SJ向來認為所謂Slash人生的本質，其實不過酒瓶新酒：唔好俾一份工限制你的潛能，亦唔好俾一個行業限制你的視野。
尤其係20幾歲人，如果唔奔波勞碌其實都難有作為，係唔影響本身正職情況下（例如合約Provisions及工作量），假如朝9晚6後仲有時間，不妨考慮搵一份Part time工作。
首先好處固然係多份收入，視乎你的能力與志向，每個月額外多幾千蚊至幾萬不等，已經差唔多係供層樓的費用。其次，就係你返Part time的時間，令你不能外出消費，在財務健康角度簡直一舉兩得。
咁究竟，邊類Part time 係值得做？有咩值得考量？
1. 首先當然係收入
話錢唔重要，一係個人本身大把錢唔志在，一係佢講大話。唔係話咩都要用錢來衡量，但你付出努力而創造到的價值，往往金額就係最好的反映。
開一更的士據說有 $600- 800，做一更輔警都係 $600-800 左右。
但兩者分別係，你開的士做Part time，收入難以較大幅度遞增，因為隨年資增長，你收取的車資都係一樣。當然，你開熟路了，可能可以推到上$1,000 – $1,200，則是後話。但相反，做輔警，最快3年可以升輔警督察，兼職收入可以較大幅度增長。
至於做地盤雜工，一日據說都係$600左右，仲要面對工傷風險。值得與否，悉隨尊便。
另外，假如你學歷唔錯，溝通技巧高，有耐心教人，做私人補習一個鐘都起碼 $200，假如教到高中生甚至幫人補IB，據說時薪高達 $500- $800，呢個係私人補習個Rate。所以話，知識唔一定改變命運，但起碼你在冷氣房教一個鐘，收入已經等於人地8個鐘屈在車廂裡面。可見商業社會基本供求定律的運作，at its very finest。
仲有教琴，教游水之類，甚至係兼職做本地導遊帶外國旅客行街，都有唔錯收入。
2. 你的興趣係乜
錢以外，確實人生仲有好多嘢。
有咩比搵到錢更好？就係同時好享受呢份工。
例如，香港都有一些滑浪風帆好手，正職係各行各業，兼職做船會或者政府的滑浪風帆教練，時薪一樣幾百蚊，而且可謂寓工作於娛樂，對住一望無際大海，分享自己航行知識，人生一樂也。但呢種Part time，往往要你首先要有教練牌，係要有以年計的經驗，先有可能考取。因此唔係個個人都適合。
而正如以上講到開車，相信都有唔少人熱愛遊車河，雖然開車Part time (的士 / UBER / GOGOVAN等) 收入唔算特別高，但間唔中一邊開住車，接載乘客去唔同地方，一邊聽住自己愛聽的音樂，或者電台節目，其實都可以係舒緩壓力的一種方法，而且仲有錢賺，真係無野好得過咁。
其實，社會上有眾多「教人」呢樣個樣的兼職，大前提係你享受分享相關知識，如果你幫人補英文，最好你真係好熱愛英文，好似Uncle Siu咁，否則好快自己都會厭倦講解Grammar。
3. 「成長性」有幾高
對人生事業長遠規劃而言，呢一點可能係最重要。
你搵的Part time，最好係以上 1, 2 點兼備。
因為，好的Part time，唔止係一時三刻幫你賺少少外快，更多係比你在同一時間，過兩個人生，更容易搵到自己真正感興趣的事業。當然，假如你已經好享受你的正職，則無須顧慮呢點。
但相信大部分人，其實都係一種 Wait and see的態度。大部分人表面上，看似對人生一切掌握在手，實際上心底裡，充滿不安與不確定。
因此，假如Part time可以幫你試水溫，而如果合適的話一步一步建立起根基，摸著石頭過河，其實最Ideal的轉行甚至創業，應該係咁樣開始。
SJ聽說有人，本身做金融相關工作，收入唔算太差，但亦自覺事業見頂，無咩再上升空間，而且工作繁複沈悶。但如此同時，本身對星象命理感興趣的他，竟然開始幫身邊人批命，後來仲開始收錢，然後越做越多客，最終變為全職。
好似呢類Part time事業或者工作，成長性高，有明確的Learning Curve以及晉升前景。每做一次，你累積了經驗及客源，呢D係無形資產而且可以Compound上去，幾年過後，你發現客戶多到做唔晒，就係呢種滋味。
相反，成長性低的Part time，大部分都係無咩Value add的工種，人有你有，無從Stand out，做10年的老師傅同做1年的新仔，本質上無乜分別。
呢兩類Part time分別，不可不察，隨時影響你成個人生路向。
SJ結語
當然，即使失敗了無成績又點？
其實唔使太驚，假如幾年過後都無成績，只不過好似你而家咁姐 😀
你唔會失去咩實質野，但會失去機會。
對某些人而言，機會就係最值錢的。
對某些人而言，呢刻的快樂先係最重要。
鹹魚青菜，各有所好。
重點係，「你」自己想追求乜野？
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
