香港人奉行其中一條金科玉律，就係「先敬羅衣後敬人」。
絕大部分人睇事睇人，都係睇表面果浸：似係撈得幾掂的人，應該就係所謂成功人士；名下有好多所謂公職的人，又校董又乜會物會的會長，甚至係大學的「榮譽講師」，應該就係品格崇高，備受社會推崇的人。
其實，心底裏，大家都知道呢的不外乎係虛銜。而且，會好Keen去爭取以及Show Off呢的虛銜的人，往往你應該更加小心。
但可惜，牌面而言，呢的人似乎係「Somebody」，而且普遍都係呢個「睇表面」的商業社會「撈得幾掂」頗為吃得開，至少都扼兩餐開飯唔成問題。
今次SJ就同大家研究下：人在中環，如何「無料扮四條」，如何在工作與人際關係上，扮到自己有相當實力。
1. 首先，著返套西裝
正如以上所講「先敬羅衣後敬人」。無論做邊行都好，著返套西裝，白恤衫，打埋Tie。進階少少就最好 Tailor made返套100%純羊毛的，Navy Blue或Charcoal Grey，再加一條袋巾，然後配一對酒紅色皮鞋。其實呢身行頭，HK$5,000左右都可以搞得掂。無幾多人真係識分一套幾萬蚊的Zegna，同你找印度佬造三幾千蚊的西裝。
再玩大D，走去日本開過來果間二手店，用二手價 2-3萬買隻原價7-8萬的入門級名錶帶下，開會時有意無意Show出來。
Credit: Cong Zhu
2. 學識Name-dropping
所謂Name-dropping，顧名思義就係躂人個名出來。
中環一些無料扮四條的偽精英，在中環「蘇浙」這類「會所」食飯，最常見的廢話如下：
A：「我同特首好熟架，大家以前都係XX學會，佢次次見到我就叫我X哥。」
B：「我上個星期先同X書記食飯，飲左幾斤茅台！」
C：「PWC個Managing Partner XXX係我的舊同學，識左好多年啦。」
D：「你知唔知啊，我識好多人架。」
E：「巴拿馬總統同我，都算有交情。」
老老實實，呢種Name-dropping係技巧最低劣的一種。會咁樣講得出口，通常只係掹車邊出席過一次飯局，就成世拿來曬命。
技巧高少少的Name-dropping，通常更間接地講述一件事，然後輕描淡寫地帶出某名人都係參與者之一，甚至是與該名人與自己第一身的有趣插曲或小故事。
3. 整返個Linkedin Profile
今時今日，係人都有Social Media賬戶，從FB到IG。要無料扮四條，必須整埋Linkedin Profile，上面要將自己的工作與經驗，寫到好似自己對成個香港資本市場左右大局，甚至為香港的金融制定遊戲規則。最好要加埋一張影樓影的「專業人士相」，更加突顯專業形象。哪怕你其實工作能力極度低下，日日返工被人柄，根本都唔知自己做乜，但個Profile卻已經已經先聲奪人。
4. 搵個伴陪你9 Up：「花花轎兒人抬人」
睇好多中文小說的讀者，可能都Come across過呢句「花花轎兒人抬人」，出自講述晚清「紅頂商人」的《 胡雪巖》。
簡單來講，香港人本地的講法就係「唱雙簧」，找一個同樣無料扮四條的Partner，日日同你人前互相吹捧，咁吹吹下大家都信你地都係好有料，哪怕你們二人都係行業裡面的渣滓。
A：「Mr B 間大學，在巴基斯坦好出名架，而且Mr B好熟悉Microsoft Word，識得用Track Changes。」
B：「係啊，我母校在巴基斯坦好出名架。阿A生在漁農界都好有經驗，有多年打魚經驗，我強烈推薦加入我地的管治團隊，建議月薪20萬。」
C, D, E, F ……：「….」
5. 講一大堆似是而非的專業名詞
無料扮四條的人，最擅長就係講一大堆似是而非的專業名詞，講到一些Lay Clients如癡如醉，以為眼前真係一個行業翹楚。
A：「我推薦呢隻基金呢，個Market有好大Upside，完全係同新經濟VR啊，AI啊，Social Media呢D技術掛鉤。李嘉誠最近都投資左AI，可見市場潛力有幾大！ 」
6. 吹噓自己消費能力
要扮成功，其中一個捷徑就係吹噓自己消費能力，從而嘗試投射自己實力雄厚的假象。
哪怕你銀行戶口常年只有5位數字，都要同人講自己去邊間米芝連餐廳食飯，但覺得佢地的鵝肝無另一間酒店咁好食，而呢間米芝連餐廳，Per Head卻「只需」$600，又「真係好抵食！」
打腫臉充胖子，扮都扮到自己係大富豪，呢個亦係無料扮四條的必修課，無錢就還Min Pay啦！
Credit: anset2000.blogspot.hk
SJ結語
大家學識如何「無料扮四條」後，要唔要咁做就悉隨尊便。
但記住：路遙知馬力，唔好被那些無料扮四條的契弟打沉你。
有實力的，最終一定會跑出！
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
