近年香港人唔開心，已經唔係咩新聞 (香港人「不快樂指數」全球排第七)：從每日打開報紙見到的紛爭與荒謬事，到人工偏低樓價極高的切膚之痛，以及漫天霧霾與路邊的汽車廢氣與二手煙，以至越來越Mean的身邊人與路人。
無論中產定草根，幾個後生仔女聚埋一齊，從星期五晚Happy Hour酒過三巡大家興起「睇下有咩生意好搞」之類的話題，到星期日下午幾杯咖啡落肚後，大家不約而同下結論「真係要移民先得」。
一個有趣的現象是，講得話想去外國生活的人，通常本身無外國護照。而席間有外國護照的朋友，往往對香港狀況不以為然。其中一個原因可能正正因為本身有外國護照的朋友，家底本來就好唔錯，閒閒地幾千萬身家的後盾下，無需太擔心「買樓結婚」之類的龐大洗費。相反，對於無外國護照的朋友，普遍家境較為一般，要買樓結婚，基本上等於連續被業主/地產商同埋酒店/婚宴Providers(如攝影師，場地佈置，Wedding Planners之類) 連環打劫一樣，將多年來儲蓄一Q清袋之餘，更甚係從此欠下30年按揭長債。
Credit：See-ming Lee – Flickr
對於無強勁父幹後盾的年輕人，被「打劫」的Alternative，就係住板間房同裸婚，直到你有一日飛黃騰達為止。但又有幾多人可以承受到如此悲慘生活？
不，原來你仲有一個Alternative，就係可以移民，或者只係一個移民的希望。
要移民固然有錢係王道，投資移民隨時貴過你層香港(偽)豪宅。但係呢個全球一體化世界，假如真的堅決要移民，其實一樣有好多途徑，例如技術移民，或者去讀個Master然後搏留下來工作定居。當然，唔洗錢 (或者唔洗咁多錢) 的代價，就係要用腦用心神，留意同爭取所有相關工作機會。 咁掉轉頭睇，如果要咁辛苦，其實可能同等Effort在香港放在事業上，有更大機會出人頭地。呢個就真係一個個人「價值觀」決定。
咁老老實實，假如你有得移民，你又走唔走先？
呢度以大家最熟悉的移民國度即西方國家做例子，同大家分析下「去」或「留」的Pros and cons。
移民的好處
1. 地方大 獨立屋 + 花園
有睇美劇的朋友，認得呢間屋嗎？
眾所週知，香港樓價全球No.1，基本上你去任何地方，都一定可以住得比香港好。香港人最嚮往的「獨立屋」，正常來講移民後就有得住，平民都負擔得起。
2. 空氣好 環境清幽
香港地方小小有成700萬人，人多車多，路邊廢氣同滿街二手煙，令人辛苦卻又在所難免，鬼叫咁逼人。再加上鄰近地區的空氣污染，日日吸呢d劣質空氣，影響心肺功能，真係同慢性自殺差唔多。
相反，外國好多地方多見樹木少見人，又少高污染工業，空氣清新好多好多。
3. 耳根清靜 壓力無咁大
外國都有Donald Trump，但起碼個社會都唔使好似成日都有就來「玩完」「XX最黑暗的一日」的感覺。 而且，工作而言，外國普遍無香港咁大壓力咁Cut throat。較少OT，較多假期，呢個係外國工作的一大優勢。
4. 換一條新跑道 可能有新機會
呢個只適用於應變能力高的人，以及特別技能例如廚藝。在香港開餐廳好難做，但假如在西方國家開餐廳，成本無咁誇張之餘，做返亞洲菜式又有先天優勢，正如鬼佬在香港開西餐。Run得好隨時變連鎖企業。
再者，外國的職業多樣性，絕對比香港來得多。例如做Lab，香港基本上無得做，最多教書，外國卻是機會處處，從藥廠到工廠，視乎你的專長。
移民的壞處
1. 放棄已有的事業 收入下降
確實，可能你的事業還不怎麼樣，但只要做得幾年野，唔多唔少累積行業人脈及工作經驗等本錢。去外國，基本上從新開始，隨時從低做起。本身在香港事業發展越好，呢個機會成本就越大。你在香港所考的專業牌照，當地好可能唔承認，而且從前在香港一呼百應的Connections，當你在異地開始新生活必須經歷一大段舉目無親的階段。萬事起頭難，就係咁。
值得留意的是：去到外國就唔會有菲傭。
2. 始終有「新移民」FOB 身份
身為第一代移民，始終有唔少限制。所謂FOB即 Fresh off the Boat，即係新移民。無論你英文幾好，即使無種族歧視問題，始終都唔容易100%融入當地主流文化同社區，始終都係徘徊於社會邊緣。
3. 無咗香港的便利
香港方便就係人都知。有人覺得幸福係要住加州的獨立屋，有個泳池養隻拉布拉多，每日過住藍天白雲的生活。亦有人覺得幸福係一落樓就有譚仔食，行遠少少仲有元氣，就算深夜落街都依然大把選擇，而且仲唔使擔心治安。 去得外國，點都要放棄呢種「極端便利」，而且夜晚出街難免要小心人身安全。
4. 重稅
係人都知，外國交稅比香港重好多。但起碼，稅收好多時都可以經其他福利拿返既….好似係。
5. 離開家人朋友
呢個可能係最難克服的問題。始終自己移民都仲唔太難，但自己父母同兄弟姐妹，無論係法律原因定個人選擇，好可能唔少都無可能同你一齊移民遠走他鄉。同自己最親的親人，以及從少就認識的好朋友，從此分隔兩地，呢個肯定會令人好難過，而且並非一個「習慣」就可以解決的問題。
6. 放棄了自己的「家」
Credit: SCMP
對某些人而言，呢個可能最critical：面對困難，我地更應該捍衛自己的家，而唔係輕易棄它而去，不是嗎？
SJ結語
去或留，從來都唔係一個容易的決定。客觀而言的生活質素，其實都無咩西方國家同地區會差得過香港，呢個係各大統計調查都反映咗。但走唔開，更多係個人的牽絆，對香港的不捨，家人朋友的牽掛等。
各位SJ讀者，老老實實，假如有得移民，你又走唔走先？
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
