Believe it or not，當一個女仔同你講：「我要去讀Master。」
其實往往有更深一層意思，有時更加係一種近乎Desperate卻又含蓄而委婉的暗示：我們真的只是朋友嗎？
時間快速倒流至5年前，SJ一位好朋友 Andy (當然是化名, calm down) 的親身經歷。
Andy本身係外國讀神科出身，回流香港後認識左一個女仔，叫做Jasmine。
Jasmine其實係一個馬來西亞華僑。正如大部份馬來西亞華僑，大部份都傻更更 (有點似最近呢條片個馬來西亞女仔)。又正如上述果條瘋傳的「馬來西亞廣東話」短片的女主角，好多認識而又唔太熟的香港女仔，暗地裏都覺得 Jasmine 扮可愛而背後講壞話。
然而，夏蟲不可以語冰，精明的香港女仔又如何理解到，一股肉骨茶鄉土味的馬來西亞女仔，來自那個《夏日的麼麼茶》的陽光海灘熱帶國度，其實係「真心膠」，真係好傻好天真，好Pure好True。
Credit: 香港人不知道的馬來西亞廣東話
其實，老老實實，講樣的話，呢位Jasmine並非真係好靚，只是眼大大的一副無辜模樣。
但在呢副眼大大傻更更的模樣裏面，其實係一個非常非常叻的女仔。無錯，Jasmine會過來香港，正正因為她是馬來西亞的高材生，一個如假包換的全吉隆坡市頭20名狀元。對於像Jasmine這種馬來西亞高材生，大學畢業後除了去新加坡發展以外，來香港呢個「亞洲金融聖地」亦係自然而然之選。
Jasmine同Andy在香港的相遇，亦係呢個金融中心的工作。巧合地，他們的第一份工，就在同一間公司做同事。Andy本身個樣都好靚仔，人都幾聰明，有幽默感得黎又難得地非常正氣，絕非賤男果種。同Jasmine在同一條Team共事，兩人簡直係歡喜冤家，最主要都係 Andy成日會整蠱大頭蝦的 Jasmine，當然全部都無傷大雅。每日工作固然Intensive，但嘻嘻哈哈的相處令日子好快過。Jasmine每日返工搭車都會用iPod聽新垣結衣首《Heavenly Days》，像天堂一般的日子。
Jasmine雖然傻更更又大頭蝦，成日唔見呢樣果樣，但她的工作能力，尤其一發力果時，往往「跑贏大市」，甚至令全部人望塵莫及。連高幾級的Regional Head，來到香港Office都指明要見一見Jasmine 而表揚一番。
一班同事，都成日講笑話Jasmine同Andy應該係埋一齊先啱。其實，Jasmine會甘心成日被Andy整蠱，眾人皆見神女有心這個事實，甚至Jasmine亦向她的Local「閨蜜」表明心跡。Local「閨蜜」亦嘗試透過幾個相熟同事叫Andy快點去追Jasmine，但Andy一直都係以 「咪玩啦你班契弟」態度自動Dismiss他們的請求。
這樣的日子過了一年，Headhunt多次想邀請Jasmine過檔一間行內最頂尖的公司，據說人工可以見5萬。Jasmine，Andy以及幾個要好的好朋友食飯商討後，終於說服了Jasmine要把握呢個機會：「如果你唔把握呢個機會，咁你來香港做咩啊？係咪？」
Credit: Internet
雖然有點傷感，他們始終答應以後依然「Best friends forever」，他們還很90年代地去影了貼紙相（千辛萬苦才找到香港碩果僅存的貼紙相鋪頭），上面真的寫了BFF。Local閨蜜玩野，寫上「Jasmine ❤️ Andy」，但被Andy一句「又玩野？」後就刪除了。
結果，貼紙相只有BFF，友誼萬歲。
Jasmine過了新公司後，據說平均每日朝9晚凌晨1。以StealJobs.com的評分標準，呢間公司收入雖然可能有 9/10，但「工時」一欄應該係「0/10」。
