“Ek（黃以禮）站在紅磡月台的邊緣，今天駛來的列車如一把刀劈進月台，以禮欲借車廂高速駛過的力量了結一切。他打通了一個電話，拯救自己一顆求死的心。今天，EK以過來人的經歷，為關注青年自殺問題的劇場譜寫主題曲。
「即使生命從來無雙，每一秒都應該給景仰。」這是EK最喜愛的兩句歌詞。生有時，死有時，哭有時，笑有時。他想說，哪管這一秒有多糟：「你嘅唔開心都有意義。想大家去諗下生命嘅每一秒。」”
為圓媽媽期望入讀中大「水泡科」
EK自小鍾情於音樂。EK本打算升大學時修讀音樂，但是喜愛流行曲、組樂團的EK沒有八級樂理，根本不符資格。大學聯招填寫學系志願，頭三甲的選擇，EK把一個願望送給媽媽。在第三志願填上中大的計算機科學作為「水泡科」：「除咗收得低，我兩個表姐都係中大，事業有成。我啊媽話，如果我個仔好似表姐咁就好啦。」最後，EK果真入讀了中大的計算機科學。
曾重考三次感挫敗
「入咗兩個禮拜都冇，我就知呢科唔啱我。」 計算機科學是一門牽涉很多程式編寫的學科，編碼在EK眼中有如外星文，任EK在課堂上如何努力撐著眼皮，也是無法集中精神聽課：「真係好悶，忍唔住會瞓著。就算你幾努力望住啲1、0，同埋a、b、括號都係唔得。乜嘢都聽唔入腦。」他有努力，自修看書，「外星文」終歸沒能變成地球的語言。每逢考試，EK只好強行「死背」過去的考試題目，勉強應付。考試不合格成家常便飯，曾有一個科目EK重讀3次：「F，係咁F。 我望住嗰份卷我係乜都寫唔到，沮喪到。」
在學系內沒有成功感，EK自覺與其他同學格格不入。某次教授在堂上開了一個「Computer Science的笑話」：「全個Lecture hall（演講廳）啲人笑到收唔到聲，好開心，但係我完全聽唔明，我咪扮笑。我望住notes都唔知佢哋笑乜。」
中途退學？害怕履歷「唔好睇」：焗住要向前跑
面對著如此困局，EK曾想過轉系，惟成績好才能申請。那麼，退學好嗎？
EK曾嘗試跟媽媽說，但媽媽仍希望EK能走他表姐的路：「一個做緊律師，一個做緊會計，兩個都喺中環返工，買到樓㗎啦喎就嚟。」媽媽的話似乎不無道理，EK也質疑中途退學的決定：「死啦大學一年，出嚟做得啲咩？寫CV（個人履歷）可以點講？我係大學學士未畢業生？未諗點發展、點生活呢？覺得好煩。唉唔諗，起身繼續返學。」
對於履歷「好唔好睇」，其實EK亦執著要準時畢業：「我係三年制。如果我同人講我讀四年，但係你又係會考，就好介意。」他說，自己就如遊戲「食雞」一樣被逼入絕境，只有眼前路，不能後退：「個圈喺後面係咁收，你焗住要向前跑，唔跑就會吐血。」
現實叫EK「硬著頭皮」，捱至成功畢業就好，他也沒有向身邊的朋友傾訴。然後，一次考試的失意，就引爆了這些堆積已久的負面情緒。
曾生跳軌念頭 媽媽：今晚煲咗你湯
某年期中試的前一晚，EK通宵溫習。「點都刨晒佢，係讀完一次，唔明嘅。衝入去（試場），諗住塞得幾多就寫返出嚟，好似默書咁。」 至少能答上一兩題吧？殘酷的現實是一夜通宵後，他依然沒答上一題。EK收拾文具，交上白卷，離開考場。回家的路上，他開始質問自己：「為咩？點解你要通宵？做咩要入考場？其實你都唔識㗎，都F㗎啦。呢三年做緊啲咩？我呢個人生做緊啲咩？」
站在大學站的月台邊，EK說，列車駛向紅磡方向的彎道有如一把刀劈進月台，剎那間有股跳向車軌的推力。回過神來，列車到站，他打電話給媽媽說：「我好唔開心。」
媽媽說：「你咩都唔好諗，你返嚟先。煮咗飯，今晚煲咗你湯，所以一定要返嚟食。」絕望裡還有家人等著自己，這碗熱湯喚了EK回家。
向家人抒發感受 漩渦中找回曙光
媽媽一打開門，EK就擁抱著媽媽痛哭。那夜，EK終於向家人道出自己的感受，重整自己想法後，才驚覺他過往像把自己困在黑暗的洞穴，而未有發現洞穴石隙透進陽光：「當你將成件事重整、講咗出嚟之後，就會搵到漩渦裡面係有少少曙光係我miss咗嘅。我三年來做過啲咩？你睇我每一日……你會開始數，我起身、刷牙、洗面，唔係啊。我都有睇YouTube、有聽歌、晚去咗夾band。好似又唔係好差。」
此後，EK開始與父母多談自己的想法，表明自己欲朝音樂路發展。父母卻始終不認為音樂製作是門專業，誤以為EK想做歌星，「發明星夢」。他反覺爸爸不知夢想為何物，反問他：「你有甚麼夢想？」爸爸說，他已放棄了自己的夢想，這個家就是他的夢想：「當我好唔開心嘅時候，其實背後係有人為我付出緊，有人仲係攞住個碗湯好想我返屋企飲。老土啲咁講 You are not alone （你並不孤單）。」 父母明白兒子學業的困境，知道他始終鍾情音樂發展，也不再如舊日反對。最後，EK花了5年時間盡力完成大學學位，現時向音樂的路逐漸進發。
Credit: Sony Music / Phil Lam
寫歌勉勵同路人：總會有路行
因為這段經歷，在2016年學童自殺頻頻發生時，EK就寫了《絕處生花》：「想畀佢哋知道，有一首歌係因為有一個人寫，而呢個人同你經歷嘅嘢係好類似。好想話畀呢一班人知有路行。你睇下我，嗱，生勾勾啦，仲寫歌畀你聽添，都幾好聽啊。」
如今，他再為關注青年自殺問題的《鈴蘭》生命教育劇場編寫主題曲《鈴蘭道》，他笑言是一種「情意結」：「曾經有一排有句說話好流行，就係救得一個得一個。我哋希望每個入嚟睇嘅觀眾，或者每個聽到首歌嘅人都可以拎走一啲嘢。 將嗰件事好似種子咁，慢慢發芽、發大，幫得幾多得幾多，做得幾多得幾多。我知道能力唔係話真係好犀利，唔係話去到影響全香港、全世界。 」
Also on SJ：世途險惡 90後如何求生 甚至反敗為勝？
作者：顏寧
SJ 結語
選擇major從來都不是容易的，那時還是17，18歲，對人性、社會、經濟似懂非懂就要作出影響人生的選擇。
雖然很多人都說，讀邊科不一定要做那一科的工作。但我們都不希望兜兜轉轉，花了數年青春和精力在一些自己不enjoy的事情上。人生有幾多個10年？有幾多個你認為你自己能撐起一片天的10年？
文章授權轉載自《香港01》，更多職場創業、新聞娛樂生活資訊，立刻下載App。
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略