SJ相信好多人都經歷過呢個階段：讀大學時，即使係一兩次考試分數稍為高一點，或者成功當選某學會管理層/球隊隊長之類角色，甚至偶爾有機會與某某名人單獨見面傾談社會大事，已經以為自己好把閉，好似站在世界之巔。
18歲，就是氣燄更盛，自信爆澎。
幾年轉眼過去，踏入職場後，無論你係高材生定係莊主，自然感受到社會的震撼教育：話之你咩大學畢業，其實你什麼都不是。曾經的大學生光環（尤其讀名牌大學或神科之類），在社會五光十色的招牌與資本力量下，早已變得黯淡無光。
出來社會做嘢，只係睇你一樣嘢：你創造幾多價值？
「創造幾多價值」，有D人話叫 Value-adding，其實更直接的，可以用以下呢句金句理解：
「唔好怕被人利用。能夠被人利用，代表你依然有利用價值。最怕有一日，你連被利用價值都無了，那才是真正可悲。」
無論你身處任何行業，公司出得1萬-10萬糧比你，原因只有一個，就係你可以幫公司帶來最少2-3倍以上價值。而公司可以出呢份糧比你，亦係因為公司的客戶交出訂單，因為公司可以提供到訂單貨品/服務價錢的價值，而呢個價值及價錢，係完全擊敗市場上其他對手的。
關於Value-adding呢回事，有一個故事可以同大家分享：
香港有好多開鎖匠，一般來說開個鎖盛惠約800大元。一個新仔開鎖匠，開一次鎖可能要花費成個鐘，身水身汗，收費800，而一個老師傅不消5分鐘，已經輕鬆開鎖，同樣收費800。
由此可見，係一個商業社會，「價格」呢回事並不取決於你花幾多時間精力去做嘢，而在於你的End product係咩嘢，值幾多錢。打工其實一樣，當然呢個係Ideally speaking，一間好公司Remunerate員工，主要看重員工表現，而各種職效評估KPI就係希望量化員工表現。相反，員工是否經常OT，並不應該視為主要考慮。
人生想要事業成功，對絕大部分人而言，一世人其實只係要解決兩大問題：
1. 尋找一個突破點，搵到個人的Niche，個人可以創造價值的地方
正如以上例子，一個熟手的開鎖匠，熟悉香港所有常用門鎖，熟悉所有常見的木門與鐵閘的構造，成為呢方面獨當一面的專家。
絕大部分人，其實只需找到如此一個技能或事業突破點，例如你做Compliance的話，你做到成間銀行你最熟所有本地與國際AML法規，以及銀行AML政策與應用，咁你已經可以獨當一面。
相反，如果你甘於在Compliance部門裡面做一個冗員，射波射得就射，最好乜都唔使你做，咁你一世就係咁大，裁員潮第一個就裁你。
2. 將自己的個人價值 Scale up 散播出去，發大來做
假如你係一個出色的開鎖匠，每次賺800，減去成本一個月可能可以賺5-6萬，但呢個已經係你個人產能的極限。
做一個出色的牙醫，日日洗牙補牙，時間精力做到最盡，可能一個月10-20萬Maxed out。
但當你有一範可以話獨當一面時，呢個時候你可以考慮將自己個人價值Scale up，將個人價值散播出去。
當然，呢個係知易行難，分分鐘仲難過上面第一步。
要Scale up個人價值，視乎行業有各種方法。
例如，一個出色的開鎖匠，可以訓練更多徒弟，由自己一個人開鎖，變成一個20人的開鎖集團，假設每個徒弟人工2萬，再另外幫你賺2萬，咁你作為集團老闆就月入40萬。
但呢度有一些好大假設，假如呢D假設唔Work的話，隨時血本無歸：首先，你有無咁多生意？如果呢個月有，你又係咪肯定下個月都係？ 其次，你的徒弟係咪做到嘢？如果佢地好出色，咁你點樣留得住佢地？如果做唔到嘢，又等於幫你倒米。 由此可見，如果一盤生意，靠「人」賺錢，即所謂輕資本，好似地產代理之類生意，好考管人技巧，易學難精。
行另一條路，呢位開鎖匠可以考慮自行研發一種門鎖，可能係密碼定指模，或者研發一種會提你帶鎖匙出街的警報工具，然後大量生產，再每年收系統升級保養費用等，呢個就係行一條產品路線。好處係所謂「Scalable」，好似微軟開發Office 360一樣。產品一經開發後，賣一件同賣一萬件，在營業額增加一萬倍時，成本只會輕微上升。而壞處係，前期研發成本大，時間長，而且產品推出後成功機會難料，如果唔work就浪費了大量時間金錢。
無論如何，你係讀緊大學又好，剛畢業都好，最好盡快了解呢個商業社會基本上係咁樣運作的，而非單純地睇你學歷定付出。當然，呢兩樣嘢一樣好重要，更多係「入場券」呢個問題。
如果問有D咩係「What I wish I knew earlier」，我相信呢個Add value道理與經驗，會係最優先次序之一。
希望大家從中都有啟發。
SJ結語
如果你睇緊呢個Page，單純以年齡分佈估計，相信你好可能仍然在第一點，即係尋找自己的Niche，在發展自己一個獨當一面的技能。
祝願大家努力搵到自己的天賦及興趣所在，並且誠邀大家分享經歷，無論你係未開始，剛開始，苦戰中，抑或已經成功，SJ都非常歡迎大家分享經歷，可以Inspire到更多人。
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
