香港開埠以來第一隻「惡搞股」毛記葵涌 (1716)今日上市，連個名都惡搞和記黃埔，貫徹玩野本色，全城瘋狂認購。
如無意外，毛記首席廢青林日曦今日個人帳面身家都有4-5億左右。本身讀書麻麻地的腦細，如今財富完美拋離任何高材生中環人，當然包括某位串過佢「間野就黎玩完」的立法會議員。無他的，當你有幸成為精英一員，從25-60歲每月平均月入十五萬，已經好巴閉下，其實你的Lifetime revenue，即退休時一刻，才不過賺了6,300萬。
相反，廢青林日曦40歲未到，帳面身家已經幾億，可以話係一般高學歷中產幾世人都未必賺到的錢。當然，呢到好強調帳面：1. 個人收入始終取決於股息分紅 (據說已份幾千萬) 2. 股價可升可跌，他日假如無心做或者市場競爭激烈，一樣可能轉頭空 3. 要套現難逃公眾法眼。
但點都好，敲到個上市鑼，完美體現香港人典型的「發達」夢想。究竟，天下點解咁多廢青，係得林日曦先咁巴閉？ 定係，廢青只係假象，實際上背後比任何人更加努力？ 今次SJ同萬千股民同毛毛分析。
1. 一早找到自己興趣 ：文字創作
個個都知林日曦讀IVE上唔到大學，就好容易將佢歸類為廢青。其實，讀大學定IVE確實反映16-7歲那年考會考/DSE考生的能力，係一個Snapshot。但成績好壞背後，其實太多因素影響，例如父母的培養/催谷，補習，甚至係當時有否面對家庭壓力等，對該人的整體能力同上進心無Conclusive的指標。
人生漫長，始終要找到自己真正感興趣+做得好的事情，才有可能將呢樣野轉化爲商業世界感興趣的產品/服務。
讀書好的人，往往更容易被環境塑造到「做得好」一些商業世界已經證明存在的事業，踏上(中產式)成功的天梯，但又係咪真正感興趣？
讀書差，則無呢條邁向成功的天梯，頂盡就考下紀律部隊過下安穩生活。
但無論讀書好壞，始終要做齊呢兩樣野。林日曦或者係好好運，好早已經找到自己興趣：文字創作（aka寫野）。同IVE竟然學Mark Zuckerberg讀Harvard咁Dropout，而加入商台打工，做幕後創作，寫下台詞劇本之類，後來仲寫流行歌歌詞，同埋寫報紙專欄，仲出書寫小說。 無論呢D嘢是否做得出色，林日曦已經累積一定經驗，而且係自己感興趣的事業。
光是這一點，可能好多人做到60歲都做唔到, if you still hate going to work on Monday.
Also on SJ：TVMost 毛記電視100毛Account Executive 收入
2. 對「創造」的好奇心
要做任何生意，唔多唔少都要有創造力，要有Creativity，尤其係做創作類好似雜誌同媒體。
即使你只係做貿易或者零售，如何去Market一件貨品，一樣需要極大創意，好似美國的初創DollarShaveClub，就用一條頗搞笑的宣傳片，將產品病毒式傳播到成千上萬的用戶，後來仲被大公司以十億美金收購，其實大部分都係歸功於創意或者創造力。
呢個年代，the ability to build something 呢個能力，可能遠比任何傳統技能重要，相比數理邏輯，甚至文字寫作，「創意」係AI有排都做唔到的。
正如上述，林日曦在商台開始已經未停過「創造」各種作品，寫過容祖兒的流行曲歌詞，發佈作品超過100首歌，又出過散文集同小說。凡此一切，都為後來創辦黑紙鋪路。
2007年，林日曦為小肥的《時光機》填詞。那一年，邊個識林日曦？
3. Keep住做， Keep住諗計/變陣
所謂Work hard work smart，兩者同樣重要。
2009年開始做黑紙，原先做類似文字創作Agency，幫人寫下廣告文文宣之類，一年後開始建立自己「地盤」以《黑紙》之名開辦得一頁紙的雜誌，結果頗受歡迎。 用所謂Startup 俗語，呢個係第一次pivot。
做到2013年，黑紙以外再做埋《100毛》雜誌，多d內容多d廣告，而且更多機會將自家的創作在讀者心中留下印象，有更強用「戶黏性」，呢個係第二次pivot。
