「神科」畢業後10年人生 不過如此

畢業後,你第一次真正踏足中環的寫字樓。從前活動範圍只限於觀塘,旺角與大埔的你,今日終於第一日在中環返工。

推開玻璃門,繼1年前Summer Internship後,第一次走入呢個Office。 Reception既Modern又Grand,上面寫住間公司名,簡直係所有同學係大學幾年魂牽夢繞的其中一個Brand name,個個都想入呢間公司(以及同級果堆):英/美/瑞士跨國公司,稱得上行內Tier 1級數,而且間公司在StealJobs.com個Rating都好高,人工高又做得開心。

你終於衝出觀塘與旺角。由今日開始,你屬於中環,而且位處於花園道至畢打街一帶的英資頂級寫字樓。

相比你其他朋友,你確實係「跑贏大市」。大部份同學仲Struggle緊搵工,有的Hea底朋友仲去左working holiday,但你已經開始工作,仲要係一間頗為Prestigious的MNC公司,出入中環金鐘。有少數朋友走去做所謂Startup,有人寫App有人搞網站,你內心暗忖他們不設實際:「乜都假,最緊要人工高,大公司,創業果的野都係儲多幾年經驗先算。」

在一個望到維港海景的大Conference room裡面,所有其他同一個batch的 MT坐埋一齊,總數有十幾個人。個個睇起來都好Nice面帶笑容,你暗自盤算邊幾個似乎最Smart,而邊個會玩辦公室政治。  雖然話唔好以貌取人,但又好似真係有樣睇。

HR同Management出來同大家做個簡短Induction後,大家被分配到不同部門同團隊。 正如當年某太空人飛上太空後非常老土的一句 「我感覺良好」,you feel good。

人生的康莊大道,正式開始了…

Credit: Internet

Credit: Internet

1. 現實的滋味:你只係Fair / Average

第一個月尾出糧,睇住個銀行戶口多左HKD32,000,呢一刻你的心情好激動。你想想自己的父親,辛勤工作幾十年,而家先月入兩萬多少少;再看看同期的朋友,以及中學的同學,大部份一萬多少少,部分更加未有工做。你暗自慶幸,甚至覺得有點驕傲,覺得自己 “ I’ve finally made it.”

然後再過一段時間,終於捱過第一年,你已經習慣左OT同Weekend返公司做野。當初第一次出糧時的激動已不復再,因為你身邊的人都係咁高咁大,已經無乜大不了。然而,在年尾的 Appraisal,你的評價只係6/10,屬於Fair的水平。你的Supervisor坐低同你傾,講咗好多好聽的說話,鼓勵你來年繼續努力。但一直以來讀書名列前茅的你,對自己工作只屬「Fair」這個事實久久不能自已。

後來,你發現那個扮X晒野的同事,竟然拿到極高評分,據說公司甚至已經內定她為Fast Track員工要重點栽培。你憤怒,不解,但只能Get on with it.

 

2. 攀比 - 無盡的比較

做左2年野,你開始了解到公司同呢個行業究竟係點運作,個Business model究竟係點賺錢,咩野先Sell到出去,真正價值係邊,有咩Cheap招,以及咩人先上到位。至少,你覺得自己了解。

然後,你再睇下身邊的朋友,以及果的幾年都無點講過野,但Facebook又Add左的一些大學同學甚至O camp之後無講過任何野的「內地生」同學。間唔中,你就會上下他們的Facebook,IG,甚至Linkedin。其實都唔係話想Stalk人,但只係八卦。係人都八卦架啦。

 

你才發現,個個都好似「撈得好掂」。有個做Goldman Sachs的 (Year 1 之後都無講過野,為人串到Hihi),個個星期都有大量一大班人Party的相,有時又Post係IG 果的咩車會的相:幾十架顏色鮮豔的波子,法拉利,林寶,麥拿倫等超級跑車,個個星期日齊集尖沙嘴,出發到西貢巡遊一樣。另外又有幾個,讀Law同Econ的,據說做咩Corporate Finance之類同做McKinsey,則一年幾次Post 倫敦,紐約等的Business Class 機票加Check in 係五星級酒店。

即使係考紀律部隊督察果幾個,成個Hall 最中意打籃球,又最憎讀書果幾個。如今都一年最少5次去日本韓國台灣泰國「Weekend Getaway」,服務市民服務到好似環遊世界一樣。你不禁暗忖:究竟佢地係錢多,定係假期真係咁多?Or both?

