2020年，全人類共同見證了一次浩劫式的蝴蝶效應：
無人會估到，因為武漢有條友飲左碗蝙蝠湯，而受本來只屬於蝙蝠體內的病毒感染，然後再一傳十十傳百，成個武漢封鎖，然後成個湖北封鎖，成個中國經濟停頓，然後再被帶到歐洲美國大爆發，成個美國封鎖歐洲所有航班，道指日日跌停版，全球經濟頻臨崩潰，即俗稱的「冚球剷」。
而在香港，據說將會迎來9年來最高失業率。大把人無野做，其中首當其衝的，固然是零售餐飲。
當然，零售餐飲過去食正條水，香港年年7000萬訪港人次，完全唔Sustainable逼爆全香港，咩本地茶餐廳士多仔全部被名店或連鎖食肆逼走。而唔少名店Sales雖然學歷未必高，收入隨時4-5萬，比好多大學畢業生更高。有一個現象，就係「MK仔就開靚車，斯文人就坐地鐵」，正正如此。這是否一種社會不公？確實視乎你觀點與角度，尤其在一個笑貧不笑娼的世界。
然而，無論各行各業，面對一場瘟疫，始終難以獨善其身。即時係大貓匯豐銀行，全球都準備裁員35,000人，即係成個HSBC的15%員工。
Also on SJ: 匯豐銀行 HSBC 各職位收入資料及內幕
如果話2015-2019係全球經濟大牛市Gogogo，係人買樓買股票都幾乎穩賺不賠，人人有工開，人工年年加，呢個音樂椅派對卻在2020年一伊始突然停止。
假如你因此面臨失業或開工不足，與其恐慌，不如停一停想一想，跟以下4個Steps去做，話唔定反而係一個提升自己的機會。
1. 充分休息
呢個係假設過去幾年非常Productive，夙夜匪懈，做到唔停手，身心俱疲。假如有一段時間作為你的 Downtime，稍作休息，其實都不失為一個好時機。當然，稍為休息下，去行下山 (唔好開車去以免做自私鬼)，多陪同家人，有限度地見下朋友，自己睇下書睇下劇 ，一般1個星期起，2個星期止，以免「Dum」懶個身。
SJ無錢收介紹下，振興下真本土旅遊業，有間本地旅行社Walk in Hong Kong，搞好多本土團，捐窿捐嚹介紹香港大街小巷，有部分導賞團更係免費，得閒可以睇睇。
2. 學野
休息夠而又未開始下一份工的話，或工作不足而比較多空閒時間的話，最應該做的一件事就係學野。學野又分兩大類，一係就學對事業大幫助既野，一係就學自己感興趣既野。
例如，無論各行各業，學好英文就幾乎贏左一半。把握呢個空檔學好英文，係一個好機會，令你下一份工來臨時，你完全準備做得更好，出類拔萃。
有時間的，不妨學下自己感興趣的東西，天馬行空任你行，學完好多野，未必即使有用，但可能10年後一次機會大派用場，you never know!
3. 向一些行業前輩/同輩/晚輩取經交流
人越頹，就越唔想見人。當你個個月業績爆數，升值加薪出10個月Bonus，甚或創業開公司甲子登科，感覺大地在你腳下時，全世界都想同你做朋友。
當你仕途失意，生意淡靜，諸事不順時，彷彿想搵個山洞藏身，自我隔離N日唔見人。
然而，人類係群居動物，尤其事業上，就算唔好咁功利話「識人好過識字」，但所謂「三人行必有我師」，同行業前輩取經，同輩晚輩交流下分享行業行情，並互相鼓勵，其實都好有用。
但要避免淪為一個Complain大會。 抱怨邊個都識，怨天尤人其實都無咩用。記住人都係要同D思想正面的人做朋友，否則近朱者赤，自己都變得悲觀消極，咁就大件事。 世界係咁：大市好，唔代表你好，你好，亦唔代表大市好。你自身的付出，肯定比大市對你的影響來得更大。
4. 重新出發搵工
Any time you are ready, 就係重新出發的好時機。
有人失業第二日就Ready，有人係1個月，都係視乎自身環境同心境。
SJ結語
尤其在困難時期，千萬不要看少自己的潛能。每一日，都係一個機會，比你去改善自己，好多的小事，累積起來就係一件大事。做人如是，做生意如是，一段時間的Downtime，隨時係改寫人生或企業命運的機會，不可不察。
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
