2017-2019年，從中環OL或Trainees，到一眾老闆級人馬，只要有幾分「國際視野」的香港人，開口埋口就係神級美劇《Game of Thrones》，落毒到如癡如醉。無他的，呢套劇連奧巴馬同FB教主Mark Zuckerberg都為之瘋狂，據說連大貿易戰如火如荼的習大大都係Fan屎。《Game of Thrones》在全世界聲勢之浩大，可謂比幾年前的神劇《Breaking Bad》有過之而無不及。
SJ繼續本住吹水當祕笈的精神，今次講下從Game of Thrones領略左乜野人生道理。而其實呢D人生道理，亦係我地日常息息相關。
(大陸D content farms唔該唔好偷文啦，SJ唔想成日震驚十三億人。)
1. 人生就是不停的「疑難排解」： Problem solving
Game of Thrones公認多角色，而且每個主要角色都由自己視角主導，亦係呢套劇引人入勝之處。但目不暇給，初睇真係好難分清邊個先係主角。
但只要睇左一段時間，唔難發現其實故事就3個主要勢力主線：龍家，獅家，同狼家，就好似三國演義一樣。
龍家主角正正係迷倒全世界宅男的「Mother of Dragons」Daenerys －－因其育有三條飛龍，香港人喜稱其「龍老母」。龍老母一開始就生於憂患，本身為國王之女，但老豆被推翻兼刺殺，從此流離浪蕩。後來仲不情願地被親大佬賣比草原遊牧民族的首領做老婆。以異族人身份，一步一步學好遊牧民族的語言，贏取他們的尊重，並且成功孵化飛龍，在首領意外身亡後，成功做埋族人的Leader。
後來龍老母以有限資源，雖然多次身陷險境，但最終去到邊就統治到邊，不廢一兵一卒，全憑其智慧：主要係疑難排解本領 (Problem solving skills)，從零建立起一股龐大勢力。
獅家 (Lannister) 的矮仔 Tyrion，以及狼家的私生子 Jon Snow都係，同樣地係「逆境波」解決困難問題的高手： Tyrion 多次被自己家族判死，而且本身係個侏儒，手無搏雞之力，卻總有辦法逃出生天，後來逃到龍老母勢力範圍，投靠龍老母做埋相當於首相角色，權傾朝野。
而狼家 (Stark) 的私生子 Jon Snow，雖出身北方望族 House of Stark，但亦係背負著私生子 (bastard)的不光彩身份，乾脆自願發配邊疆，做邊境的「Night Watchers」，從低做起，卻憑著智勇相全，以及其公認高尚的品格，與幾千年來侵擾Westeros大陸的外族野人部落達成和平停火共識，亦從無名小卒扶搖直上，成為Night Watchers部隊的總司令「Lord Commander」,以及「北境之王」King in the North。
SJ點評：一個人要成功，「逆境智商」可能其實係最重要：一個人的解決問題的能力有幾高，就直接決定他的成就有幾高。
2. 「理念」的感召力 極Contagious
用錢可以收買幾十個人為你服務，但「理念」卻可以驅動成千上萬的人為你犧牲。
最好例子正正係龍老母Dany，沒有之一。
龍老母的Setting簡直係「革命家」的極致，周圍宣布解放奴隸，叫所有「不願做奴隸的人們」跟隨她，話要還政於民，差在未叫大家打土豪分田地。靠一把口，不停宣傳理念，而有成千上萬的跟隨者，頗有國父「大炮孫」的影子。
結果，正如以上所講，龍老母可能係Game of Thrones唯一唔使點犧牲士兵，就可以攻城略地的勢力，正正因為去到邊都同d平民/奴隸/士兵講：「打開城門吧！你們的敵人唔係我，而係你地後面的奴隸主。我會解放你地。跟隨我，你地會有自由，有選擇，會過有尊嚴的好日子，以後唔使被人奴役。You will be free!!!!!!」 個個都想有自由，結果大家都聽佢講，迎接龍老母做新的Leader，從而坐擁千兵萬馬。
