30歲要做到Marketing Manager？

如果你30歲真係升到 或者 真係升唔到做manager，咁又會點？以下畀幾個角度你參考：

「經理，等如咩都要經你」

做得經理，當然有好多嘢都要經你手。Sales今季唔到數要搵人咩鑊、老細又要學人攪social media、HR投訴你條team啲同事成日遲到，總之公事、人事、下屬出事，通通都關經理事。逗得一份manager可觀嘅人工，當然要配上一堆可觀嘅工作量。

話晒manager都算係公司org. chart嘅上游，所以做得經理，inbox都總會收到senior management meeting嘅邀請。呢啲場合同以前開嘅會有啲唔同，會上大家都係「高層」，表面上輕輕鬆鬆，有講有笑，但其實維護自身利益先至緊要。高層政治鬥爭、高處不勝寒、高人一等嘅壓力亦係步步高陞嘅副產品。

加上而家四處都係有名無份嘅manager，即係有經理嘅title，但冇經理嘅實權。好多「經理級」嘅朋友，佢條team其實只得兩個人：就係佢同佢老細，亦即係經理已經係條team最低級嗰個。咁老細叫你manage好條team，即係叫你manage好自己，好考management skills！

「經理的心理」

當踏入29歲都仲係做緊AM嘅時候，好多人會有一種莫名嘅心急，覺得時間無多，有時為咗要達成「30升M」呢個任務而好想轉工，轉去一間畀到「名份」自己嘅公司。

但當有朝一日真係升到上M，除咗鬆一口氣之外，亦會突然自我感覺非常良好，覺得已經完成咗人生一大milestone，隨之而來就係安於現狀，諗住攬實個manager位就可以養老。

而近來除咗人民幣貶值之外，職銜嘅貶值亦非常普遍。可能大家都有感覺現今嘅經理已經冇舊時咁馨香。大概係因為近年好多公司濫用manager呢個title，同時亦發明咗好多新式而強勁嘅職位，攪到傳統而神聖「經理」變得普通。當一間公司最低嘅職位就係manager，經理嘅虛榮感亦相對比以往低。

已經成為經理嘅你可能已經體驗到manager人工同付出嘅心力好多時並不成正比，亦開始明白點解有人會話「加我人工得啦，千祈唔好升我職」嘅道理。

成日都話男仔30而立，我話做marketing都係一樣。30歲左右，儲咗差唔多7、8年經驗，應該可以話係做marketing嘅初部收成期。咁講並唔係話你唔駛再OT，而係你做事應該更加得心應手，更加有自信心。如果真係想強行喺30歲幫自己定一個milestone，可以係：
1. 別人對你工作嘅word of mouth；
2. 你付出同收成嘅ROI；
3. 你對工作嘅engagement，
and more…

因為以上嘅milestone應該比你卡片上印住「Marketing Manager」更加重要。