係2017的香港，最能體現香港人獅子山下的「創業精神」的，就係以下呢個場面：
每逢週末，一班朋友難得聚一聚，去食飯再去飲兩杯。SJ相信很多人都親歷過，一個非常普遍的話題，就係 「諗下有咩生意好搞」。
Credit: apple daily
無論係仲讀緊Year 2的大學生，出來工作無耐月入Under 兩萬的Fresh Grads，抑或係月入5-10萬的中環精英，酒過三巡最大的「最大公約數」話題，就係一齊Brainstorm下，睇下創業「有咩好搞」。
通常個話題係咁樣帶入的：
A：香港地樓價咁高，打工又無出路，連做Big 4做到隻狗咁都係一萬幾千，真係無希望。
B：係啊，所謂工字無出頭，真係要創業做生意先得。好似馬雲咁，幾年間由一個月入幾百蚊的英文老師，搖身一變成為億萬富翁，呢個年代一定要創業。
C：我有個朋友辭左份工，開左間專幫留學生補習的補習社，聽講超好賺，一個學生補一個鐘成$1,500。
A，B和C 異口同聲：我地都可以開返間，專補 TOEFL 同埋SAT 果的！每個學生收每堂 $1,500，比返個老師每堂$500，已經賺$xxxxxx…..拿，我地每人夾十萬，每人三分一股份……. A可以專幫人補英文，B幫人補數學，C幫人補Econ……目標係5年上創業板 GEM Board………..(下刪幾個鐘頭的對話)
Credit: Internet
如是者，一個晚上大家豪言壯語，激情萬分，彷如準備革命的勇士。幾個人差不多要滴血為盟，結拜做創業路上的兄弟。從馬雲的故事，講到巴菲特的價值投資策略，講到Groupon如何3年就從零到IPO。把手上的青島啤酒一喝而盡，幾個男人，一直講到凌晨3，4點酒吧都差唔多打烊才罷休。
離開酒吧時，大家約定下星期再傾，期間各自做Research，做下市場研究同睇下邊度搵到Pastpaper 之類，幾個人還為此開了個Whatsapp group，叫做 「Alpha Education (Temporary) 」 ，大家凌晨4點坐緊的士仲燃燒未熄滅的激情：「Great talking to you guys. Let’s do something extraordinary! [大力Emoji x3 ] 」
第二天星期日起身，已經係12點，仲有少少hangover。大家都不約而同Google下尋晚講個business idea，睇下其他人係點做，有幾好賺之類，一見到就send條link去個group到。但其實大家基本上都其他人send的資料都唔會點睇，而熱情亦已經消退90%。
久而久之，個Group越來越唔活躍，說好的「下星期再傾」無限期押後至「遲的大家有時間再傾」。慢慢呢個Group越落越下，甚至被大家完全遺忘。
其實，幾個好朋友，當吹下水係可以，但認真的話，最好真係唔好打算一齊創業。
首先，大家的期望不同，各有需要。創業大方向可能類同，但細節位大家有 irreconcilable differences。雖然話教育「幾時都有得做」，但原來你最終目標係想做全港最大的補習社，但他的目標可能係做全港最大的Mock Exam Materials發行商。結果係，大家創業路上，因誤會而結合，因了解而分開。
其次，講錢真係傷感情。呢個唔使解釋，大家都明白。有人的地方就有紛爭，尤其係錢銀野，更容易有糾紛：邊個出幾錢，邊個又有幾多功勞，呢個係合伙生意永恆的紛爭。因為一盤小生意（大部份時間一蚊都未賺到），搞到朋友都面阻阻，其實最無謂。
最後，亦可能係最重要，就係千萬唔好有種「為創業而創業」的人有我有心態。唔止係創業，其實做好多野都係，單純地見到人地做呢樣野好似幾好，自己又想照抄，其實通常唔會有好結果。要Brainstorm出來的Idea，大部份時間並非真正解決問題而有商業價值的Idea，亦未必係你自己所擅長的事，只係一種「人地好賺，我又想分一杯羹」的心態，卻不知道人地點解成功的底藴。其實咁樣創業，又只會係晒時間晒錢。
所以呢，SJ奉勸香港市民：朋友聚會，唔好再Brainstorm創業「有咩好搞」啦。當講下笑，學術討論都仲可以，但呢種討論，往往係 「認真你便輸了」。
SJ結語
其實，除左以上的理由，仲有呢個原因：無話咩生意特別好搞，最主要係你自己做唔做得來。
乜生意都有人做得好成功，亦有人會失敗，行行出狀元，一切視乎你自己的天份與奮鬥而已。
要創業，了解市場之前，首先必須了解自己：你做咩做得好？呢個問題99%會Brainstorm創業的人都會完全錯過左，但其實至為重要。
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