每隔幾個月，呢班朋友都會約出來玩，唱K食飯等。Andy依然熱愛整蠱Jasmine，而Jasmine一貫地會嬌氣地鬧Andy，大家又依然係起鬨歡呼「快d一齊啦你兩個」，而Andy都係比標準答覆「食屎啦！」 然後繼續恥笑Jasmine的奇特廣東話口音。
Credit: Top Fun
如是者，這樣on and off的見面，又過了一年半。期間，其實Andy同Jasmine都有唔少單獨見面，各自都有Initiate，有時坐在海邊拿住一瓶啤酒 (Jasmine則只會飲可口可樂)，就傾到凌晨三點先各自回家。Andy絕對唔係Gay，但他真心覺得Jasmine似個細路，好Kai，只當她是好朋友。Jasmine雖然暗戀Andy到出晒面，但係「真心膠」而且真心Pure同True，都唔敢講乜野表白。
Andy在幾個月前，同一個外面認識的女仔開始拍拖了。Jasmine的閨蜜形容，簡直係「最黑暗一日」，幾個好朋友個個都跌晒眼鏡。Andy將呢個女仔介紹比呢幾個朋友認識，包括Jasmine。大家可能偏幫Jasmine，都私底下同Andy講 「乜你咁奇怪啊。Jasmine點都好好多啦，無論樣貌，身形，聰明，最重要係同你投契。你而家呢個女朋友，同你根本唔夾。」
Andy只是淡然說：「我知你地好關心我同Jasmine，但咪On9啦。」
Andy的女朋友，係好Local的香港女仔，亦頗為小心眼，已經多番警告Andy要「小心Jasmine食左你啊！出面的女人好狼死架！ 」Andy亦淡然Dismiss了她的憂慮，但甚至有幾次因為呢樣野而鬧交。
呢一年半過後，突然有一日，Jasmine凝重地問Andy有否時間一聚，有重要事想Consult下Andy。Andy在「Full and frank disclosure」的原則下，取得女朋友的批准才應約。
在一家中價的普通西餐廳，Jasmine告訴Andy，自己打算去美國讀Master。平時淡然的Andy，呢刻唔知點解覺得非常愕然，突然唔知講乜好，甚至有心如鹿撞之感。Jasmine繼續告訴他，自己其實當初都係當香港係一個吸收經驗的地方，之後可能會返馬來西亞或者去其他地方。「或者我都想Take a break，其實我好想做返學生，簡簡單單咁」。
Andy固然知道Jasmine身處公司的OT行內出名，似乎係Burnout症狀。而食呢一餐飯，一個半小時，Andy女朋友send了20條Whatsapp來「關心」Andy餐飯食成點。
埋單後臨分別之際，Jasmine告訴Andy自己想去Harvard讀Master，她的上司 (哈佛Alumnus)已經應承幫手寫 Recommendation letter。那時候，是12月的寒冬。Andy走在街上，奇怪地覺得很Sad。雖然他努力說服自己，其實Jasmine咁On9咁易信人，過到美國肯定比人欺負到喊。
12月至8月間，Andy的工作亦開始繁忙。新年後，Andy終於升職加人工，加到HK$29,500 + Bonus。Andy和女朋友2個人去了Ritz Carlton食了一餐HK$3,500埋單的法國菜。
到左8月中，大家為Jasmine舉行了Farewell。Jasmine從來唔飲酒，但好中意唱歌，尤其中意唱GEM的歌。顯然，來自馬來西亞的她，對本地香港人對GEM的負面觀感毫不了解。於是，大家在銅鑼灣的Red Mr訂了一間K房，好事之徒還故意Order了很多啤酒，話Jasmine今晚一定要破例飲一次酒。 (編按：呢個故事無加甜，Sor9ly)
到左凌晨1點，Jasmine點果首GEM的《Where did you go》到了，眾人由Jasmine閨蜜帶領下起鬨，要Andy一齊合唱：
“曾看著同星空 閒聊吹風 看日出多心動
曾每日纏一起 傻傻講起 能愛到下世紀
…..Where did you go? Where did you go?