然後到2015年，剛剛佔中浪潮告一段落，無線電視即所謂「大台」經常備受批評，林日曦食住個勢，自己推出「毛記電視」，擺明車馬惡搞抽水TVB。無線電視有TV Buddy，毛記電視就有TV Most Buddy。更以「東方昇」「利君牙」等「偽員」抽水無線的正牌新聞主播，結果大受歡迎。
呢個係第三次pivot，亦係林日曦事業一飛沖天的關鍵時刻，皆因食準 1) FB對搞笑影片所能提供的巨大流量 (尤其當年相對原始的Algorithm)， 2) 香港人對TVB的厭倦，但又慣性得到的TVB相關訊息，毛記藉助TVB本身多年的名氣與觀眾的集體回憶，系統化地高質抽水，得到巨大好評與關注。
所以，呢度睇到林日曦同佢團隊有幾堅持，而且又有幾靈活變通。在肥佬黎壹傳媒不惜耗費巨款，嘗試搞台灣電視台而空手而回之際 (仲有王維基的HKTV)，林日曦已經以極低廉成本做咗個網路電視平台，唔止Surive，仲係Thrive。前兩者則已經收檔，損手爛腳。
諗計 諗計 諗計！唔係使錢 使錢 使錢。後者係典型大企業病，以為Set個Budget，請一大堆人返來，就會做到野，其實個個扮工交差就算，當然，好多時連個老闆自己都搞唔清自己做緊乜，只係見到好似有機會就做，呢個在網路年代尤其脫節離地。
4. 面對失敗的態度
毛記電視今日好似好威，主板上市公司。但是否一帆風順？擺明唔係。
今日個個錦上添花，個個都話林日曦點醒，毛記又點成功 (好似StealJobs呢篇文，哈哈)。
但不久之前，大家還記得嗎？ 2016年毛記先係小本搞咗個《分獎典禮》，備受好評，隨即食髓知味，重金打造個《萬千呃Like賀台慶》，book晒場地，搵埋NOW現場直播，所有「偽員」空群出動表演，仲請埋好多真實世界的明星客串做搞笑show。
世事往往係好諷刺，全城期待呢個大Show，個個都話「今晚趕住返去睇萬千呃Like賀台慶」，結果呢個Show又Overrun，節奏拿捏得差，眾多偽員現場表演，無平時錄低剪晒片時咁好笑。第二日，社交網絡上一致惡評，唔係話悶，就話唔好笑，或者好失望。又有好多評論家寫長文，分析點解毛記今次會咁失敗，甚至分析呢個Business Model點解唔Work，毛記只會係「One trick pony」，最多比你威一次咁大把。
結果，林日曦出長文，承認自己不足，將所有責任攬上身，無賴任何人或機構，或者嘗試反擊批評的人，而最後話鋒一轉希望大家繼續關注同批評，係佢做得更好的動力之類。無論係咪扮野都好，呢個答覆即刻拿晒分，大家從批評轉為鼓勵。無他的，除非殺人放火，全世界其實都同情肯承認自己不足的人，更何況呢個Show本身已經60分，好過好多大台節目，不過大家期望係100分咁解。
而且，林日曦呢種正面態度，後來無論對上述的某立法會議員的批評，或者第一次上市申請失效，一樣幫佢轉危為機。
5. 貴人相助
雖然話「識人好過識字」，但又識字，又識人，肯定最屈機，無往而不利。
從填詞時期，林日曦一直累積娛樂圈的人脈，其中佢多次講過最感謝恩師林夕。
雖然林日曦平時木口木面， 但開拍廣告可以經常找來黎明鄭秀文之類的頂級明星登場，除咗有錢又有橋以外，唔多唔少都有平時累積的人脈，才可能在需要時有貴人相助。
6. (暗黑) 合約管理當紅偽人…?
識法律做生意一定有著數，其中尤其係做娛樂事業，好似毛記咁捧紅一班偽人，好似專家Dickson同東方昇。固然毛記管理層肯定都要有一定人格魅力先可以Keep住呢班已經略有名氣的偽人，繼續為公司賺大錢，但除此以外，少不免僱傭合約的法律條款。
到呢一步，都唔使教啦，當然，商業世界無話邊個剝削邊個，從來願者上釣，毛記做得好成功，就係提供咗一個咁好的平台比Dickson佢地一展所長，仲有得攬住女神林嘉欣，邊有得投訴吖，做得不知幾開心！
SJ結語
「林日曦，你好嘢！ 」 從IVE生，搖身一變做上市公司主席，證明了一切都有可能。
致未成功的SJ讀者，大家一齊加油啦！！
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
