今日係大年初一，你姨媽姑姐約好咗今日會嚟你屋企拜年。你換咗件新衫，嚴陣以待。
時間尚早，你攤咗喺張梳化，喺新年全盒摸吓摸吓，終於摸到一粒金莎，正當你準備拆開呢粒由「天神準備賜俾凡間嘅禮物」嘅時候……
「叮噹！」一打開門，原來你嘅姨媽姑姐早咗半個鐘嚟到。
「恭喜發財！」
「我真係恭喜你呀，大家咁話！」你秒速chok出你嘅招牌笑容。
「心女！好耐無見呀，呀你最近好似瘦咗又靚咗喎！」
「無呀，邊係呢。」
姨媽姑姐嘅聲音如雷貫耳，情況有如長洲缺堤，一發不可收拾。
做過sales都知，喺做入職訓練嗰時，其中一部分就係要熟讀客人FAQ，以應付大部分客人嘅日常提問。秉持呢個原則，為咗令大家對答得體而又不失霸氣，特意準備以下FAQ，讓大家作答時以統一口徑。
【公司秘書FAQ】
問題一：心女╱阿明，你而家做緊乜？
不要說：我做乜又關你乜事呀？咁鍾意問，去搵神婆問米咪知囉！
試著說：阿姨，我而家做緊公司秘書呀。
à解說：簡單回答目的係用嚟刺探敵方虛實，放心，99.9%嘅親戚都唔知你其實係做緊乜嘢工作，如果佢無再追問，咁大家可以收工㗎啦。
問題二：公司秘書？咪即係秘書！╱公司秘書？即係做乜㗎？╱乜有男人做秘書㗎？
不要說：你個女做夜總會PR㗎？成日著到成隻雀咁嘅？╱公司秘書？即係做乜㗎？講你都唔明，你不如唔用再問啦，呢到有啲陸金記瓜子呀，食啦你，把口咁得閒。╱係公司秘書，唔係秘書呀，你係咪聽唔明中文呀？
試著說：阿姨，公司秘書同一般秘書係唔同嘅。公司秘書呢，係屬於法律及合規
行業，簡單啲嚟講，公司秘書就係照顧一間公司嘅護士，負責照顧一間公司嘅「生─老─病─死」。
à解說：盡量以30秒內，即elevator pitch嘅形式簡單解釋Com Sec嘅工作。
問題二follow-up：生老病死？即係點樣㗎？
回答：「生」即係開立一間新公司、「老」即係，好似你每年要交稅咁，一間公司每年都有佢地喺法律上嘅義務要遵守、「病」即係一間公司嘅不常規工作，例如委任公司董事、股份轉讓等等、「死」即係摺埋一間公司。
à解說：當親戚就你嘅答案作出追問，代表你已經成功反客為主。善用比喻，以行外人角度解釋自己嘅工作，減少世人對呢行嘅偏見，功德無量。
問題二follow-up：公司嘅護士？有護士，咁有無醫生㗎？
回答：啱呀，有護士，緊係有醫生啦。有時候，公司秘書嘅日常工作需要與事務律師合作。有行內人形容公司秘書同埋律師，係護士與醫生嘅關係，公司秘書負責大量公司於法律層面要遵守嘅年度合規事宜，而律師就個別公司特殊狀況，主導較為複雜嘅公司內部交易等等，而公司秘書則從旁協助。
à解說：與上一題類同。
問題三：公司秘書我都有聽過吓，係咪幫人開公司果啲呀？我有個親戚搞緊生意，大家咁熟，咁遲啲搵你幫手開番間公司啦！
不要說：聽講你個女做大狗銀行，可唔可以佢過幾皮野落我戶口過我洗呀？
試著說：我哋都要跟公司政策做嘢嘅，如果你有親戚想開公司，你可以試吓上網搵吓唔同嘅會計師樓喎。
à解說：除非你嘅職位接Com Sec job係有commission收，如無必要，都唔好同親戚有生意上來往〈多數親戚都喜歡恃熟賣熟，R著數〉，以免有不必要嘅爭執。
問題四：聽你呀媽講你喺呀老實地產做喎，有無內幕消息呀？你哋公司呢排升好多喎。
不要說：我呢排搵緊工喎，你個仔咪做HR嘅，可唔可以叫佢俾堆履歷表嚟參考吓呀？
試著說：唔好意思呀，公司嘅業務我唔方便評論呀。呀，不如講吓表哥最近點樣呀，聽講佢最近入咗間大公司做。
à解說：各個行業有自己嘅操守準則，作為專業嘅Com Sec，係資料未公開的情況下，唔可以輕易向任何人透露任何敏感資訊。親戚咁鍾意問長問短，好多時候都係因為想用你同自己仔女做比較，如果係咁嘅情況，一於嚟招乾坤大挪移，俾個機會佢哋show off啦。
如果親戚有其他詳細問題，請自行發揮。
真心對你做嘅行業有興趣嘅親戚，你可以嘗試花少少時間解釋俾佢哋聽，you know who they are。唔係真心想知，純粹無嘢搵嘢講嘅話，你咪係咁以講兩句，打發佢哋走。個場仲有好多其他人俾佢問嘅，係咪？
新年、新年，新嘅一年最緊要和和氣氣，無論鍾唔鍾意俾班親戚問問題，無謂令到氣氛咁尷尬嘛。
Also on SJ: 為何接近30歲的妳 始終都甩不掉「孩子氣」?
SJ 結語
老老實實，小編無幾好遇到親戚真正在意你的工作性質，更多是想試探你撈得有幾掂
大家過年遇到的親戚又係點 “關心” 你地份工？留言話我地知
文章為 SJ 讀者投稿 《如何在狗年向親戚介紹Com Sec做乜而不失霸氣？》，作者 卡比
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
