警告：以下內容有關香港CPA會計師血淚生涯，涉及極不人道對待的直接描述。大學讀Account（例如HKU BBA A&F或中大 Professional Accountancy) 者請有心理準備。另外，請讀 Big 4 Auditor 回應 《絕對不要入行CPA會計師的5個原因》!
Credit: Internet
Also on SJ: Deloitte收入
中和一下Audit 的負能量： Big 4 CPA / Audit 自白: “懷著理想哪怕痛?”
原因1. 食鐘 － 有得做但無糧出
一般如果big 4出一單唔係特別細Job，一條Team基本會有4個人。但基於呢一行turnover好快，好多人會喺peak season走哂，可能走淨兩個人，咁呢兩個人就要搞返同一隻上市公司嘅Audit，但出Job時間係冇因此延長到，結果大家就焗住通頂。
假如隻Job有啲難度，就會放多個初級經理落去，不過由於Manager嘅鐘係貴好多。所以啲細嘅，就算督鐘督唔多（督鐘即係填Time Sheet，紀錄返放工時間），基於隻Job嘅Recovery（即係要回本），所以班細可能分分鐘連OT都charge唔到。
即係你日日做到朝早三、四點，都係同亞視一樣，有汗出冇糧出，業內稱之為「食鐘」，食者，消失也。事實係，督足鐘呢種情況，只有喺柏拉圖理想國入面先見到。
當然亦有啲有良心少少嘅Manager，會留番啲鐘俾同事Charge OT。不過做好人係有代價，事關去到開會時，佢就會俾人質：點解你啲Capacity咁低。
唔好以為升咗做Manager就可以有好日子過，事實係可能仲wok（行內術語，好忙咁解）！如果你係做得嘢嘅Manager，一有大單野，例如IPO或者其他special，總會有老闆拍下膊頭，你就要死左入去做。有啲黑仔嘅Manager，可能幾隻大野喺手，慘在遇到個唔做嘢嘅Senior Manager，嘢又唔做，但係督晒隻Job嘅鐘，分得少少俾個Manager督，結果個Manager又俾人問：點解你啲Capacity咁低。
又有啲情況係，遇著隻Job無咩錢，佢就會逼人零晨12點前收工，逼你坐地鐵，唔使Claim的士錢。問題係，你啲未完成嘅工作就要你拎番屋企做到清晨，然後聽朝8點準時交Working（即係交功課啦）。
原因2. － 凌晨5點放工，訓2個鐘，8點半準時返工
喺2012年嘅1月份，同樣係Big 4嘅德勤（DTT），有Partner（合伙人）喺Office門口貼出張memo，重申一次「公司上班時間係8點半，唔係9點、9點半、10點或10點半」明寸班細返工遲到。
話說一般嚟講，Audit嘅peak season，11點前放工叫「早放」，零晨12點至3點叫「正常」，清晨4點後甚至通頂，你可以話自己好Wok（即係忙咁解）。你可以話食得咸魚抵得渴，但面對管理層吓吓當老奉，扯火都係人之常情。如果你前一晚收5點半，朝早準時8點半返到，即係你只有3粒鐘返屋企連休息。
於是有位同事就忍唔住，貼多張Memo，回敬返呢位Partner，「我哋嘅收工時間係下午5點半，唔係零晨12點、朝早3點或6點。」下款係「謙卑的僕人」。
原因3. 無薪假返工是常識
做Audit嘅，一般都係要一路返工一路考試，咁考試前請No Pay Leave亦係大家慣常做法。咁放假時，大家當然係溫書啦，但個Auditor放完假返工，竟然俾老細鏟到上天，罪名係「唔覆Email」。如事者，呢位小小嘅Auditor，之後每次考試假，唔止要check email、仲要清Q（Queries，即係答老細嘅問題）
