雖然話香港生活艱難，大學畢業後都難免經歷一段無奈與挫敗時期，但部分比較幸運或努力的人，總能在大概28-32歲之間，一洗剛畢業做「散仔」人工低 + 工時長的頹氣，在事業上從捱打舉步維艱的開局，終於慢慢立足企穩陣腳，繼而昂首邁向頗為Well-to-do的「中產」階層。
SJ團隊綜合了不少人的「散仔」邁向「中產」的8個特徵，睇下大家或身邊人有否類似經歷：
1. 唔少物質上的第一次
Credit: Internet
如果話畢業後會經歷唔少捱苦的第一次例如在公司通頂，人生由「散仔」邁向「中產」會經歷更多物質上的第一次：第一個一百萬，第一張匯豐Premier / 渣打Priority Banking，第一次睇樓，第一次車行試車等等，以及眾多的高檔日本料理與Oyster Bar，和你Afford得起的大量即興旅行。
像陳奕迅一首冷門歌《第一個雅皮士》歌詞：
“第一套 阿曼尼 從此生活更美麗
第一輛 小奔馳 從此有了新目的
第一個 雅皮士 從此城市有了傳奇….
第一瓶 勃艮第 從此生活更美麗
第一場 蘇富比 從此有了新目的
第一個 雅皮士 從此城市有了傳奇
早知一切如此 看我會否開始”
雖然告別18-22的青春歲月，豐裕的物質卻彷彿是一場美麗人生的新開端。
2. 收入突破5-7萬
Credit: Internet
正如紀律部隊的「散仔」人工2萬幾到頂薪4萬左右，而「幫辦」就4萬起跳到7萬左右。假如你在私人市場，人工突破5萬亦係由公司散仔晉升為一個「小經理」的跡象。就算係保險公司如AIA保誠等，近年個個Agent都將自己「MDRT」呢幾隻字寫上卡片，好似驚你唔知佢係Million Dollar Roundtable，據前線Agent口述，實際來講，MDRT資格就係月入4-5萬左右。
收入突破5萬，就係其中一個你唔再係散仔的特徵。
3. 運動次數與體能下滑
收入可能往往同運動次數與體能成反比，起碼 at the lower end係，即月入1-12萬的打工仔。原因係收入及職位越高，責任與壓力往往越大。月入15k的Fresh Grads其中一個有用技能大概係「射波」然後6點即閃人，但當你去到一個小Manager至Senior Manager 級別月入4 – 12萬左右時，你的「射波」技能未必再好似以前咁好用，因為好多時你本人就係個Project實際負責人，你係會落手落腳做野的人裏面最Senior的那一位，當下級做野質素未達標時 (永遠都唔會達標)，你就要負責執屎。
因此，從前日日放工踢足球，慢慢演變為一星期一次，再到一個月一次，通常就係呢個階段。
4. 個個都結婚 唔通個個都想結婚咩
呢個可以話係更加Age Specific：邁進30歲左右，個個都結婚，個個都擺酒。尤其係工作比較體面的朋友，個個都四季酒店香格里拉，唔多唔少都有Peer Pressure。當然，呢個都係幸福的煩惱既。 (首先你要有女/男朋友)
5. 朋友話題圍繞： 買股票 買樓 買車 旅行 食好西
從前對社會不公最憤憤不平的某某，大學讀Social Science，畢業後輾轉做過幾份工，如今做咗AIA「理財顧問」 (即Agent)，據說月入15萬，仲Show張稅單俾你睇，一年交十幾萬稅。從前FB成日Share揭示社會不公的新聞兼超長評論，而家則清一色「正能量」Post自己同「團隊」如何努力奮鬥，協助客戶爭取財務及保險保障，絕口不評論任何「負能量」新聞。呢個例子可能Extreme少少，但其實呢種價值觀轉變比比皆是，分別係你收入未必有15萬姐。
即使比較貼地例子，無論月入過唔過5萬，身邊的朋友話題開始圍繞買股票，買樓，買車，旅行，食好西，裝修等等。咁又係，一班人坐埋，唔講食玩買，唔通講民國歷史同地緣政治咩，頂多講下Trump 訪華會帶挈邊隻港股。 (假如你遇到食玩買以外的知己好友，請好好珍惜)。
6. 你開始Care 所謂財務策劃 同埋 交稅
散仔時期一年交稅可能先一萬幾千甚至更少。當你終於到脫離散仔行列，甚至有幸坐了爆數晉升直升機的話，開始講緊交十萬八萬稅，唔係講笑。你開始研究如何報稅可以俾少d，有咩可以報開支。
除此以外，見到銀行戶口開始有少少閒錢累積，你開始關心咩投資買股票買ETF之類。當然，亦有好多人在呢個時期迷失，訓身炒股而不務正業。
7. 開始有種 Complacency
唔使講都知道，所謂一朝得志語無倫次，可能你都會經理一個時期，以為自己好巴閉，在Armani Prive 同幾個同樣脫離散仔行列的朋友，齊齊係所謂人生勝利組 三十出頭個個月入十萬，一個做Google一個做醫生，最差個都做AO，大家從買樓及裝修開始講起，講到年底去歐洲旅行，甚至笑X那些際遇比較差的舊同學。
雖然有時未必笑得無道理，但一個人的一生，最黑人憎大概係就呢個時期。
8. 你開始發現 自己何其渺小
Credit：See-ming Lee – Flickr
有些人的Complacent階段會一直維持，亦有一些人悟性較高，或本身謙虛，明白社會的「天高地厚」，月入十萬其實都係不外如是。反而係以前散仔階段，會對所謂「(較)高收入」有不切實際幻想，當人工升到一個位，才發現其實本質上都係一樣。當然，月入十萬點都好過一萬，但本質上都係賣自己時間同青春而已。即使單純以錢衡量，當你工作30年平均月入10萬，其實退休時不過3,600萬，連中半山3房都未必買得起。
更何況，錢以外，更加重要係你認同自己人生的路向，認同自己工作有意義及真正價值嗎？SJ早前有位醫生朋友這樣說：「外人以為醫生就一定懸壺濟世，妙手仁心，其實不外乎頭痛醫頭，腳痛醫腳。無論內科定外科，公立定名醫，都不過係醫療系統下的前線Operator，睇你有幾Skillful幾快手做好盤數，好微觀。要真正Live up to 懸壺濟世，宏觀地醫好更多人，起碼要做Public Health 相關，改善成個醫療系統，甚至係做科研。但邊條路好搵？ 唔使買大坑道同供仔女讀Island School咩。 」
其實，你會開始發現，自己何其渺小，呢個亦係Burnout的高峰期，重新尋找人生路向。
SJ結語
初出發那天 盼由樹 變成路
一醒覺 經已殺出 這條路
人情物理 直行直過
若然後遺未清掃 可否盡掃
太意想不到 一切困境 會平定 變成路
犧牲最寶貴那些 也難料到
然後賺了獎項 又想走回頭 改定數
時候不早了 別等到 情懷老
問我初衷 鏗鏘的答 不吞吐
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