龍老母有超超超長的一個Title：佢就係「坦格利安家族的風暴降生者丹妮莉絲、鐵王座的合法繼承人、安達爾人和先民的合法女王、七國守護者、草海上的卡麗熙、不焚者、奴隸解放者、龍之母」(Daenerys Stormborn of the House Targaryen, First of Her Name, the Unburnt, Queen of the Andals and the First Men, Khaleesi of the Great Grass Sea, Breaker of Chains, and Mother of Dragons)。 呢方面，又好似三國演義的劉備，周圍同人講自己係漢朝邊個皇帝的後裔，叫自己做劉皇叔 (btw rip 劉皇發)，從而令大量平民「看傻了眼」而覺得條友真係「唔野少」，簡直係Name dropping的極致。
據聞最近上市的毛記電視，亦係憑「理念」去驅使員工為其賣命，哪怕人工其實普普通通。
SJ點評：理念真係好屈機。你想創業，你的公司又有咩Mission Statement先？
3. 但有理念 都要開飯：Compromise
空有理念，唔足夠成功建立帝國。始終都要有行之有效的良好管治系統 (Good Governance)，大家有飯開，有冤可訴，咁先可以長治久安。
正如龍老母Dany統治的自由城邦，雖然話解放奴隸好偉大，但後來好多前奴隸走來訴冤，話自從廢除奴隸制，自己失業，好似廢人一樣，懇求恢復奴隸。Dany在平衡廢除奴隸制的Initiative，以及一大班既得利益者 (奴隸主，以及未能轉型的前奴隸）的輕重後，最終都係達成一個節衷方案，達到所有「Stakeholders」的利益的「最大公約數」。
SJ點評：簡單來講就係有辦法令大家都Gur：除了武力(或上司的身份)，更需要手腕與智慧。
4. 贏開有條路 贏到開巷
一個人的「勢」真係唔到你唔信，贏開有條路，輸就兵敗如山倒。
就如龍老母一直被軟禁，但後來成功突破封鎖，成功以理念驅動左第一班人之後，更加勢如破竹，氣勢如虹，更多城邦勢力自願跟隨這位「奴隸解放者」。
人生一樣：勝利的「氣場」吸引更多的勝利。正如著名的「馬太效應」理論，引述聖經新約《馬太福音》的寓言：「凡有的，還要加給他，叫他有餘；凡沒有的，連他所有的也要奪去。」
強者越強，弱者越弱。成功者容易進入良性循環的康莊大道，而失敗者則墮入自我放棄的惡性循環。呢個亦可可比經濟學的Multiplier effect：增加少量的金錢供應到社會，結果可帶來大量的經濟收益。
SJ點評：成功，真的會吸引更大的成功。
5. 唔好睇少矮仔
好多睇起來好打得的人，其實不外如是，一個好例子就係 代表矮仔Tyrion打Trial by Combat的Martell王子：打晒跟斗，舞刀弄劍，稍為佔上風已經急不急待慶祝咁濟，最終其花拳繡腿難逃被對方一拳打死的厄運。
另一邊廂，其貌不揚的人，亦唔代表一定無料，甚至不乏非池中物。侏儒Tyrion就係好例子，任何人一見個侏儒已經睇唔起，因為體格滑稽成個小丑咁款，但偏偏卻係成套Game of Thrones最人性化而且最有謀略之人，而且仲好搞笑。就算係大陸，馬雲呢個人其貌不揚，by any measure都唔似老闆，著起龍袍唔似太子。邊個會估到會此人將會建立一個電子商務帝國？
SJ點評：Don’t judge a book by its cover。
6. 唔好咁易信人
狼家( Stark )貴族女兒 Sansa 被嫁到變態的House Bolton，就係信錯巧言令色的Petyr，幾乎命都無，假如走唔甩，甚至會被折磨至死。
狼家私生子 Jon Snow 注定同龍老母Dany齊名Game of Thrones男女主角，兩位型男索女，同樣經歷艱苦童年，以及信錯人被出賣。Dany就信錯人而被禁錮，而Jon Snow甚至被Night Watchers的「兄弟」造反刺死 (雖然後來死後復活)。
