香港專業人士，甚至全世界專業人士，向來都係兩樣野的代名詞：1)身分象徵 ; 2) 超大壓力。
考取專業資格後，收入比草根階層或者普通白領高一截，雖然收入未必如以前「發三師」年代般離地，但其實都無乜好Complain。出入中環金鐘等寫字樓冷氣房，外界親戚朋友無不為你感到自豪與驕傲。然而風光背後，往往是不成比例的壓力水平。
Also on SJ: 如何成為「月球人」中環名醫？
中環人無論係金融界定律師Auditor，唔計最頂層負責「策略 (吹水)」同埋 「Rainmaking/傾Deal （飲飲食食）」的管理層外，其實大部分人每日每夜奉獻自己18小時，就係同 Word (Lawyer / Surveyor ) , Excel (Banking /Auditor / Surveyor), Powerpoint (Banking / Consultancy) 同埋影印機與釘書機 (Everyone) 打交道。 每個人的最大的產物就係製造一堆又一堆的文件，從而發出幾十萬到幾百萬不等的帳單予尊貴的客戶。
中環五光十色的寫字樓裡面，其實不外乎兩大產業鏈，一樣涉及龐大資本利益，分別係金融同地產。而上述的專業人士與Banker就可謂圍住呢個「資本」每日清晨起聞雞起舞，以自身的1) 高等教育 2) 專業知識 3) 經驗服務資本，換取高昂的服務費用。
本身呢個其實完全無問題，SJ亦唔係好似各大財務自由專家般，日講夜講叫大家要早日離場要做投資者做企業家 (當然，其實99%人都想，不過做唔到姐，呢個後話)。但問題係，專業人士或者普遍「中環人」有個嚴重通病，就係好L Mean，好自私，超級缺乏同理心。
SJ最近同Audit朋友A與律師朋友B傾計，二人不約而同，抱怨自己工作時的「對家」(Counter-party) 如何不合理，如何有意無意刁難。
例如，身為Auditor，身負核數的重任，確保「對家」某Pre-IPO公司的帳目清清楚楚，每條數均有根有據。然而，「被服務」的公司高層，卻經常採取「不合作運動」，要A文件卻亂咁提供B文件，搞到Auditor要浪費時間追回正確文件，而且問多兩問往往公司高層已經唔耐煩，態度極差。
另外律師朋友，亦表示自己打官司時的「對家」律師行經常無理取鬧，在大部分無關爭議的程序事項都不合作，而且信件措辭辛辣，無緣無故又話要投訴到法庭云云，搞到佢每日壓力排山倒海，而且呢種情況只係冰山一角。
好多人覺得，專業人士寫份野，開個會，已經可以收取數以萬計的費用，好似好好賺。但其實背後除左老生常談的燈油火蠟，人工，OT加隨傳隨到，同埋教育與經驗的成本以外，仲有一個重大隱藏成本：受氣。
受客氣，受政府氣，受法庭氣，受電腦氣 (例：重要文件未Save就Hang機），仲要受對家氣。
其實，前四者都相對難以控制，因為始終對方的位置，唔理解你係正常的，所謂「屁股決定腦袋」就係呢個意思。
但大部分「對家」，其實同你都係咁高咁大，亦係各為其主，都係各自在其專業領域內，以勞力與腦力來換取 (卑微的) 專業服務費用。當然，在客戶面前「耀武揚威」亦好重要，可以證明自己存在的價值，但其實抬高自己，大部分情況完全無必要採低人地。
大部分有料而且風山水起的老前輩，其實都明白呢個道理，簡單來講就係君子競賽，在勝敗以外，仲有一個更高的價值觀：Honour。 有時面對缺乏經驗的對家，甚至在無損己方客戶利益之下，暗自指點對方，提攜對方一把讓對方渡過難關。
山水有相逢，風山水起的老前輩，其實都明白呢個簡單道理，唔明的往往都係狐假虎威的小嘍囉而已。
SJ結語
唔好做屎忽鬼，請尊重並珍惜你的對家。
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