 

你心底裡有點不是味兒:你雖然都會一年去2/3次旅行,而且次次飛「因航」,但始終一次Business Class都未坐過,而酒店從來只會Book Hotels.com 「Sort by price」從底數上來果幾間。咩Mandarin Oriental果堆,簡直直接Skip左。

人返工你返工,人地點解咁Glamourous?做Banking及Professional果的人,聽講人工有唔少已經上到月入7萬 + Bonus。但自己依然係3萬中左右。睇來,係時候另覓其他機會了。你開始會覆那些Send Linkedin PM的Headhunt

你告訴自己,係時候自己要跳去更好更Top的公司。你相信,你在現在公司一切的不如意與不順利,屆時都會一掃而空,當你跳到最頂尖的環境,你的事業將會一飛沖天,而且你會做得好開心。你真心相信會的

 

3. 一切都有「代價」

第三年,你終於轉到新公司,規模更大,名氣更響。收到呢間美資公司的Offer那一刻,比你HKALE時拿到 2A2B的成績更加興奮萬分。你相信,來到呢間公司,一切都會唔一樣。美國公司,更加看重能力,而非擦鞋。你相信呢度的文化:Fast paced, results oriented。簡直係為你而設的工作文化與環境。

人工雖然無大躍進,但起碼都升左幾千。而且,HR向你保證會盡快Review你的人工。

然而,新公司蜜月期,在第一日已經結束。Induction session之後,你被安排到其中「一條Team」。你的新Supervisor係個頗Local的香港人,已經比左個超長To-do list你,而絕大部分工作都係極為冗長而沈悶,卻又絕對唔錯得。第一日返工,你放工時間係凌晨4點。「Welcome to XXXXXX & XXXXXXX」,你隔離Team的一個Associate告訴你。

Weekend時的大學同學Gathering,個個都恭喜你加入呢間頂級公司,甚至講笑稱呼你做「X總」,叫你以後多多關照。你心想 「唔通我晚晚凌晨先走又話你知咩」,而且,說好的Salary Review至今還未發生,HR話Management未批。

大學同學之中做Startup果堆,其中有一個做左個App出來,開始有報紙報導。據說全世界用戶有幾十萬,已經有利潤,團隊接近10個人,連Bloomberg都報。你開始在FB Feed見到他們的消息。你在想,他們的人生一定好刺激。分分鐘做到下一個Angry Bird,隨時上埋市。相比打工,呢的先係人生「搏盡」「玩鋪勁」。

但當然,另外果幾個而家依然寂寂無名,應該仲係Home Office。你甚至懷疑,所謂創業,但他們根本連一萬蚊月收入都無。單純以錢銀定論一個人成功與否的話,他們可謂屬於Losers的組別。創業,其實都可以好殘酷,所謂一將功成萬骨枯,或者就係咁解。

你才發現,人生所有野都有代價。高人工但做到隻狗咁但依然係打工仔,定係創業但大起大落?魚與熊掌不能兼得。

Credit: Internet --- Sleepless night in Hong Kong

Credit: Internet — Sleepless night in Hong Kong

4. 上位

第四年。在新公司的兩年又過去。當初的激昂已經燃燒殆盡,你發現其實間間公司都一樣,天下烏鴉一樣黑。

有一日,公司氣氛異常肅穆。原來美國公司總部決定重組,在亞太區競爭過度激烈下,香港公司必須Cut人手。好多熟悉的臉孔都分別被召入HR房,出來後就開始收拾個人物品。

終於,HR約你今日下午4點開個會。你其實都遇見到呢日的來臨,只係無估到會咁快。

你準時入HR Director房,她手上已經有一封信。

你未坐低,她已經開口:「公司想你頂替XX個位,你會升做Senior Associate,Terms寫晒係呢封信度。」

假假地,你已經係屬於Manager Grade了。

 

5. 人生勝利組?

 

你終於得左,終於上位了。至少,你是這樣認為的。    你下意識地 Google了香港人收入中位數,以及統計處各種數據。你發現你已經屬於Top 5%的收入水平。你深信自己已經屬於「人生勝利組」了。你覺得自己簡直係On top of the world,自己完全跑贏大市。

CREDIT: Internet

CREDIT: Internet

除左Vanessa,從佢IG上的相,佢比你去更多旅行,更經常Check in那些超貴的米芝蓮餐廳。你肯定係因為她那個成日開架法拉利周圍走,無所事事的二世祖男朋友。

仲有Sam。但你告訴自己知 Sam係例外,係個Outlier,無得同佢比。據說,他創立的App公司年收入突破了一千萬,融資後個人持有的股份賬面市值突破一億。究竟,身家上億係點樣的概念?對於打工仔來講,哪怕是高收入人士,依然係Beyond imagination。

 

但是,你開始暗地裏都幻想自己,能否有一日都變成好似Sam咁。

Credit: HK01 圖為潮網 Hypebeast.com 上市敲鑼的一刻,何其風光

Credit: HK01
圖為潮網 Hypebeast.com 上市敲鑼的一刻

 

6. 工字無出頭

你開始睇好多Techcrunch同創業相關的文章,甚至係Youtube上面馬雲的訪問片段。你對馬雲十年間,由一個寂寂無聞的英文老師,搖身一變成為科網大亨的傳奇,以及其他林林總總的創業故事,變得非常著迷。

