在樓價高企的年代，人人都渴望可以賺到更多錢，起碼可以有個地方住，安居樂業，最好仲距離返工地點同家人唔好太遠。
除左更努力工作上進以外，好多人仲會以投資作為達成目標的方法，無論買股票定買樓收租，大家的終極目標都係 「財務自由」。 在香港，教人達成財務自由的網絡作家不計其數，不外乎教人將人工大部分用來買股票，買債券，買基金，買樓，甚至買Bitcoin等等。
其實，所謂 「財務自由」 從來都係一個「相對」 的概念，視乎你自己的要求與期望。唔同人對財務自由的標準唔同，今次SJ就同大家分析下在香港，達成 財務自由的12個階段。即使你成日覺得唔夠錢用，但分分鐘其實你已經係某程度的財務自由，只你一人未發覺！
1. 坐地鐵自由 ： 有份工
Credit: Internet
在眾多交通工具中，最(相對)可靠快捷就係地鐵，無論係北角去中環，定牛頭角出旺角，雖然好可能有巴士路線，但既要日曬雨淋等車，又可能塞車，始終不如地鐵方便。
然而，快捷方便的代價，就係地鐵車費普遍比巴士貴。確實好多人寧願坐巴士節省一個幾毫車費。假如你想都不用想，已經直接行入地鐵站，最低要求係你有份工，其實你已經達成 “坐地鐵自由”。
2. 出街食Lunch自由：人工14k以上
根據非正式統計，人工14k 除左係梁振英口中唔值得有得投票的低端人口以外 (SJ小編當然反對)，仲係中午出街食飯 vs 自己帶飯的分水嶺。 14k以上，比較多人願意出街食飯，呼吸下新鮮空氣而且見下朋友，一樂也。
3. 買iPhone X自由：人工22k以上
成萬蚊買部電話，其實已經成為 “入門級高端人口”，哪怕你無車無樓無男友，一拿部iPhone X出來， 當堂有氣勢走路有風。用華為小米就差好多啦，起碼都 “三叔” (Samsung) 啦。 用一個月一半人工買部iPhone X，從來唔使分期付款咁寒酸，呢個就係22k的財務自由。呢個亦係紀律部隊最初級的起薪點，難怪爭崩頭都要考紀律部隊。
Also on SJ：殘酷現實：你永遠不會月入3萬，去考紀律部隊吧
4. 坐國泰航空自由：人工30k以上
Credit: pointscentric.com
今時今日，“去旅行” 已經係香港人的基本人權，呢項人權載入《基本法》只係時間問題，修改唔到就釋法都得。綜援都要去泰國旅行，並非天方夜譚 (蘋果日報舊聞)。
去旅行，就算失業都要去，Facebook都有個群組叫做 “再窮也要去旅行”。
分別係，月入30k左右為分水嶺，以下的人較多飛廉航，如飛長途則飛轉機航線，皆因機票平好多。 30k以上的較多會直接坐國泰航空（飛Econ姐，圖文不符），始終覺得最可靠，即使貴幾千蚊都在所不惜。呢D就叫 “你值得擁有”。
5. 買車自由：人工40k以上
Credit: 月入三萬的香港人
之前香港有條片 《月入三萬的香港人 (Youtube按此)》 ，講主角努力工作終於月入 「見三」，三萬人工即刻買部寶馬玩下。 當然，現實來講月入3萬買寶馬又真係幾 「進取」，但其實現實都不遠矣。 月入四萬左右，開始多人會心思思買返部車做下Weekend driver，得閒去下新界遊車河，未必買寶馬，但起碼買得起日產。
6. 買新界樓自由：人工 50k以上 / 資產200萬以上
今時今日，買樓簡直係有錢人玩意，連新界樓都閒閒地5-6百萬兩房。因此，好多後生仔女的夢想，都係從與父母同住的市區搬到元朗Yoho之類的新樓，感受下財務自由以外的人身自由。正如天水圍嘉湖山莊林太，開口叫經濟專家食屎面不改容，肯定背後有返個嘉湖山莊單位壯膽，先會咁有「底氣」。結果，到目前為止，確實林太的眼光才是正確的。
呢個階段，大概係絕大部分人最難跨越的一道門檻，係將三姑六婆勢利眼中，高低端人口分隔兩地的高山低谷，一邊就係 “好本事”， 另一邊就係 “餐餐清廢青”。
Also on SJ House: 元朗新時代廣場YOHO Town 好住嗎
7. 出國讀MBA自由：人工70k以上 / 資產300萬以上
假如30歲前月入7萬的人，通常已經堪稱社會上的精英，無論醫生/律師，定Banker / Consultant，甚至係當差，都已經係高級督察(SI)水平。
Also on SJ: HSBC 匯豐銀行 Analyst Salary 收入
人係好犯賤的動物，有個錢在手，又會覺得自己做的野 “無乜意義”，而且發現自己其實同樣不外如是，甚至擔心人生事業可能已經到頂，行人止步，因此容易有 “Post quarter-life crisis”，想尋求人生同事業的突破。 最唔使用腦的選擇就係去讀個Master，其中又以MBA為最貴含金量最高的選擇。正如SJ篇文2018全球MBA排名：Burnout + 一球在手值得考慮 咁講，讀得MBA本身已經係身分象徵了。
讀得外國MBA，學費貴之餘，仲要你本身已經略有所成，先有可能考得入。
到呢個階段，你已經係不折不扣的 「高端人口」。
8. 買市區樓自由：人工80k以上 / 資產500萬以上
對絕大部分居民而言，有層市區樓尤其港島樓，或九龍豪宅區，已經唔係住咁簡單，而係成條命咁緊要。 幾多人兄弟反目，父子分離，不過就為左一層價值幾百萬的市區樓？有層市區樓，在未來外母眼中，隨時可以掩蓋你其他所有不是。假如已經供完，更加係不折不扣的荀盤。 到呢個階段，你更加係香港高端人口的典範。
9. 有樓收租 唔使做正職 自由：租金收入：50k以上 / 資產 3000萬以上
手持幾個物業，從心底裡笑出來….
