香港的特首「選舉」進入白熱化，有聲稱中立的智庫搞左個候選人辯論，但被薯片以「膠都廢時比」的態度拒絕左。
三個得返兩個，林鄭同胡官就上左呢個辯論。
一開頭睇都覺得正路，但越睇越唔妥，有唔少人覺得，主持似乎一面倒圍插胡官，而同奶粉眉來眼去，一個單刀橫傳射個世界波破網。
然後係林鄭同胡官之間的言行舉止，亦都幾有睇頭－－
林鄭用人脈同政府行政經驗去屈胡官機，而且以勝利者的高姿態，以快打慢串胡官唔識財金政策。
問問下再嘲笑胡官係中環無朋友舉目無親，唔似自己有財金猛人坐鎮。
粗俗點講，她的意思基本上可理解為：我林鄭有幾百個大佬出來撐我，你有無啊，無就返屋企啦！
Credit: Stand News
呢個固然鬧交時係好大路的策略－－攻擊對手弱點，並且盡情奚落。
但其實從觀眾觀感的角度，咁樣做簡直係下下策。
首先，林鄭以其59歲之「妙齡」及其多年來對傳媒練就的牙尖嘴利，對71歲略顯疲態的胡官拙拙逼人，難免有「蝦阿伯」 + 「蝦新仔」的雙重負面觀感。
人性使然，全世界大部份種族同文化，無關政治，都唔中意呢種恃勢凌人行為。
正如2008年美國總統選舉，後生靚仔的奧巴馬，都唔會大力攻擊當年都70幾歲的共和黨對手麥堅，笑對手唔識野，唔似自己係Harvard Law School畢業咁「巧叻叻」。
其次，係政府做左幾十年的林鄭固然熟行政，對政府運作及各種政策如數家珍，而且講野笑騎騎之餘仲急急口，簡直係AO面試的典範。（SJ註：有意考AO者，必學林鄭講野方式）
但有時聰明反被聰明誤，似乎還不如胡官懂得爆Sound bite。
大律師出身的胡官，缺乏行政經驗固然頗為蝕底，但講野識得 The art of persuasion，可能係以前做大狀時做結案陳詞的功力。
其中一句，頗值得參考，可以做教材：
//金融經濟政綱方面，林鄭質疑胡官欠缺財金班底。林鄭稱，自己在金融方面政綱最詳細，又明言自己不是金融人，但就有金管局前總裁任志剛等「靠山」幫手，質問胡官有何金融班底。胡官指自己不是金融專家，亦未有找人幫手。不過認為這不是問題，一旦當選希望合適人士能「幫香港手」，處理香港金融問題。
林鄭反嘲，「你認為你有魅力，誰人做緊幾大的銀行家都會幫你？」胡官答：「不是我的魅力，是香港的魅力。」胡國興又指對經濟認識不深，但稱要增加工商用地及改革稅制，又提倡擴大中小企業信貸保證計劃，為年輕人提供更多機會。 // 立場新聞
其後，胡官再補多句「我會搵到有能力的財金人士，唔係幫我手做野，係幫香港人手做野！」
成場辯論個幾兩個鐘，林鄭帶大家遊花園，講自己點樣從AO做起，係政府做過乜做過物，係咁Name Dropping話自己識邊個邊個，正當林鄭仲意氣風發之際，其實胡官(唔知有意定無意) 已經暗中佈局，時機一到即刻突襲「將軍抽車」，Check mate! 呢場辯論已經由胡官呢幾句畫上句號，勝負已分。
Check mate! Credit: Internet
大概無人會記得林鄭講自己點叻，識幾多人，幾有經驗，但大家都會記得胡官呢幾句說到心坎裡的話。
呢個亦係人性以及同理心的體現。
你幾叻，關我咩事？
但你真係想幫我，我真係會記住你。
其實，一個正常人都應該係咁。
不評論胡官同其他參選人的政綱與能力，但只看呢場辯論，尤其呢幾句Define了呢場辯論的對話，似乎都係大律師/法官比AO更勝一籌。
成晚看似處於下風，但憑呢幾句話反敗為勝，秒殺對手的話，其實都真係高手。
SJ結語
讀Social Science / LLB有意做AO或做律師的同學仔， 雖然大家都無票可投，但唔好掛住食花生，學野啦！
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略