無論來自各行各業，中環可能係全港最多人返工的單一區分。
對好多人來講，在中環生活的時間可能比在家多好多。
而香港政府成日認自己亞洲國際都會，又話自己咩紐倫港(New York / London / Hong Kong) 係世界3大都會之一。
但香港的規劃，眾所周知就麻麻地 (禮貌的Understatement)，宜居指數更加係第三世界國家水平。
中環話晒都係香港的CBD，其實唔少地方都真係唔見得人。
SJ搜羅左幾項建議比大家FF下，而唔少其實已經有人提出。如果中環係咁，就真係堅正堅Classy：
1. 除左指定區域外 全面禁煙
中環路面規劃閒閒地都成百年歷史，大部份街道行人路狹窄，而且人多車多。尤其Lunch time時段，條街尤其過馬路時完全係人逼人。
無野比呢種感覺更差：當你你踏出寫字樓大堂行入皇后大道中，吸左成日冷氣，第一口呼吸的「新鮮空氣」就係濃濃的一口萬寶路黑冰二手煙，夾雜馬路上「歐盟三型」的巴士廢氣。普通人都頂唔順。而尤其對於呼吸道敏感的人，簡直立即想嘔。
而行人路上，更經常有在你前面行的人，一路行一路噴二手煙，你跟在後面，又礙於人潮擁擠無法超前，只能一直跟尾吸廢氣，有時真係好有衝動上前理論，但對方又無犯法，你吹咩。
志明與春嬌 － 行埋一邊打邊爐，都可以識到朋友既，唔好一路行一路食
SJ建議：唔係話要「逼害」吸煙人士，但在中環 (以及銅鑼灣旺角等）呢種人潮擁擠地區，政府應該有D合理措施平衡 a)吸煙者可以吸煙 同 b) 非吸煙者唔吸二手煙的權利。
現行政策係，吸煙人士係條街點吸都得，隨時想食煙就食煙，行緊又得，等過馬路又得，排隊等巴士都得。
但非吸煙者唔想吸二手煙，除非帶個生化防毒面罩出街，否則無權唔吸二手煙。
建議劃出多個通風良好，唔會影響到行人的吸煙指定地點，其他地方全面禁煙。
2. 德輔道中 (即電車路) 劃行人專用區
呢個其實香港規劃師學會左好多年，諗起都覺得正：
除左上圖外，幻想下開埋露天茶座，以及劃分指定街頭表演區域 (禁絕旺角式大媽跳舞)，再加個地面噴泉 (外國夏天時好多細路仔跑入去消暑果種)，係咪成個Feel返晒來？
3. 將灣仔, 金鐘, 上環 納入「大中環區」 (Greater Central Area)
你會問：中環地方已經好寶貴，已經唔夠寫字樓，咁點搞？
其實，中環即使你全部地方拿來起樓起路都永遠唔夠。
如其在插針唔入的中環找地，不如將「中環」呢個「商圈」擴散到附近區分。
Fact 1：即使現行交通情況，由金鐘搭電車去上環，行車時間都係10-15分鐘左右。
Fact 2: 現時的電車行德輔道中，經常同巴士私家車貨車爭路，交通擠塞。德輔道中行以上建議，變為行人專用區，得電車可以行，再在電車路旁邊加防護欄，防止行人 (尤其細路仔) 誤闖電車路， 電車由金鐘去上環可能可以快至5分鐘搞掂，上環去灣仔都可能講緊10-15分鐘到。
充分利用電車呢種地面交通工具，加密班次，部分電車引進冷氣車廂，就可以有效地將成個灣仔, 金鐘, 上環 納入「20分鐘生活圈」的「大中環區」，令公司開寫字樓唔使侷限在現時的中環裡面開，而可以擴散到灣仔上環等地區，疏導中環的人流及各種交通壓力。
4.中環街市 做大排檔/夜市/ 體育館
Credit: https://lostintravelingwithjn.wordpress.com/
其實，去得台灣多的人都會同意，香港根本就差個夜市。
拮串魚蛋都唔俾，又難怪香港人咁大怨氣。
中環街市丟空咁多年，要用來搞乜社會上眾說紛紜：
有人話要做文創區，又有人話要做科網 Startup 的 Co-working space。
其實，做乜都好，唔好就咁丟空或者又用來起樓啦。
SJ個人偏好就覺得做大排檔/夜市就幾好，俾大家食下D地道香港小食，亦令中環的飲食唔好咁單一。
例如，香港都有個葵涌廣場，堪稱香港版夜市。如果中環都可以有一個咁既地方，都唔錯。
Alternatively，做體育館都OK，室內羽毛球，籃球，壁球，Gym room等等 ( 到時等睇中環2k per month的健身中心集團出來抗議 )。
Bottom line係，呢個設施應該用來照顧中環返工的人的Well-being，而唔係比某某地產商又賺多十億八億。
5. 中環海邊 種樹做「Central Park」
Credit: 竹仔的天馬行空旅程
其實，現時的中環海邊長廊：由政府總部起，到中環碼頭止，都算係幾舒服，好多OL放工就係度跑步。
但成日用來做嘉年華個塊爛地，唔知係咪等起樓定起路，其實更好係可以用來做個拍得住紐約倫敦級別「中環公園」。
6. 畢打街幢歷史建築 收返來做餐廳
畢打街的著名歷史建築 Pedder Building 前幾年用來做A&F旗艦店，成日經過都聞到間鋪頭專登噴出來的極刺鼻香水味。
其實用來做餐廳先係最好，仲要係做法國菜之類High End野，仲要指定歐洲或英國的High End餐廳先可以來投標。中環當然唔缺高消費餐廳，但絕大部份位處冷氣商場或酒店。位於歷史建築裡面的餐廳，少之又少。最近身體抱恙的Sir David Tang在舊中銀大廈有間China Club，裡面裝潢就Fusion 古典民國年代同所謂後現代風格。有人覺得正，亦有人覺得不倫不類。但重點係Members only，普羅市民唔會藉就唔好意思，無你份。
咁如果Pedder Building畢打行政府收來做餐廳，一定要Restore返最古典裝潢，而且要Open to public。當然，High end野一定貴，而且貴得來仲好難有Booking。但起碼，普羅市民儲落幾千蚊，想要食餐好慶祝下一些特別日子，都可以有個真正有歷史感的場所 (Establishment)食一餐難忘的晚餐。
Credit: The Little White Shoes – 都爹利街
當然，唔止係畢打行食西餐，其實應該都搵D傳統中式建築做唐餐茶樓。香港，就係缺乏呢D歷史感的生活，係完全無，有錢都無得感受，呢個就真係幾大問題。
SJ結語
以上一切，如果可以成真，大家快樂指數應該都高好多。
如果你可以話事，又會點規劃中環？
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
