。那時的阿傑，可能真係值9k而已。
但隨著自身的努力與上進，阿傑好快就「Outgrow」了呢間貿易公司。簡單來講，阿傑一直進步，但反而公司卻原地踏步，了無寸進。
公司會增長，停滯不前，或倒退；員工都一樣有些會進修成長，另外一些則乜都唔做，幾年過去都係一樣。
假如公司Outgrow了你，只能請更好的人才取代閣下。
但當你Outgrow了你的公司時，正正就係呢間公司的「晉升前景」已經不足以滿足你，你亦應該另求高就。
阿傑的故事，除左提醒我地咩係一份「牛工」(哪怕老闆係個大好人)，仲有就係提醒自己要自強不息：就算無學歷，只要努力，機會來臨時你一樣有機會可以把握。所謂「Creating one’s own luck」，中文講法就係天道酬勤。努力未必立刻有回報，但只要堅持，始終有日會Pay off。
當然，在這個悲觀的世道，講幾多大道理都好，信不信由你。
SJ結語
祝願世界上每個阿傑都可以繼續堅持。Keep calm and carry on.
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略