SJ點評：活在亂世，每個人都有自己的Agenda，唔好咁易信人。
7. 權力遊戲 確實幾好玩
人生要成功定要自由？ 呢個係千古人生難題。
對於「權力遊戲」的參與者，為功名利祿，在有限的人生鬥個你死我活依然在所不惜，甚至樂此不疲。
好多人的確嚮往自由的無拘無束，但同時都好多人有野心要「大幹一票」。無他的，除左榮華富貴外，更大的原因可能係在這Game of Thrones勝利時的成功感，以及手握權力君臨天下的亢奮快感，的確好似毒品一樣令人飄飄然。
正如Tyrion 一度在首都King’s Landing擔任首相，左右大局而意氣風發。Tyrion也感慨地承認自己其實頗為享受玩呢個「權力遊戲」：成功在明爭暗鬥的家族與勢力之間周旋而扶搖直上，繼而統治城邦與帝國，一人之下萬人之上。而且自己確實玩得唔錯，仲想一直玩落去。
SJ點評：任何事業，任何興趣都一樣。人總係中意自己做得好或擅長的事情，所謂「找到自己價值」，其實就係咁。
8. 但失敗滋味 唔係個個承受到
人無千日好，花無百日紅。人生除左自己的實力以外，仲有好多自己控制唔到的因素。
一命二運三風水，即使今日成功的大紅大紫，有邊個又咁保證下年都咁風光？ 定係其實表面風光的背後，埋藏多少隱憂，外人又可會知曉？
正如上面講到矮仔Tyrion君臨天下，意氣風發，殊不知之後旋即遇上殺身之禍，被屈刺殺極度黑人憎的廢柴皇帝Joffrey，然後亦被已經內定好的審判判處罪城以及死罪。等候處決期間，Tyrion在牢獄憶起幾多往事。高峰的快感，剎那失陷。 人生究竟有幾多事真係可以掌握到？或者當你以為自己做得勤力果時，其實命運之神可能已經注定你的結果。好多野，幾努力都係徒勞無功。唔知為乜。 其實好L sad。
就算係香港，都有一個好相似例子— 曾蔭權：在風光的鎂光燈擁簇下，坐私人飛機與遊艇，香港仔種下禍根，終於鋃鐺入獄。曾蔭權入獄之際，據說甚至老淚縱橫。失勢的滋味有幾苦，恐怕經歷過的人才知曉。
就算係普通香港人，唔少人都經歷過1997樓市亢奮，人人都幾層樓炒同收租，之後突然樓市崩潰變成負資產的慘況：仔女都會親身經歷突然間大人唔再開心，而且大屋搬細屋，甚至日日家嘈屋閉的苦況。
呢個遊戲，無論賺錢定係做官，一旦參與，一樣在高回報的High life 背後有著極高的 inherent risks。
SJ點評：擁不擁有也會記住誰 快不快樂有天總過去
9. 夠堅持 的確可能東山再起
Tyrion在牢獄中等待處決，萬念俱灰，點知竟然有人冒生命危險營救佢出來，最終成功逃脫。 呢D咪真正的兄弟。
Tyrion被安排躲在一個狹小的載貨木箱，由貨船運到Westeros大陸的對岸，以為自由之際，卻被當地人抓著，輾轉當奴隸賣走，而卻又憑著其小聰明以及三寸不爛之舌成功甩身。最終甚至輾轉投靠龍老母Dany的勢力，成為Dany統治城邦的左右手，在彼邦再次玩著權力遊戲，左右大局。
SJ點評：要翻身，一定要Resilient，好似個不倒翁每次跌倒又彈返起身，就遲早可以東山再起，雖然這一定是知易行難。
10. 你以為你識好多野 其實你一無所知
相信大家都眾望所歸，呢套所謂無主角的史詩式劇集，其實實際上主角就係Dany，Jon Snow，然後第一配角就係Tyrion。
Tyrion就亦正亦邪，而且鬼馬精靈，舌戰詭辯的本領可謂無出其右。
而 Dany同Jon Snow其實就典型主角的Setting：型男美女，正氣凜然。Game of Thrones的原著《冰與火之歌》(A Song of Ice and Fire） 其中的冰，正正就係長期身處冰天雪地的北境之王 Jon Snow，而且其名字亦可見一斑；火則正正係「不焚者」噴火飛龍的老母而且在熱帶地方建立勢力的 「卡麗熙」Dany。
