歌都有得你唱「年少多好 頑劣多好」，絕大部分「大人」，時時緬懷十八廿二的青蔥歲月：相比複雜的成人世界，學生時期相對簡單而無憂，可以時時同一大班朋友嘻嘻哈哈，「一蚊積蓄足以快樂到，
廉價結他抒發我暴躁」。
但人回望過去，往往因為對「現在」的不滿，只會記住「過去」的美好回憶，而直接將大部份不甚了了甚至不堪回首的難堪畫面直接飛過。
其中一段不堪回首的畫面，對好多男人而言，可能正正就係18-22歲果幾年。
相比女仔18-22的青春無敵以及較成熟的思維，男仔18-22大概就係「暗瘡」，「廢」，同「窮」的代名詞。
同一年齡的女生，往往比男生的思緒分析更早成熟，而行事更加周詳；相反，男生則處於躁動與不安的邊緣，總係「腦旬都未生埋」。
Credit: Internet
全世界都太多呢種真實案例，而SJ相信大家都唔會陌生：
大學一年級男生，追求大學一年級女生。無論男生幾努力，費盡思量去哄女生，時而Gel頭時而扮文青，苦戰一輪，最終都係無功而還。
但不久之後，女生終於拍拖了，而男朋友並非大學同學，而係一個26歲已經做左幾年野的Banker / 中學老師。
（視乎女仔咩人，假如好Social而Ambitious的可能就係Banker，因為大學朋友聚會House Party之類認識；假如係「返教會」的乖乖女，則可能係中學老師，星期六返主日學，同一個「敬拜團隊」而日久生情）
後來，經朋友輾轉打探，原來女生中意個「阿叔」(對20歲的人來說，26歲就係阿叔，30歲簡直係阿伯)，係因為覺得佢成熟穩重，而且有事業又上進，覺得有安全感，其中亦從其放學時，男方開一部寶馬BMW 3系房車接送充分體現其「Gentleman風度」。
對於20歲的普通家底男生，這一切就好似打機被屈機：打FIFA 2017，對方用巴塞隆拿，自己就用香港隊出賽，大炒7-0已經係算比面。
20歲的男生，嘗試用誠意打動，日日寫篇超長感性Message，講你地一齊做Project上堂時幾開心，幾仰慕對方，對方如何係自己世界的全部，而希望可以得到一個機會。對於20歲的女生，尤其係已經有寶馬接送的，呢的Messages類近騷擾，尤其在26歲寶馬男Review過後，甚至建議直接Block掉。
如是者，唔少20歲男生都係咁走過來。其中部分選擇認命，接受自己加入「阿源」的隊伍，連兵都無得做，反正這些機會…. 另外一些男生，則選擇入伍當兵，以後在女生在CityU的大門口登上寶馬後，默默執行她的指示，為她找Source屎。
最後一批人，則在悲痛與不解中，慢慢蘇醒過來，並且終於透徹明白了上國際關係時，沈旭暉教授提過的「弱國無外交」理論，並將其應用在男女關係上 「毒男無女溝」的道理。然後，男生找了「有暗瘡？搵Jackeline啦」的中心，並發奮讀書，瘋狂報Intern。其餘一切的，已經係歷史了 (And the rest is history)。
到這位男生26歲時，已經係某金融評級機構獨當一面，雖然日日返工一樣被老闆柄，簡直係「帶著老母去上班」，而且又唔知自己其實做緊乜，係咁整Powerpoint同Word Doc的格式野同Proofread 幾十萬字睇下邊度串錯字或漏左個Full Stop，但總算假假地都月入三皮幾野，幾年間唔覺唔覺又儲左二十幾萬。終於，為左獎勵下自己，決定上28Car買返架二手Benz SLK，原來先10萬有找。
Credit: Internet
後來，在某個大學朋友的Birthday Party，在某19工廈酒吧 (有無酒牌都成問題 ) 包左個場，每位收HK$500大元。當你成晚依然On99企係度唔知做乜，差唔多走的時候，你留意到角落都有個女仔一樣On99坐係度。
你走過去，用最誠懇的聲線「Hi，我叫Kelvin，你的Friend走晒啊？」
從職業談到讀書，「我叫Joey，讀緊CityU year 1」終於，你們交換了電話號碼。
後來，Joey告訴你有個同學追佢，並Send了其照片過來。對於競爭對手，你連忙奚落一番：「哇，都幾靚仔吖，眼耳口鼻配搭起來有特殊喜劇效果。」 「乜你咁衰架… 係wor，我差唔多放學要去荃灣，我阿公果邊食飯，你知唔知有咩車去? 」
然後，你二話不說，開左架SLK去CityU達之路門口，開埋個蓬。
Joey同幾個女同學行出來，架著一副Ray Ben墨鏡的你揮揮手打招呼，從Joey and friends 望住架開蓬Benz SLK 的神情，你就知道，呢單Deal就算唔做Due D，都一定Close得成。
開著兩座位的SLK，經過兩個街口，Joey指住外面對你說：「呢個咪追我個同學Lor。」
當你心想暗喜「What a loser」的時候，你瞄一下外面，看見一個文青打扮的男生在小巴站等車，表情有點靦腆，又Gel到個頭唔知點咁。
你才赫然醒覺：「Shit. I WAS the loser 6 years ago.」
SJ結語
歷史總是不停地重覆…
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略