真係唔好睇少互聯網威力，HKU七年前的一段Dem Beat，最近突然在網絡瘋傳。
唔熟悉香港大學Dem Beat「文化」的朋友：Dem Beat基本上係大學各個Hall之間的競爭文化的體現。Dem Beat由港大各個Hall分別著同款T Shirt的學生，一邊拍手踏地打Beat，一邊將自創的口號朗讀出來。
最近瘋傳的2010 何東Dem Beat內容如下：
「所謂何東精神 就係團結
我地何東姊妹 自成一族
不但精明能幹 做野爽快
我地會煮糖水 又會煲粥
入左Kong U 就想住何東
入左何東就至醒目
問妹何所欲 問妹幾時申請入宿
問妹何所欲 問妹幾時新入宿」
Needless to say，網民一面倒反應都係負面的：
「柒到唔敢睇」
「無聊，on9」
但其實身為香港人，更加唔應該帶頭踩自己的本地文化。Dem Beat本質上係一種「Ritual」(儀式)，就好似紐西蘭欖球隊著名的「Haka」儀式，每次開賽先全隊人都會奮力地跳一段紐西蘭原住民土著的戰舞，以誇張的動作及猙獰的表情震攝對手。以井底之蛙的角度來睇，其實紐西蘭的Haka都係頗為無聊但Haka更重要的，除左係威嚇對手以及提升士氣，仲體現左紐西蘭人對傳統的自信及驕傲，為全世界津津樂道。
即使以欣賞角度睇呢首何東Dem Beat，都簡直係一種享受。
從Beat詞來睇，可謂糅合左廣東嶺南諧趣文化同後現代的無厘頭表達風格。
從何東姊妹的「團結」及「自成一族」，講到呢班女仔「精明能幹」性格「做野爽快」之餘，又「會煮糖水」同埋「煲粥」。短短幾句，「何東姊妹」的出眾及全能，已經震攝觀眾。成日話食M記女仔娶得過，其實何東姊妹，先係貨真價實的上乘的老婆人選。
Beat詞下半部，話鋒一轉講到如果入HKU，就肯定係最想入何東Hall。「入左何東就至醒目」，呢度好巧妙地語帶相關：究竟係叻人先入到何東，定係入左何東就會變叻人？ 呢度Beat詞就賣左個關子。呢種關子，上承唐詩《 竹枝詞》的「 東邊日出西邊雨， 道是無晴還有晴」，下接香港90年代初的廣告口號「人頭馬一開 好事自然來」。究竟呢個世界上有雞定有蛋先？或許連睿智如何東先生本人都搞不清。
到最後兩句，更加係畫龍點睛：「問妹何所欲 問妹幾時申請入宿；問妹何所欲 問妹幾時新入宿」結尾用左排比句，將宣揚何東Hall的訊息，深深地烙印在700萬人腦海裡。而且，「問妹何所欲」呢句既精簡又易明，伴隨著眾人的拍子，正正流露香港傳統的嶺南諧趣文化，以及港大女生之間如姊妹般的老香港情誼。文風既像打油詩，亦像唱雙簧，好比清朝的「涼風有信，秋月無邊， 思嬌情緒好比度日如年。」
至於一大班人的Dem Beat舞蹈，雖然既無傳統舞蹈的優美，亦缺乏像Gangnam Style的騎呢與怪誕。但起碼其一，Dem Beat跳舞超齊；其二，點都好過大媽舞。
換個角度，嘗試欣賞下，你會發現其實呢個Dem Beat都真係幾正。從何東Dem Beat， SJ看到的唔係柒，而係友誼的可貴，人性的光輝，以及嶺南文化的諧趣與幽默。
SJ結語
問君何所想？ 大家又點睇呢個何東Dem Beat？ 歡迎留言表達意見。
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略