每到Weekend,你同幾個老友聚埋一齊,都係度講「有咩好做」,因為「工字無出頭」:靠份人工永遠都追唔到樓價,永遠都係打工奴隸,講到好似現代的狄更斯小說咁慘。所以,係呢個Web 2.0世代同全球化及AI化世界,一定唔可以坐以待斃,因為根本無Job security,而且你覺得打工真係慘過擔泥,又要受氣又要OT。

雖然,你已經係在座幾個朋友收入最高果一個,但你亦係最熱衷於離開呢個「工資奴隸制度」的一個。

 

正如馬雲所講:「晚上想想千條路,早上起來走原路。」 每日被工作與生活推著走。一年過去,所有創業Idea依然流於Idea階段。但起碼,係呢段時間期間,你的工作收入又增加了不少。你依然意氣風發,但心底裏,你依然有個目標:我打工只是暫時的,只是累積金錢與人脈資本。我遲早會創業,會真正做一番大事,創造一間改變世界的公司。

 

7. 三十而立

雖然你同好友好多個Weekend都係度Brainstorm咩創業Idea,但結果大家對呢件事都係不了了之。可能因為大家都無「Ownership」,個個推來推去。無他的,就算所謂創業成功,你都只係分得1/3。相反,自己份工的前途,則是100%屬於自己的。

結果,你報左HKU一個Part time 的MSc學位,盛惠20萬 - 以你「今時今日」的收入唔算非常肉痛。而且,你相信讀埋呢個Master將來收入可以更高,事業可以更上一層樓。

離開校門後,HKU Dean's List 畢業?其實 Nobody gives a damn

話咁快就接近30歲,FB開始係各種求婚結婚生B posts洗版。你不禁在想:今時今日,窮人係咪唔結婚? 因為幾乎全部人結婚都係四季酒店,香格里拉,Grand Hyatt同洲際,另加歐洲咩Pre-wedding等,部分甚至一球以上埋單。

定抑話係,你身邊的朋友幾乎清一色都係中產以上?的確,你睇一睇,自己FB 上面的,確實個個都係乜師物師,乜Bank物Bank,以及政府AO等。你不禁在想:其他人,究竟去晒邊?

在還沒有想到問題的答案的然後,Just like everyone else,你都踏上呢條康莊大道。

 

8. 畢業後十年

升職,買樓,買車,結婚,生B。假如你際遇不錯的話,呢個基本上就係20尾到30頭幾年的總結。

而且,呢幾年都會係非常非常Chur的幾年。事業上,正如上述,假如際遇不錯的話,你應該係嶄露頭角的階段,會係最Ambitious的「Fit馬」階段,而且事事親力親為依然有心有力。

其他範疇例如成家立室,佔據了你僅餘的時間。從前讀書時日日踢足球的「波牛」,通常就係呢個階段開始邁入成個月都無做過運動的Pre-中佬階段,開始有肚腩。

Credit: anset2000.blogspot.hk

Credit: anset2000.blogspot.hk

通常亦係呢個階段最多思緒:未讀Master的考慮應否讀Master或MBA,應否讀JD轉行做律師,工作壓力太大時,又會考慮應否移民遠走他鄉,過一些簡簡單單的生活,又或者再次想想創業大計。

但呢個階段,你已經「成熟到已多加一份懷疑」,你不再對所有Ideas都那麼雀躍,因為你已經見得夠多,知道咩係應該做,咩係浪費時間。對於很多事,甚至係人,你已經有個自動機制Filter走不太Relevant的,以節省自己非常寶貴的時間。

然而,偶爾同三五知己聚舊,大家講開,都慨嘆「話咁快就畢業十年」。大家都同意踏入社會才十年,話短唔短話長唔長,期間固然有喜有悲,但其實亦可謂歷盡滄桑。

過去十年畫面在腦海閃過,幾多大小決定,至今可有後悔還是無悔? 畢竟,你心底裡亦知道,走到這一步,其實已經不容易。

酒過三巡,你收到一封電郵,是你女兒就讀的國際學校(幼稚園) 發過來的成績單。你才猛然醒覺,人生事業的這一切,其實只是剛剛開始而已。

 

SJ結語

Corporate Slave的人生….!?

人生的路,唔覺唔覺就行左出來。

更多時並非係咩精心規劃,更多係每一個小決定,而造成你現在所處的環境,而現在所處的環境又再逼使你走「合理的下一步」。

十年好快又過去,祝願那些只是Starting out的同學仔及早考慮清楚自己真正的人生目標,自己重奪人生的控制權。

 

 

關注高質內容,讀神科又想入行頂級MNC / Banking / Law Firm? 即時填妥以下表格,SJ將不定時推送獨家行業活動 (絕不SPAM)

* indicates required




StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Tags: , ,

Comments are closed.