「朋友 我當你一秒朋友 朋友 我當你一世朋友
奇怪過去再不堪回首 懷緬時時其實還有」
SJ認為，陳奕迅的《最佳損友》大概係香港近15年，講「友誼」而最Symbolic的一首流行歌。
通常，我地講友誼，焦點往往放在友誼美麗的一面：從監獄風雲的《友誼之光》到古巨基的《友共情》，朋友就係那個永遠都支持你的好兄弟/好姊妹。而且，以前係，而家係，將來都係 Best Friends Forever。
大家視之為忌諱(Taboo)的，就係「友誼」縱然光輝可貴，卻有失敗及結束的時候，而且往往比我地所希望的多好多 – the failure of friendships。而呢個Topic，正正由《最佳損友》一首4分鐘的歌完全壟斷，不得不佩服黃偉文的功力。
無論我地幾希望友誼永固都好，其實友誼，並非如我們所想的那麼牢固。而友誼之光固然令我地鼓舞同激動，但最佳損友卻有能耐令我地崩潰。正如當年有本小說書名：「支撐你的，往往也是讓你崩潰的。」
友誼：有始，也有終。
兩個人，通常都係大家共同經歷一個階段，大家之間有互動有交流，如果傾得來，慢慢相信對方，而互相透露自己的經歷甚至秘密，久而久之成為好朋友。
例如，中學時期，大家都係Form 1仔，在中學陌生環境裡，你地被編為1D班。某日中午Lunchtime，你地在小食部剛好坐在一起搭檯。原來，你地都覺得個外號「肥張」的訓導主任好騎呢，在短短45分鐘，你地一邊食飯盒，一邊交換對呢個「肥張」的中學雞式笑話及花名，嘻嘻哈哈後大家一齊返回課室。
第二日，你地主動相約對方食Lunch，繼續傾學校發生的一切搞笑野，以及無咁搞笑的話題。慢慢，你地每日食Lunch變坐習慣，每日「as of right」找對方食飯，完全唔使約。
後來，你地其中一個開始打籃球，另外一個雖然本身對運動無乜特別興趣，但好快你都開始打起籃球來。
幾年轉眼過去，打籃球變左你地的No.1 共同興趣，亦共同話題：從NBA的動態到自己打籃球的走位與技術，放個暑假，兩個男仔竟然可以晚晚傾電話，分分鐘父母仲以為你地搞Gay。
雖然你地都入唔到校隊，你地終於都組埋隊，立志在外面的私人League贏返個盃，你地有埋共同目標。
呢個，就係友誼的開始。
後來，會考過後，你考到26分，轉左去恆商；他失手了，未能原校升中六，轉左去一間好遠的中學Repeat會考。
你用盡畢生的氣力與運氣去準備A-level，而恆商的人個個都好似各懷鬼胎，而大家都清楚知道，呢個並非識朋友的地方，亦唔係識朋友的時候；
而他對讀書越來越無興趣，但反而對任何其他野興趣多多，據說去到新學校好受歡迎，識左好多朋友。
你地依然會定期傾電話，各自講下自己新環境的近況。但慢慢有種「你有你講 佢有佢講」的感覺。
A-level放榜後，你的辛勤無白費到，順利升讀港大讀E&F，而他則拒絕了IVE，決定出來做野。
在薄扶林大學，一切都是那麼新鮮，從各個Hall到圖書館，到Centennial Campus，以及來自世界各地的同學。你在電話與短訊對你的Best Friend如數家珍。電話聽筒的另一邊卻無幾多興高采烈的回應，只得幾聲「哦」。而他雖然只係做連鎖咖啡店收銀，也總算在工作話頭醒尾，好快就在舖頭獨當一面。
Credit: aznpr7de IG
後來，你在薄扶林大學認識了一班新朋友，齊齊搏盡讀書打波食糖水，而他則輾轉做幾份工，據說老闆都好睇得起佢。慢慢，你地來往越來越少，大家各有各忙，「你有你的生活，我繼續我的忙碌。」
呢種友誼，進入一種Dormant狀態。從前日日見面，唔見面都要傾電話，有咩大事小事第一個就會搵對方傾，甚至曾經，你以為對方係全世界最了解你的男人，你以為友誼永固。「世界無論點變，我地的友誼以後都係咁。」再球場上，大家係出生入死的戰友，星期六放假時，你們在街場組隊打3 on 3，可以由下午3點打到夜晚10點，然後再一齊食飯食糖水，吹水嘻嘻哈哈講不完的話題，到凌晨未班車放肯罷休。
