做舊朋友Gathering搞手，真係慘過做泥工！

放假，係一個好好嘅藉口，去同一班舊朋友聚下會，話當年。身為參加者，飲飽食醉掉低一百幾十當然心情愉快，但負責做「搞手」嘅話，就真係慘過瞓街，祝你好運。

呢個年代約班舊朋友，開個facebook event或者開個wtsapp group就ok，好似好方便咁，其實暗藏殺機。

有約過人嘅都知，喺facebook開個event，invite 15個人，可以到最後個日都係無人Join、無人decline、又無人留言。

完全無人理。

就算你開個post「去嘅就like，唔去就講低」。
都係無人like，無人留言。

無架啦，你只可以用兩個理由去安慰自己。
1. 佢地無Check facebook
2. 佢地比外星人捉曬
某程度上，佢地比外星人捉曬嘅機會率係高過佢地唔check Facebook嘅。

OK，咁唔好用Facebook，開個wtsapp Group，一次過問，唔洗誤會。
我好記得當日我地喺Wtsapp Group到問阿強：「喂，阿強你嗰晚o唔ok架？」
佢答我地：「正路應該OK。」

我嗰一刻覺得阿強唔做特首，簡直係嘥料。

「正路應該OK」係有層次架，仲係三個層次。
首先嗰日佢一定要「正路」先啦。嗱，我唔知佢「歪路」係點定義，可能佢朝早杯咖啡沖淡咗少少，咁嗰日已經好「歪」架啦。OK，我當佢嗰日正路，都仲要過到佢嗰嗰「應該OK」。
哇，呢句點頂呀！比阿梁振英學咗你話點算？

「梁特首，我想問2017年係咪可以雙普選。」
「正路應該OK。」

到2017年無得雙普選嘅時候，梁特首就會同記者朋友講：「哦，當年我答大家正路應該OK，但呢一年發現好多嘢都好唔正路，同好唔應該，所以就好唔OK啦。」

阿強其實係無答過任何嘢架。

另一個朋友明仔都唔係好好多，佢答我地：「May Ok」。
大佬你有無上過英文堂架！咩叫「May ok」呀！

究竟明仔係「未ok」定抑或「五月先至ok」呢？我睇唔透。其實佢地知唔知呢個世界係要Book位。
唔通佢想我同間餐廳講：「我想Book張枱，張生，8位半。」
「8位半？」
「係呀，因為有一位佢話可能會黎，咁當佢半個啦，你當佢處於一個遊離喺冷
靜與熱情之間嘅舊情人，個感覺就啱架啦。」
佢真係心諗，廚房條拖羅都無你咁煩啦係咪呀！

OK就OK，唔OK就唔OK，未知就答未知，留個時間睇下幾時confirm，都好過「May ok」呀。

一個搞手，就算比佢經歷曬「約人約時間」嘅階段..都仲未驚完。因為喺聚會當日，學術啲即係聚會前嘅5小時，
會有機會發生「飛機潮」。

如果聚會喺夜晚，當日嘅Lunch time會係wtsapp group出現一段簡訊：「今日我咩咩咩，所以唔黎啦。」
缺席嘅理由唔重要，最重要係當有一個人「放飛機」，其他朋友都會變曬Sam哥Cool魔… 登上Jetstar、Cathay pacific、Emtrates，同你黎一個「翱遊天際」。

你或感興趣： 中學同學 Gathering 遇見的6種人

阿強會講：「其實我今日都有啲嘢忙…既然佢唔去，咁我都係唔去啦！」
明仔又會講：「其實..今日本身陪女朋友，好似都唔齊人，我都係下次join你地啦。」
到時就會有人講：「個個都唔去，咁我都唔去啦～」
係佢地嘅邏輯上，超過三個唔去，就等於個個。

咁個搞手點？喂，其實佢都無癮呀，由一圍枱變半圍枱，再有機會進展到「撐枱腳」，但係佢無得揀。

阿強、明仔、張晨個個都可以「放飛機」，唯獨「搞手」唔可以，因為喺大家眼中，人係佢約嘅。
你無理由自己約曬十幾丁友出黎之後自己缺席，道理上講唔通嘛。

而最悲哀嘅係，當你做咗第一次搞手，你永遠都會係搞手，永遠唔會有人接手。

你可能感興趣：25歲才明白的 10 個人生無奈

到下次大家想食飯，就會話「邊個邊個去約啦，上次都係佢搞。」
你當然可以上訴：「喂..上次我搞，今次應該到你地啦！係咪呀！」
呢個時候，你會體驗到朋友們嘅默契同凝聚力，嗰種團結係連巴塞都會比佢地炒起。
A會講：「你搞啦，上次搞得好好。」
B會講：「捨你其誰，認真我真係諗唔到。」
C會講：「講呢啲，係你老哥先叫得郁班人。」

最後你又微笑接受，無限LOOP，再次應付佢地想「豪食」，但又唔可以超過「150蚊一位」嘅無理要求，當一個寂寞的Gathering搞手。

講咁多，既然咁辛苦，點解仲有人肯做Gathering搞手？
因為當佢見到一張長枱坐滿人，盤「刺身盛盒」未放落張枱已經比班「餓狼」清曬，全無儀態可言，幾粒鐘嘅時間，成枱人都係「粗口滿天」。

呢個時候，佢就覺得值得。
係架，做搞手慘過做泥工，
但為咗成班朋友，佢都會繼續做一個泥工。
就讓這一切隨風。

P.S.僅以此文感謝所有Gathering搞手，這篇文章其實是「抽自己水」，因為我是超級無敵難約的，哈哈！辛苦你們了。

原文轉載自 張晨

 

SJ結語

今時今日，要約齊班大帝食餐飯，真係難過登天。

成班男人，扭扭擰擰，真係唔知大佬你想點。

最難頂的係，你在whatsapp group問大家某日期得唔得，點都有幾個答  ” no” 但又唔再suggest另一個日期，你no 即係你果日唔得，定係以後都唔想join?

亦有人拍拖之後就幾乎杯葛班friend所有活動，唔知係條女唔中意我地d 豬朋狗友定其他原因。

見親呢d 回覆都想爆粗打爛部iPhone 6。

 

延伸閱讀： 中環人如何過 Long Weekend?

 

 

StealJobs全面透露各行各業人工，工時，晉升前景，以及入行攻略，歡迎匿名提供收入資料。

而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。 

立即加入StealJobs@FB 更多90後上位攻略