三十歲係一個點樣的概念？
(港)女士的三十而立
對20幾歲的女士而言，尤其係25歲後，可能係充滿恐懼，而又日益接近的一道鴻溝：29+1，代表青春不再，那張「我仲細」而備受Daddy媽咪呵護，以及在蘭桂坊如穿花蝴蝶Clubbing與喝得爛醉的license，如遠東某城市，在某年6月30日晚上的大限一樣，終將成為歷史。往後會發生什麼，生活是否一切如昔的精彩與自由？ 在27歲的「慶生」派對的喧嘩之後，充滿著無盡的不安與一點點Hangover。
雖說呢個年代做女強人都不錯，但心底裡誰不想在20幾歲的美麗年華當一回公主，接受所有親朋戚友的祝福，然後開始一個幸福的小家庭呢？因此，唔少20幾歲女士有一道心理關口：雖然緣分無得強求，也無法強迫眼前那位小男生帶著戒指跪下求婚，但如果有得揀，最好還是30歲前嫁得出。
精英的三十而立
對於男士而言（以及好多Career oriented的年輕女性如是），30歲卻是另外一道心理關口，皆因「三十而立」四個字，具有相當份量，如果擔當不起，容易有一份無形卻又異常沈重的不安感。
邁向30歲的年輕人，視乎學歷，大部分在職場打滾了5-10年不等。首先第一類的年輕人，從小勤奮讀書，入讀名牌大學或神科，出來社會後順利入大銀行，甚至做到AO，醫生律師，大公司MT等。如果找到自己定位，事業上應該by now已經嶄露頭角，月入幾萬到十萬不等。
呢班精英階層，在光鮮亮麗的職業背後，一樣承擔著「而立之年」的沈重壓力及不安感：
「上年業績好，唔代表今年或者下年都咁掂。」—— 驚未來的個人業績倒退，或經濟差時公司一樣無情講。
「我仲有無得向上爬升？定係呢個已經係我個peak？」 —— 擔心自己能力已到頂，以及再衝上去的阻力與競爭，比entry level時強得多，像一支球隊從丙組升到乙組，但要再升到甲組，難度大得多。
面臨三十而立之際，即使你已經月入5-6萬，一樣容易好驚唔夠，皆因成家立室的話，所謂「一闊三大」，開支暴增，分分鐘一樣月月清。而且，誰能保證你下年都有呢份收入呢？經濟好景是否永遠常在？一旦成功買樓，400呎樓月供2-3萬，係過到壓力測試，但都係基於一個假設，就係你收入會維持在同一水平甚至更高。但你又要理解到，公司裁員潮，往往係先裁中層經理，而且呢班人亦會最難搵返同等收入水平的工作。其實都咪話唔驚。
精英類朋友，有時另外一種不安感，就係Question自己人生意義究竟為何：
「我而家做緊呢d野，除左賺錢外，究竟有無意義？」 —— 以SJ觀察，人工越高的精英，越容易出現呢個問題。從banker到律師與醫生，唔少都覺得自己在「 pushing paper」或「好似部機器咁」跟流程看症，好似Eason首《陀飛輪》：
「曾付出幾多心跳，來換取一堆堆的發票。」
將自己有限的人生，來幫大財團或任何願意付診金/律師費的clients去解決他們自身的問題，咁樣快快手，密密做，週而復始，做30-40年到退休，理應幾千萬身家無問題，而且受人敬重，但「咁就一世人」，自己又可會甘心？
三十歲，是否應該讀返個Master加強「Employability」？抑或押注自己創業「大幹一票」？定係去Working Holiday甚至部署移民尋找所謂人生意義？ 呢幾樣，大概係「精英類」朋友三十而立前，最常見的幾種不安感。
平凡類朋友的三十而立
另一邊廂，平凡類朋友面臨的三十而立不安感，更多加一重無奈。
無論係月入依然一萬幾千，甚至係只能做炒散工作的朋友，「三十而立」呢個概念，可謂遙遠而事不關己，正如「買樓」呢回事一樣。在職場打滾幾年，可能重來都無乜大Ambition，也可能當初亦曾經摩拳擦掌，希望大展拳腳，然而可能缺乏際遇，眼高手低，錯失機會，亦可能係半途而廢或三分鐘熱度，結果依然如周柏豪首歌 ：
「幾年來毫無成績 地位未有躍升」
然而，時間一直飛快地過去，初出茅廬的小伙子，那張「我係新人」的通行證已經過期，「我希望來學野」呢個心態已經越來越唔Relevant。
無論係職場定社會，都是那麼殘酷那麼Unforgiving。尚未找到自己定位的話，30歲後，可能情況更嚴峻。「相關工作經驗」你有無？如果無的話，即使你Asking salary唔高，老闆都可能寧願請Fresh Grad，覺得他們更有衝勁，更多新想法。
呢個時候，三十而立的平凡類朋友往往面臨兩道逃生門：
1) 入政府，從紀律部隊到文職。反正，你永遠不會月入三萬，去考紀律部隊吧！
2) 開Gogovan / UBER，或體力勞動如地盤之類
Also on SJ：做地盤 究竟係點樣一回事？
雖然都未必係最理想，但起碼，起碼可能可以賺取一份養到家的收入，好似係。
然後，當初的理想，至今依然無乜成績，或者只能放在一旁了…
SJ結語
邁入三十歲，除非你係極小數好似上面所講，精英到有資格思考自己是否「窮得只剩下錢」，否則都面臨一個極度真實的現象：出來社會後，不進則退。
假如幾年過去，你算係撈得唔錯，你會暗自慶幸自己站得住腳，但同時也會對身邊一些失敗的例子，由衷地有不寒而慄之感：Could have been me.
如果說踏入二十歲，99%人充滿希望與期盼，踏入三十歲時，大概只剩下30%人依然覺得Hopeful。
人生，要真正活得好，談何容易。
三十歲，無論高收入精英定炒散Hea底朋友，不約而同地更覺自己渺小，站在人生或社會面前，我們的存在與幸福感，以至自身的價值與價值觀，其實通通都是如此的Frail，如此的不堪一擊。
唯一的Advice，只能是老土而且Easier said than done的一句：要盡量成為一個強大的好人。
無論國運定命運，往往係生於憂患，死於安樂。要做到居安思危，而且係時刻努力進步，時刻令自己變為一個更成功，更有價值，更仁慈的人，才有可能不枉此生。
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