怎會當這刻我需要你 你卻沒在我身邊
Where did you go? Where did you go?
這秒鐘 很掛牽 你卻不可感覺到
Where did you go? ”
更有好事之徒 (pretty much everyone) 舉起手上的iPhone 7，多角度錄下他們的合唱。
首歌唱完之際，有人Mute左部機，貌似醉醉地大聲問 Andy ：「其實點解你唔追Jasmine？You guys should be together for God’s sake! 」
非常Predictable地，Andy只是苦笑並舉起中指回應，同時在按自己的電話，可能又係回緊女朋友的message。而Jasmine都只是尷尬地笑，繼續點歌。
終於，大家凌晨5點散Band，天都快亮了，各自坐的士回家。面對大家要求Andy送Jasmine返屋企，Andy都係果種霸氣回覆直接Ban左。
「天快亮了，你的心呢 它曾經屬於我的
我該走了 你的手呢 有沒有一點點捨不得
… 如果美好記憶 還算難忘
為什麼 還會記得悲傷
不如這樣 我們一直擁抱到天亮
如果關懷是種補償 還有什麼不能原諒
倒不如這樣 我們回到擁抱的現場
証明感情總是善良 殘忍的是人會成長」 － 陳奕迅 《不如這樣》
Credit: Internet
到8月底Jasmine乘坐因航的飛機到美國，在香港國際機場，與呢幾年來在香港認識的好友一一合照及擁抱話別。雖然大家都有一點點傷感，但Needless to say，到Andy與Jasmine簡短而禮節式的擁抱時，大家又起鬨拍片影相，話「FB見，Andy呢鋪你跪玻璃啦！呢獲你仲唔___.jpg! 」
大家目送Jasmine入禁區，雖然準備入哈佛讀Master，但Jasmine依然係那個傻更更Kai下Kai下的馬來西亞華僑，她竟然跑返出來，話唔記得左比的野大家。原來係一人一封信，係呢個Snapchat同IG的世代，大家不禁暗忖 「馬來西亞人真係停留係90年代」。
在回程的巴士上，Andy同另外2個順路的朋友坐在上層的車頭，看著一部英航A380剛剛起飛，不約而同地一臉茫然。
巴士經過青馬大橋之際，他們都拆開Jasmine封信，裏面有他們的合照，以及一個書簽上面寫著一些好老土而又好符合Jasmine的陽光氣質的話，類似「識左你呢個朋友真係好開心，我地一班人從一開始就癡癡呆呆，坐埋一檯……下刪150字」
他們堅持Andy都要拆開，話裏面肯定有玄機。Andy一開頭都笑笑口著他們「收皮啦」而拒絕打開。但被一個朋友一手搶去，自己打開，把信的內容讀了出來。
結果，其實都係同其他人的信的內容差不多，無話咩曖昧或暗示之類，起碼大家都睇唔出。唯一最接近的，都只係話 「多謝你教識我好多野。雖然你個人好討厭，但其實你都唔係太差一個人。你要好好珍惜 XXX，她是個好女仔，唔好成日咁惡對人！」
然後，大家繼續 Life goes on。Andy和女朋友關係開始平穩，甚至進入談婚論嫁地步。
來自Jasmine的消息，一開頭都好多，Jasmine upload好多哈佛大學個Dorm同Campus的相 (從來都唔用咩Filter) 上FB，以及會send message去個「大Whatsapp Group」話比大家知自己去邊度Reg Course，去邊度買書之類。
後來，Jasmine的消息越來越不定期，亦都越來越少。從每個星期有message，到每個月，到每幾個月先有一兩個message。
過左大半年後，Jasmine 同大家宣布好消息，話自己得到某間Wall Street投行的Offer，大家連忙恭賀又話「你發達啦，位已上，唔好唔記得我地啊」
