2022年香港再爆疫情，清零措施影響下，失業率又飆高。
呢個市道好奇怪，好多人搵唔到工，又有好多工搵唔到人做。
今次SJ同大家分析下搵工面試技巧（當然，首先你要有面試），提供4個小Tips，求職者 一旦做到，勢必在面試官心目中加分不少。
有一些十分Obvious (阿媽係女人) 的先講講，例如要熟悉公司業務方向，早15分鐘到達公司，面試時面帶笑容等。
本文將以Office工的面試為目標，以下會講講具體必做4件事，係以「攻心」為本的小技巧：
1. Interview開始時，立即擺陣
一街都係求職者，Interview 要突圍而出，必須顯示200%誠意。
好似打仗咁，首先要擺陣，面試其實都係。 一般求職者，入到Interview 房就咁坐低，兩手Fing Fing，等面試官問問題。
《孫子兵法》都話「凡戰者，以正合，以奇勝」。人準時到，就係「以正合」，最多打個和。當然，面試都遲到就 「我真係恭喜你」。
打仗，要出動「奇兵」先係致勝關鍵。
面試的「奇兵」點擺陣？
首先，自己Print定多份CV，再帶一本簿，一支筆，淡定地全部放上檯面。
唔好睇小呢個動作，人同人溝通其實70%都係非語言的溝通，例如衣著，肢體語言，動作，笑容，聲線等。
效果：你睇落去係個準備充足的人，會預先準備資料，以備不時之需，同埋隨時Ready寫Notes，代表你有誠意聽面試官講乜，唔係聽完就算。
2. 要顯示 “Intellectual Humility”
據Google CEO Sundar Pichai親口講，佢認為求職者有 “Intellectual Humility” 係最重要的因素。
咩意思？ 簡單來講，就係被問及困難問題，唔識就承認，唔好講大話或者亂吹水。
但同時要好Keen咁向面試官了解同嘗試推理答案。
例如：「我唔太清楚呢個問題的答案，手頭上無相關資料，但我估計答案會同XXX事件相關，唔知我咁理解係咪正確？」
一個好的面試官呢個時候會引渡你嘗試將答案推理出來，睇下你跟唔跟到，以及睇你推理技巧，表達能力以及應對能力。
當然啦，Intellectual Humility係體現於複雜問題，如果你連簡單問題都完全唔識，咁就幫唔到你啦。
無 Intellectual Humility的人，往往會亂吹一通。會顯示出求職者鍾意講大話，搵藉口，以及難教。
3. 「你有無咩問題想問我地？」的答案
幾乎每個面試都會以 「你有無咩問題想問我地？」作結。
你應該點答 (問)？
其實呢個環節係十分重要，主導權在你，係比你顯示自己誠意同埋準備功夫的好機會。
低分答案1：「都無咩問題」
代表你無誠意，無好奇心 （不過，都有一些工種Prefer你無好奇心，呢個後話）
低分答案2: 「我想問下人工幾多/AL幾多日/Lunch hour幾耐/ 有咩員工福利？」
而家你已經好有信心有Offer咩？除非你好肯定呢間公司等你來打救，你咁問就顯出有點膚淺。 呢D問題唔係唔問，而係等到有Offer後問同傾。正如你識左個男仔，唔會第一次出街食飯，就問人地將來會比幾多家用你。
高分答案1. ：「我留意到公司網頁主要列出業務A B C D E ，我想了解公司主力發展目標係邊幾項，而公司最看重員工有邊D技能，係特別或者經驗幫到呢D發展目標？」
代表你有做功課了解公司業務，有誠意，同埋想了解公司究竟要咩人。但其實呢個問題，重點係比你帶出下一條問題，畫龍點睛。
高分答案2.：「明白，我自己都有技能X Y Z係特別擅長，唔知係咪符合公司要求？ 而假如我有幸得到Offer的話，在開始工作前，有無D咩我可以提前準備或者訓練，以便我一開始做就可以盡快幫到公司？」
代表你超有誠意，有備而來，運籌帷幄，以及計劃緊自己點先可以最幫到公司。（HR姐姐內心澎拜：公司就係要呢D人！）
4. 面試後當晚Send個Thank You Email
無論你Interview得好唔好，當晚Send個感謝電郵，多謝面試官花時間見你，以及講解公司資料，令你更了解公司同自己係好適合呢分工。
Send埋呢個感謝電郵，立即加10分。
呢個其實近乎係常識，但都好多人唔做，懶！
SJ結語
其實，求職者都係Sell個自己，面試就係一個Sales Pitch，點先可以Sell好自己？
運用以上幾個小技巧，好可能立即加分，值得一試。
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