最慘係，呢位Auditor可能唔好彩，每次考final前都要出trip，結果要銷假。當本身都已經唔係請好多no pay（大佬無錢呀……），仲要做No Pay工作，已唔係好夠時間溫，再加埋銷假，根本搞唔掂。
後來呢位小小嘅Auditor頂唔住，決定破釜沈舟resign去考試，咁就Pass左。
原因4. 老闆教你 釘書釘的規則
Peak Season為埋數，做到氣咳係必然，但當Partner喺班細做到散晒時，仲提出啲無謂要求，你都咪話唔火滾。有部份Auditor會稱之為「Partner強逼症」。
當一個Auditor做到朝早4、5點時，完成一個二百幾頁嘅File，正當以為交俾Partner就可以帶著疲憊嘅身軀，快快樂樂回家去時，呢位Partner竟然要求你將呢二百幾頁嘅File，每張紙個打窿位，貼上一個小小嘅水泡貼紙。
除左係貼水泡，仲有係釘書釘嘅方向要全部一致（例如全部打橫釘），同埋啲紙入完File，係唔可以有任何一張凸出黎，要好似D書咁要平。唔好忘記，好多時唔係得A4紙，仲有啲係A3嘅文件，你一定要摺到好齊唔係唔收貨。
又或當你Peak Season時，會有Partner行出嚟，命令班細嘅要執乾淨枱面先可以收工。你要知Peak Season時文件多到堆積如山，叫你執枱就等如叫你移走座山。好啦，等你朝早5點執好後收工，9點幾10點返到公司，請再拎返座山出嚟。
所以有時本來個客好哋哋冇乜野，啲料又齊，人又快手，但遇著麻煩嘅Manager或Partner，就令隻job由唔Wok都變到好Wok。（Wok，行內術語，好忙咁解）
原因5. 恐怖Job疊Job
Audit嘅生態係好得意，越做得嘢嘅人就越俾人Wok，佢哋嘅Booking會好Full，不論咩Grade，都係。咁問題就來啦，就係Job疊Job。
好多時，唔係話你完咗一單Job嘅Booking，就完全唔使理，好多嘢都要繼續Follow，例如清Q（Queries，即係答老細嘅問題) 同Account，但與此同時，你又要做新Job嘅Planning。
如果本身個人唔算好標青，你會有idle時間，就可以趁idle執。不過，你越做得嘢，你booking就越full。於是高grade又做得嘅Auditor，同一時間3至5隻job係常態。
唔好忘記，呢位Auditor會係12點打後先收得工，但收工後就要做上述嘅工作，結果做到5點。
當然，你可以話嫌辛苦咪唔好做囉！結果，當啲做得嘢嘅同事，佢哋Wok到盡，就會頂唔順決定「撳掣」，撳掣，唔撈也。
然後啲Job，就會推俾一啲都係好Wok（忙）但未「撳掣」嘅同事，如是者形成一個惡性循環。
（原文經修改轉載自蘋果日報作評論之用，如有問題請電郵本網我們將會盡快處理)
網友評論：
“我在水記的紀錄：一星期三晚在太子做到睇日出…淺睡二小時继續工作…” – Anonymous 23.2.2015
SJ結語
天之驕子HKU中大畢業，幾輪interview 又written tests 幾十人爭1個位考入Big 4
但入行的時薪好可能仲低過最低工資
慘過做富士康啊大佬，富士康OT都可以補水，都可以搞個工會暴動下
做Audit 表面上個個著住套平價西裝扮野，出入Landmark 太子大廈外人以為感覺良好
實際上慘過大陸d煤礦工
呢個世界公平咩？ 呢個世界公平咩？！
歡迎各Big 4 苦主或會計Audit同行在本文下留言分享辛酸，或電郵至 stealjobs.com@gmail.com 匿名分享 （Big 4呢排風頭火勢，風聲鶴唳啊，大佬）
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
Pingback: Big 4 CPA / Audit 自白: “懷著理想哪怕痛?” | StealJobs.com