再之後，Jasmine的FB上載了同一個男仔頭貼頭的合照。男的叫Andy Tan，個樣唔差，一表人材咁款。個個留言話Congrats，「放閃」。Click入個profile，Andy Tan亦係 Harvard 學生。Jasmine在大Group告訴大家，這位Andy Tan係星加坡人，將來好可能會同一間公司做野，但他有好多個Offers，仲未決定好。
大家當然唔會放過呢個機會抽水，問邊個Andy更加好，又話恭喜找到個Andy substitute 之類的玩野message。
直到今日，呢位Jasmine只係曾經返過來香港一次，留左10日，之後都無再返來。據說，Jasmine已取得綠卡，決定定居美國，將來計劃申請父母從馬來西亞移民過埋去。
後來，Andy同其中一個局內的朋友，飲左幾杯。呢位局內朋友，向來被戲稱「孟德斯鳩」，因為他講野總有辦法將成個Conversation帶到好Deep，講人生意義之類的地步，像一個哲學家。當然，這亦是因為他有時都可以幾on9。
Andy講到自己其實都有少少婚姻恐懼症，好似要放低過去的一切。「孟德斯鳩」亦係一個好事之徒，但他今日收起平時的欺皮笑臉，凝重地問Andy關於Jasmine的問題。
「其實，我唔係無考慮過同Jasmine一齊。但我仲未拍拖果時，其實就好享受我地一大班朋友嘻嘻哈哈，日日齊齊出街食Lunch試新野，你笑我我笑你，當然都包括Jasmine。果時真係以為呢種狀態會一直持續下去。」
「事後我都真心覺得，其實我同Jasmine或者本身就係天造地設的一對。所謂Soul mates就係咁。老實講，你問我的話，我會認同其實我同Jasmine係最夾，相處得最舒服，反正大家都Kai下Kai下咁。相反，我同我女朋友從背景到人生觀都有唔少差異，你都知道的。
但或者咁講，我女朋友的性格，雖然同我好唔同，但就好似一隻船的拋錨咁，將我帶回來現實世界，等我可以努力做人，上進，入世。
相反，假如我同Jasmine一齊，雖然她好叻，但其實大家都天馬行空，分分鐘一儲夠少少錢，就會一齊跑去歐洲流浪幾年。」
Montesquieu將手頭的Hoegaarden一飲而盡 ：「大部份人以為自己會同自己最相似的人在一起，其實非也。一切都係緣份使然，夾同唔夾其實毫無關係。絕大部分最終都會同一個不甚了了的人共度餘生，根本就唔會有咩愛情，更多係相處同容忍。所以聖經都講：愛是恆久忍耐。無咩Magic。
無同Jasmine一齊，你覺得遺憾嗎？」
Andy思考良久後：「點都有少少，會好奇What if 我地一齊左，會唔會好開心，會唔會好合拍，好似拍戲的男女主角一樣。」
在酒精驅使下，Andy的防線徹底攻陷了。
Montesquieu再揚手Order多兩枝啤酒：「其實，佢同你講話考慮去讀Master，係比個最後通牒你。你無理由唔知架？」
Andy以梁振英的口吻回答：「知。」
之後，兩人良久再沒有對話。
至於，Andy這個「What if」的問題，因為他當初的猶豫，答案或許只能是永恆的「不得而知」。
起碼，Jasmine找到屬於他的Andy了，香港的Andy此刻卻有點迷茫。
SJ結語
Long weekend前夕，SJ今日唔講職場，踩過界9 up 講下男女關係。
呢篇文係TLDR都唔緊要，只是覺得Andy同Jasmine呢個故事太值得寫下來，留為紀念也好。亦歡迎大家轉載比身邊的Andy與Jasmine（以及你認識的“孟德斯鳩”）。
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