正如以上已經2條係關於樓，由此可見香港人嗜樓如命，而且亦係環境逼成，好似津巴布韋的麵包都要幾千萬津巴布韋幣一樣，已經係瘋狂水平。
人在香港，假如可以收租度日，絕對係殿堂級的極高榮譽， 相等軍隊裡面的 「少將」級別，或者係古代有領地的貴族地位，由農奴 （租奴）辛勤工作再每月貢獻寶貴的進賬到你的金庫。
在友濟間口耳相傳，你會成為一個傳奇人物。 資產3000萬，係因為自住一層1000萬樓 ，然後有值2000萬的樓可以另外收取每月5萬左右租金。基本上唔使返工，除非係買花戴，而且返工隨時惡過腦細，返工亦唔需要去開會。 假如自己做生意，則可以在毫無個人財政壓力下 「揀客」來做，賺到幾多再Reinvest做大佢都仲得。
10. 上市自由 ： 公司收入2000萬 / 資產1億以上
幾多做生意的人，朝思暮想就係有一日可以在中環港交所敲一敲個上市鑼。咩融資定增加股份Liquidity都其次，反正大部分GEM Board公司融資收益都僅僅夠交上市費用，而且之後貨源歸邊。
最重要係已經達到清朝乾隆皇帝的 「十全武功」地位：敲一敲銅鑼，以後邊個唔識我？
到呢個階段，你已經係一個不折不扣的 「有錢人」， 再唔係咩 「高端人口」 ，因為後者Imply打工仔或者中產，你屬於真正的資產階級及上流社會，係時候去馬會養返隻馬，去Country Club打哥爾夫球，識多D其他大老闆。
11. 買遊艇自由 ： 個人收入2000萬 / 資產2億以上
打完Golf，養過馬，更進一步就係買遊艇，幾千萬都有部靚靚地。但好多GEM老闆其實都不過係Paper rich，大拿拿幾千萬買部一個月用唔到一次的遊艇，仲要請隊Crew同租泊位，其實都好肉痛。
到呢一步買得起遊艇，公司規模好可能已經到主板規模，自己個人資產都2億以上，幾千萬不過係閒錢。除左遊艇外，仲好可能開始有 Julius Baer / UBS / Credit Suisse / GS 等等 「 真 。 Private Banker」 圍住你走，而你亦好可能已經成為港幣 Billionaire 10億富豪。
Also on SJ：某發鈔行Private Bank RM Assistant 收入
12. 上Bloomberg/Forbes自由： 個人資產78億以上
成為美金Billionaire即坐擁港幣78億元身家，代表你已經唔只係一個普通上市公司主席，而係世界級富豪，有機會上Forbes等財富雜誌的封面，成為國際知名人物，好似誠哥一樣 （當然，78億只係入場券姐，距離誠哥太遠了）。 到呢一部步，你已經唔係人，簡直係神了。
SJ結語
財務自由12個階段，你而家到邊一個階段？ 對大部分而而言，第6-8已經係人生成就大完滿，當然亦有部分人要求較低，滿足去下台灣的小確幸，亦有部分人野心勃勃，要名成利就方可罷休，甚至有10億元級的富豪，依然要求仔女必須與更有錢更雄厚的集團的後代交友通婚，渴望家族生意更進一步成為國際企業。
其實，人生匆匆數十年，何必太認真？但求盡力以後無愧于心，每晚訓得安樂，結果重要，但一樣要享受過程。
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
