一個文明社會的陷落，其中一個重要表徵，就係土豪惡棍過著優渥的生活，而斯文彬彬的學者文人則潦倒地生存著 (surviving)。
如果套用在香港，則係「MK仔就開靚車，斯文人就坐地鐵」呢個現象。
只要打開X週刊，唔難發現近年社會上「撈得掂」班友，個個開法拉利出入，名下幾多間上市公司及山頂別墅，其中唔少係黑社會出身。
走在銅鑼灣街頭，在任何僅餘可停車位置，不時泊滿波子，林寶，瑪莎拉蒂，Benz等靚車，只要窺視車內情況，好多時都會打個突：「條友咁MK。」有部分係20幾的MK死飛仔款，其餘則係古惑佬款，頸戴金鍊，裡面深淨色T Shirt，外面西裝褸 ，牙齒略黃。然後，一便落車就周圍目露兇光，掃視附近路人，再點起手上的紅萬香煙。
正如好多舊同學聚會，最串的並非咩Banker或紀律部隊幫辦，反而係以前好似吸過毒仲衰過，而家出返來「做金融」，開口埋口自己點炒現貨金，點樣「自己努力儲一個月錢買隻Rolex Daytona」。
無他的，近年最賺錢的族群，不外乎做澳門賭廳的，收樓收地的，同埋賣倫敦金的。至於真正做實業起家，或做專業類工種而實而不華的，你有見到幾多個真係過住幾好生活？呢個年頭，無論各行各業，看似越古惑，越賺到錢。越老實，越跑得慢，或許，真的nice guys finish last…?
Credit: Internet – to be fair 呢張圖可能斷章取義，但真係好多人Share好Symbolic。
呢個可能就係近年香港的「MK仔就開靚車，斯文人就坐地鐵」現象。
另一邊廂，香港的傳統中產，例如小型行會計師，公司中層經理，以及中小型貿易公司東主等，則面臨收入及生活質素下降的問題，只能勒緊褲頭。因為「轉型都唔知做乜」。
即使並非呢D夕陽行業，就算你做正式小學教師甚至大學講師，收入水平尚算合理，但在百物騰貴的社會下，要好似以前一代人養妻活兒，甚至過體面的中產生活，可謂越來越難。
無他的，過去20年社會變得驚人，除左SJ經常講的全球一體化同科技以外，仲有社會普遍的惡俗化 (vulgarisation)：
相比起社會上有學識有道理的人，我地更嚮往那些財大氣粗的人。
非正式統計，20-35歲族群的香港男性，第一男神可能係洗米華，又賺大錢，又型，又「江湖猛人」，英雄主義的極致莫過如此，確實又真係好屈機。對於一些真正有學識，有理想的知識份子，他們根本連你Attention都得唔到。
據說，2017年香港最悲慘的工種，可能就係有MPhil或phD的大學導師或職員。埋頭苦幹寫Paper，假如在古代，呢D學者的Paper確實會有深遠影響力，因為作為絕無僅有識寫字又可以Publish文章的人，他們完全壟斷左成個社會的發言權。但呢個年頭，Social Media五花八門，人人都係Media，普羅大眾已經唔需要從學者的Papers得到知識。除左其他學者，簡直係Who fuckin’ cares。
Credit: Internet
就算係公認人工起薪高的紀律部隊及公務員，一樣有呢個問題。有一批熱愛傳統制度的公務員，多數老一派，幾十年在繁文縟節與浩瀚的規矩與制度打滾，總算練就一身好武功，並以這套複雜而穩固的制度，以及自己作為一分子為傲，十分投入工作，連放工都會在想點樣可以做得更好，更跟足程序，更可以服務好市民。
另一派公務員，則單純當打份工，任何野推得就推，為了就係自己秘撈的事業，其中有唔少搞埋生意做老闆，開餅店，樂器店，玩具店，酒吧，蒸腳等一應俱全，平時就請個人看舖，放假就自己睇返，甚至叫其他公務員同事幫手或夾份入股。所謂「Slash Career」，呢的公務員簡直表達得淋漓盡致，他們甚至會覺得那些安份守己，投入工作的公務員同事「戇居，反正年年跳Point，唔同你努力做人工會高D咩？梗係自己外面搵D野搞下，賺多D錢最實際。」
Needless to say，後者似乎有越來越多的趨勢，相信有做政府的讀者，唔會對呢個現象陌生。
全世界絕大部分人都熱愛「平等」「自由」等爛漫的概念，而對「階級」及「規矩」等觀念，則自然而言地反感，甚至恨之入骨。
從前的傳統階級社會，高學歷人士如醫生教授等收入同地位高高在上，如今則未必有明顯Correlation。在這個Web 2.0年代 (有人會話4.0都來緊，仲講2.0），無論任何行業，你越「Consumer facing」所得到的Attention以及潛在利潤越大。
例如以前有地位有收入的是報社主編，而家則係有大量粉絲的KOL。
以前係大學教授及中學主任，而家則係補習天王。
以前係醫生，而家係搞醫學美容的生意人。
呢幾個例子當中，除左醫生有固有制度保障，其他都收入及生活質素均有下滑趨勢。
故此，呢個年頭，人人都想做下個李嘉誠，下個馬雲，人人都要做KOL，而無人真係會甘心做一個政府職員或中學老師，只會當係為自己更上一步的踏腳石。
其實呢個現象，唔怪得任何人。人望高處，係人之常情。
但假如個社會，只係容納到Vulgar惡俗的人與行業成功，容納到賣倫敦金而扼阿婆一百萬老本的MK仔買法拉利，或一個中三畢業但出錢打本但搞到個客要截肢的所謂醫學美容開到成街都係，而我地的大學畢業生腳踏實地卻只能原地踏步，
確實係出左個大問題。
在呢套遊戲規則下，更鼓勵大家Hit and run，搵左人笨先算，而非鼓勵大家腳踏實地建立信譽，確實會造就好多好多社會問題。社會怨氣大，呢個都係原因之一，而香港真係唔可以咁落去。
唔係歧視MK仔，但當MK仔唔再開98′ 響喉 Civic，而開Benz S350L同法拉利，會計師卻坐地鐵都覺得肉痛，大家應該真係要睇下發生咩事。
SJ結語
如果係你，你又會點選擇？
a. 做個不惜一切賺錢的人
b. 做個有class的人，寧願賺少的
c. 做個又有Class，又賺到錢的人 (But how? 歡迎留言分享）
**StealJobs優越工作情報網 開通LinkedIn啦! 歡迎邀請自己同朋友關注， 搜尋 StealJobs優越工作情報網**
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