鏡頭一轉，時光確實飛逝。到左幾年後的而家，大家一年可能就只會見2-3次面。大家生活與工作的Relevance越來越低，即使見面食飯聚舊，其實除左以前的事，基本上都無咩好講，大家都暗地裏好努力地嘗試阻止Dead air的發生，未到11點，大家已經打晒呵欠。
「我過去那死黨，早晚共對；各也紮職以後，沒法暢聚。而終於相約到，但無言共對，疏淡如水。」
雖然如此，你依然好堅持你地係Best Friend。在你心目中，對方依然係佔有重要席位，雖然未必好似以前咁多野講，但你地肯定係永遠的Best Friend。但其實，基於你的觀察，你心底裡同時知道，對方早已將你剔出好兄弟之列，據說仲對你諸多不滿，從你入大學的時期已經開始唔Gur：「知你巴閉啦，高材生。講咁多港大乜乜乜，想潤我讀書差定點。」
然後你猛然發現，近年的聚會以及僅餘的Whatsapp對話(電話已經絕跡)，都係你提出的。然後你又發現，假如你唔約，其實對方可以幾年都唔搵你，而自己與新朋友一樣過得精彩，從其FB Newsfeed不間斷的大群人唱K飲酒大合照可見一斑。
你才感受到，你的Best Friend已經不需要你時，是有多麼的難受。
或許，真係 「卻沒人像你讓我，眼淚背著流，嚴重似情侶講分手。」
友誼的無常 或許是常態
年輕的時候，真係覺得友誼一定永固。但當你出來社會一段時間，甚至到中年時，其實對所有野 包括友誼 已經有種「無常」的了解。天下無不散之筵席，再華麗再好玩的一個Party也不過是人生的一瞬間。暑假在香港一片郊野，幾個朋友如此燃燒青春的露營，夜晚在帳幕，播著音樂聊到深夜的Intellectual conversation，其實也可一不可再。「No man walks on the same bridge twice. For the man is not the same man, and the bridge is not the same bridge.」
Credit: Internet
再耀眼的煙花，也會隨著記憶落下。
友誼也一樣：隨年月過去，許多友誼一樣經歷分手、反面、或者係最淡然的慢慢淡掉。這是不能避免的。
友誼：擁有時珍惜，失去了就放手
當你的好朋友已經不再需要你時，究竟應該點樣應對呢？友誼的逝去，我地好容易會憤怒，失望，然後覺得傷心難過。呢個亦係無可避免的，除非你本身就唔Care對方，咁呢個亦唔係咩友誼。
但要在失落的低谷走出來，繼續Move on向前行，我地必須學懂「接受」。友誼係一件美好的事：世界上最美好的感覺之一，大概就係同投契的好朋友相聚，暢所欲言。但友誼會來，有時亦會走。假如你已經付出努力，嘗試維繫Best Friend的友誼，依然看著這份情誼慢慢溜走，你得用平常心接受呢個事實，而並非無止境的怪責對方或自責做得不夠好。
Credit: Internet
更重要的是，珍惜現有的友誼，自己嘗試做得更加好。畢竟，或者有一日那些已經疏遠冷淡的朋友，因情況改變，亦會再有友誼的續集。始終，你的快樂其實更大是來自自己主觀的心態：嘗試做個寬容的人，可能就係最佳的對策。
「路途上已沒有那位他 給你共勉
當奮鬥失去價值時
成長逃離伊甸 閃星星 已流逝悄悄
瀟瀟灑灑 繼續譜寫你故事」
SJ結語
致 那些令人惋惜已經遠走的友誼。Perhaps it’s time to move on…
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
