2017特首「選舉」到呢刻為止，越來越多選委公佈自己歸順某女候選人。
雖然香港人Overwhelmingly支持貌似薯片品牌的一位男候選人，但時已至此，大眾所期望在最後一個星期的形勢扭轉，始終無發生過。
1200人，始終大部份都應該會「維持原判」，而星期日之後，以及往後幾年的香港，可能會係過去幾年的延續，荒誕事情日日新鮮。對好多事情，香港人都唔知嬲得幾耐，堅持得幾耐，定係我地始終學會慢慢麻木，亦係不得而知。
但SJ呢度想講句多謝John Tsang，唔係因為政治原因，而更多係John Tsang完美展示香港人打不死的拼搏精神，呢個相信對好多香港人的人生帶來直接的鼓舞與啟示。
正如John Tsang辭職財政司時，成個月都唔批，似係故意留難，而上面亦放風所謂「不鼓勵」參選。相反，另一位人士辭職，就得到上面「秒回」批准。在這個1200人的遊戲，似乎John Tsang一開始就處於下風，甚至可以話係一開始就註定係「必輸」。
而在過去幾個月，以1200人支持度而言，兩面本身實力已經懸殊，之後更加係越拉越遠，至今為止，誰勝誰負更加係毫無懸念。
但呢個貌似薯片Logo的前財政司，依然唔肯放棄，堅持到最後一刻，哪怕係明知輸硬。
以65歲之高齡，依然頻繁落區，不停拍片，出席活動等，而且兩次電視辯論，每次一樣係Fit到一個地步，令到另外一位熱門候選人簡直係無地自容。
唔好話65歲，即使係係25歲後生仔，要過幾個月咁的生活，都未必頂得順。
John Tsang展示的，正正係「搏盡無悔」的精神。
雖然John Tsang無讀過HKU，但HKU人日講夜講的所謂「搏盡無悔」，正正就係咁：
大學生涯(以及人生）何其短暫，必須把握每一刻，用100%的努力，將所有事做到最好，將人生活得最精彩。無論結果如何，最緊要唔好比自己後悔。
有好多所謂前官員，成日攻擊John Tsang係Hea曾。但觀察返呢幾個月表現，其實好明顯John Tsang係唯一真正搏盡的Candidate。最唔Hea果個，應該就係John Tsang，他拍片與落區的速度與力量，就好似出拳往往係快狠準的神奇小子曹星如一樣（值得留意係John Tsang一早已經支持曹星如，而並非人地做左拳王先識得走來叨光，呢方面都值得一讚。）
人在意氣風發時，要保持自信很容易。但要一段長時間連續打逆境波時，依然可以打出超水準表現，呢個先係對一個人性格與能力的真正考驗。
另一邊廂，人生最高的精神境界，大概亦都係呢種「搏盡無悔」。
搏盡固然重要，但做到「無悔」更加係一個精神上更高的境界：正如John Tsang最近出果條《杜Sir飯局》短片，臨尾一大班人唱 「命裡有時終須有 命裡無時莫強求」，似乎亦係憑歌寄意。
凡偉大事業，要盡最大努力爭取，到最後一刻依然奮戰到底。那麼，無論成敗得失，其實都係光榮的。
比賽過後，無論勝負結果，亦要學會淡然面對，不要太上心，不要盲目謾罵攻擊對手。
呢種亦係君子競賽應有的心態，唔應該有Hard feeling。 當然，呢樣野本身亦係好鬼佬的一種性格，會否招致攻擊又係另一個問題了。
憑著呢種心境同個人境界修為，無論星期日結果如何，John Tsang其實已經一早贏了。
SJ結語
觀乎John Tsang過去幾個月的Campaign，每一條片，每一句對白，都令香港700萬人魂牽夢繞。
終於有一個人，仲要係個高官，可以咁講中我地的心聲。
無論係話希望香港人無需要再希望移民，到要幫助本地年輕人找回希望，並體諒香港人過去幾年的怨氣。呢的人話，香港人有幾耐無從高官口中聽到？
你可以話係John Tsang競選團隊 (尤其聲名大噪的「阿聰」) 做PR做得好叻，而事實亦都係咁。但同時間，有好多野就算PR團隊幾勁，你個人本身都要有料而且配合到，效果先會好，而John Tsang正正做到呢點。
以John Tsang的地位與名氣，做財爺咁耐退休後大可以嘆世界，但他偏要走出來，而且在贏面唔高情況下，依然講好多高官唔敢講的人話，又落區又拍片，其實都真係搏到好盡。 你話佢做戲都好，但確實呢場戲，佢又真係做到好好睇，好鼓舞人心。
或許，其實薯片選唔選到，我地亦無得決定。我們起碼可以做到的，就係向John Tsang這種人學習。
能參考John Tsang的表現，而令自己 be a better person, 其實已經值回票價，不是嗎？
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
