好多人想去working holiday，但又唔知究竟當地咩情況。
有鑒於此，以下為讀者向StealJobs.com的投稿：
拿, 首先… 經過左之前幾年既working holiday 熱潮 (無錯已經凍晒喇), 好多人都開始諗認真去澳洲發展, 唔知點解近排突然好多人私訊我問關於移民同工作既野 (係咪香港有咩移民電視節目我唔知?), 而且大都係有家庭或者諗住建立家庭, 想來認真發展、落地生瘡的朋友。
呢的朋友, 想同你地講聲, 唔駛覺得上來我個facebook運吉又唔買野唔好意思, 其實我係樂於分享既, 如果唔係都唔會寫咁多(廢)文啦。不如等我一次過講多少少, 解答下大家疑惑啦 (反正你班茂里都係運吉架喇)。
睇完有野問可以直接上我個專頁hi我, 唔好太大力。
Credit: Internet
迷思1: 如果我 (或者我另一半) 英文唔好, 係咪只可以做洗碗呢?
分享1: 當然唔係啦, 你都可以選擇洗碟既。
講笑。其實真係唔一定, 如果你本身有專長, 例如美術、駕駛、技術 (包括科技或任何工程/建築/維修/落手落腳的工作), 你語言方面係唔需要好top既, 大前題係你要溝通到, 日常生活同日常工作其實用來用去講來講去都係果的, 只要你生活一排慣左本地口音同俗語就可以。
改善方法: 可以上youtube搵的澳洲口音來聽下, 第一步係睇教學短片教單字, 如果完全吸收到無問題就去下一步: 對話。無電視劇(澳劇大多好膠的), 睇下的日常對話, 飲食或者旅遊特輯等都可以。如果你掌握到單字、句子、對話, 咁其實已經無問題架喇。
迷思2: 我英文(自己覺得)OK, 又唔係真係native或者abc, 但係溝通到, 間中可以講下笑, 我可以做office文職嗎?
分享2: 拿, 呢個係土地問題。如果你調番轉頭諗呢, 係香港, 你想入一般公司做個正常文職, 識廣東話係基本 (外資公司高層唔講啦, 果的其實唔係主流), 但公司請唔請你, 主要唔係睇你識唔識廣東話丫嘛, 而係睇你有無能力做果件工作既 (知識、經驗呀乜乜乜)。咁你將呢個情況套番落澳洲, 都係一模一樣架唧, 只係由翡翠台轉左做明珠台咁解。如果你本身係香港都無乜知識經驗呢, 咁你就係亞洲電視台喇。
迷思3: 我想知歧視嚴重嗎?
分享3: 呢個呢, 就未必係膚色問題, 可能係你自己既問題。據非正式統計 (即係我自己同網上三唔識七的人覺得), 歧視華人最勁既, 就係華人囉。曾經有個華人老闆同我講我唔可以去見客, 因為我係華人樣, 的客見到我個樣公司就已經唔會有生意喇 (喂? 我真係咁樣衰?) 佢仲話佢同佢的仔女都係咁講, 就算佢地係係度出世長大既, 澳洲人都會因為你個樣係華人而歧視你。
當然, 呢個只係其中一部份華人既睇法(即係佢自己覺得)。
我自己覺得(又即係另一個非正式統計):
情況1: 如果因為你英文唔好、溝通唔好以致工作表現差, 或者語言無問題但純粹工作表現差, 咁唔係因為你個膚色種族歧視你, 係因為你真係做唔到野丫嘛。
情況2: 如果人地純粹因為你個膚色種族, 即係離遠望到已經唔中意你, 咁就真係歧視。
情況3: 如果近距離望到你先唔中意你既, 都未必關個膚色種族事, 可能純粹係你自己樣衰。
情況4: 如果你響火車上面大便令到人地唔中意你, 咁唔知係唔係歧視你, 但你應該纜片, 或者自己帶著茅廁去搭車。
如果你睇完有問題既, 可以上來facebook專頁問我, 但請唔好問埋的太空泛或者太無準備過既問題。例如呢: “澳洲而家搵工易嗎?”, “有咩好工推介?”呢類。
如果我過左一日都未答你, 有可能係我唔得閒未覆得切, 因為我其實都係一個要食飯既生物來既, 即係包括返工、準備食飯(即係要煮啦)、真係食飯、收拾食完飯、處理專頁同網站、買貨執貨出貨等等, 亦都有可能係你問題太空泛, 或者純粹係你太樣衰。
搵日同大家分享一下其中一個澳洲白領工作既真實情況。
作者簡介: Mr. Roo 係香港人, 不過而家住係澳洲珀斯, 八十後算是第二代working holiday香港人, 現職澳洲銀行、坐房所謂顧問果的茂里 (當然不是葉朗程的級數啦).
由working holiday時既低級打雜, 捱下捱下, 終於捱到而家大企業….. 既低級打雜, 真係除左恭喜之外, 我都唔知講咩好。
唔駛返工就食, 有得煮、有得食, 有分享, 有係香港售賣澳洲特色零食同食玩.
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