Jon Snow曾經有過刻骨銘心的一段情：當年尚為散仔，身為守邊境的Night Watcher，職責就係打7城牆以北的野人部落。然而， Jon Snow在一次城牆以北冰天雪地的危險地帶中的行動，捕獲一個女野人 Ygritte ，本來可以一刀殺死她，但有憐憫之心的Jon Snow卻不忍心，饒她一命。卻反讓 Ygritte逃掉，通報野人部落，終將Jon Snow俘虜。 野人部落按照習俗，本來要將Jon Snow殺死並烹調吃掉，呢次卻輪到 Ygritte 要求部落暫援處決，表示將Jon Snow留為人質作為談判籌碼對部落更有用，其實心底裡是想放過一命。後來Jon Snow在軟禁下在野人部落生活了一段時間，終於與 Ygritte 暗生情愫。Ygritte的口頭禪正正係狠狠地鬧 「You know nothing, Jon Snow! 」。
You Know Nothing, Jon Snow.
後來 Jon Snow逃脫野人部落，Ygritte 點阻都阻唔到 ，覺得被背叛而且要捍衛部落利益，於是邊強忍淚水，邊向著騎馬逃走的 Jon Snow射箭，Jon Snow中箭負傷逃回城牆以南 Night Watchers的勢力範圍，即Castle Black。
Jon Snow在Castle Black站穩陣腳，擔任捍衛城牆的Night Watchers。後來野人部落大軍集結，展開攻打Castle Black的攻城戰( Siege) 。在漫長而慘烈的一夜，兩軍死傷慘重，野人終於突破城牆缺口，衝入城內作戰，其中還有 Ygritte 的身影。Ygritte 係一流的弓箭手，在城內射殺唔少Night Watchers。終於，Jon Snow與 Ygritte 在一個角落對峙，Ygritte 以弓箭瞄準 Jon Snow，Jon Snow卻被突如其來的 Ygritte 恍住，在烽火連天之際，怔怔地看著眼前的 Ygritte。Ygritte 的弓箭毫不鬆懈，繼續瞄準Jon Snow，但正當兩人沉默對望之際，一個 Night Watcher兄弟從Ygritte 的背後放出一根冷箭，命中Ygritte 要害。
Jon Snow抱住倒下的Ygritte，重傷的Ygritte對Jon Snow聊起一些往事，最後一句說話正正係其口頭禪：You know nothing, Jon Snow….
成套Game of Thrones目前最感動位，大概就係Jon Snow與Ygritte，背負著時代仇恨原罪的一段真愛，尤其係最後呢一幕。
而最令觀眾記住的一句話，亦都係呢句 You know nothing, Jon Snow
感動之餘，亦都令我地認真思考，人生在世，究竟我地又知幾多野呢？
正如呢對熒幕情侶，在短短的時間，經常為各樣野鬥嘴。Jon Snow不忿Ygritte 話自己唔識野，而要強調自己其實識得好多野。
但其實可能到最終先發現，自己真係乜都唔知。
好似愛恩斯坦所講：當我學習越多，知識越廣，越知道自己其實一無所知。
SJ點評：或許，我地所有人都經常提醒自己呢一句： You know nothing, Jon Snow!
SJ結語
唔記得加返個Spoiler alert，但其實呢篇文都無點乜劇透，除非你仲睇緊Seasons 1/2。
確實，Game of Thrones真係近年世界級史詩式劇集。人生如戲。或者從 Game of Thrones 中，大家都學到更多人生道理。
今年，聽得最多人問的問題，大概係「 邊度有得睇 Game of Thrones？」
或者，更應該問的問題，係對於香港而言White Walkers / Night King係邊個，係「香港點解無 Game of Thrones？」
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
