畢業幾年，轉眼間所有人都必須面對一個問題，就係邁向30歲的關口。大家經歷過畢業後的新鮮感，或者畢業幾年的迷茫，甚至係Quarterlife crisis，無論你是否已經順利過渡呢D階段，始終都要面對呢個30歲關口。
1. 嚴格來講 你已經唔再係「青年」
踏入30歲最明顯會經歷的一件事，就係你唔再被社會定義為青年。
唔計咩傑出青年分豬肉獎之類，好多青年特有的優惠或Privilege，在你身份證正式踏入30歲一刻突然結束，例如好多專業團體的 Young xxxxxx (職業) 身份，甚至係Working Holiday計劃 (31歲前結束)，基本上隨住你踏入30歲陸陸續續就唔再關你事。
在職場上，二十幾歲人犯錯，往往較容易得到前輩提攜與提醒，但三十歲後，基本上你自己食自己了。
2. 開始同真正的年輕人脫節
咩Snapchat同IG，你開左後發現完全陌生，更加唔會有朋友同你玩。你唯有繼續玩你的Good old Facebook / Whatsapp。 有睇「毛記」以為自己好潮？ 唔好意思，而家d 細路原來更多睇韓國甚至大陸版的跑男。
後生仔女聽韓國歌，睇咩Running Man,，你完全無概念，Spotify Playlist仲停留係容祖兒年代，勉強聽下Ed Sheeran都已經覺得係一大挑戰。據說人在25歲後，基本上唔再想聽新歌，30歲左右甚至以上，更加如古老石山一樣。
在某一日你個無關痛癢的小時刻，就係咁樣的小事，你發現自己真係唔再屬於「廿幾歲/20-29」呢個Demographic group。
3. …然而 99%人距離「成功」依然好L遠
如果話，後生的自由與激情，係幸福感的最大驅動力，「Post-後生」的人生，接軌的大概係成功與穩定。
二十幾歲時的沈旭暉，曾經在北京工作，月入2000人民幣，踩住單車，「離時代遠遠，沒人間煙火，毫無代價唱最幸福的歌」大概如此。
三十歲起，你開始有了一樣野，可以話係人生中最為重要，呢樣野叫做「責任」。
因為你開始有新的身份：丈夫，妻子，父親，母親，新抱，女婿等等。呢d新身份，全部都有你「應份」做的事，理應事業攀上頂峰(或起碼走進上升軌道)，結婚買樓安居樂業，關注點從「玩」變為各種成熟的話題，從置業到裝修，擺酒到投資，然後係生兒育女與教育。
雖然話做仔女一樣有好多責任，但Let’s face it，大部分人的父母倘如避風港，即使外面風大雨大，父母始終都會睇住你，幫你補位。
社會來講，向來有三十而立之說。30歲，起碼要買到樓掛？唔好意思，市區20年樓兩房，都最少600萬，你人工幾多？比得起200萬首期嗎，供得起每個月2萬嗎？
當然，更加進階的朋友，一樣有同樣問題。 當你做Auditor，30歲月入7萬， 但你起碼都想住太古城(而非600萬的殘舊「上車盤」)，尤其30歲已經在Child-bearing age，準備生BB的話， 最好都要3房，盛惠1500萬。
好似係，無論你幾努力，你都追唔到呢班越走越快的火車。
4. 唔止成功，距離「成熟」都仲係好遙遠
成功固然無得強求，只能盡力而為，而成熟卻往往係自己選擇，自己的態度問題，但我們絕大部分人而言，即使邁向30，都稱唔上成熟。
或者咁講，咩叫成熟？用一個非常狹義而狹隘的定義，就係可以為咗肩負起「責任」而付出甚至作出犧牲。
當然唔同人有唔同責任，但絕大部分人面對都係以上所講的家庭責任，所以起碼係「修身，齊家」，理論上係30歲左右要做好。
實際層面，點先算成熟？
月入15k，升職無望的冗員， 可會 1) 進修增值自己 2) 做Part time 賺錢 ，定係 3) 晚晚打食雞，放假就趕住一年飛3次日本 2次泰國？
星期五晚一大班人銅鑼灣食完飯，你住將軍澳，過咗尾班車，你係 1) 辛苦少少搭N車 + 轉車 + 行路 定 2) $250 搭一程的士？
到你開始搵到下錢，月入6-7萬，你會 1) 努力儲錢 2) 投資 定 3)買返部 BMW 325 / ROLEX Daytona 威下?
要「成熟」，講係好容易，但每日做大大小小決定，抵抗好多引誘，同埋好多旁人的雜音，話你知「梗係去威」甚至激將法「你係咪使唔起先」，其實唔容易。呢個，亦去到擇友的問題。
5. 依然係「最佳損友」煩惱，但最Sad係你已經開始麻木
從前好朋友，隨年月過去各行各路，早已見慣不怪。
但邁向30歲，你發現同事，同學，甚至客戶都有好多，但真正朋友：了解你，關心你的，原來少之又少。到某個位，你已經唔再Care，尤其係，相比起以上的各種現實的責任，呢個煩惱，雖然偶爾令人難過，卻其實早已變得不值一提。
「愈向著青春走遠，愈容易孤單，你可有發現？ 」
還記得，中學時期同Best Friend傾幾個鐘電話嗎？如今你假如想搵人傾計，仲有無人係你的 Go-to person，你深知隨時打過去佢都會同你傾？仲有無你依然背得出電話號碼的朋友？
假如依然有的話，請好好珍惜。
6. 事業樽頸位 vs 人生樽頸位
正如以上所講，大部分人在三十而立之齡，其實都未真正站穩陣腳。SJ都認識一些朋友，雖然係非常唔錯的大學畢業，甚至係海外留學歸來，但接近三十歲依然浮浮沉沉，每年轉工，隔年轉行，而依然在Fresh Grad的職級打滾。
即使係已經成功嶄露頭角的朋友，例如好多到30歲月入5-10萬的朋友，其實一樣面對長遠而言的樽頸位，再往上爬的阻力，比起幾年前從Fresh Grad到今日的阻力大得多，高處不勝寒，正如市場預期騰訊/FB業績一年又一年永無止境地向上如火箭般直線上升，始終越來越難。
除左事業以外，人生何尚唔會面對樽頸？尤其30歲呢種年齡。做一個真正有承擔的大人，除左必須有事業根基，更要有魄力去為身邊人打點一切，are you ready？
最簡單一句，面對眾多親戚以及外面的朋友，30歲的你，已經有你父母輩的手腕去交際甚至博弈嗎？當然，呢個科網年代，可能呢D嘢根本唔重要，呢個係後話了。
7. 錢…依然唔夠
30歲左右，當你為自己戶口提升至咩Premier之類而內心暗喜時，才發現好快好快你又要將大部分Hard earned money使出去了，30歲後開支一闊三大，每個月使幾萬，對好多人而言，可能係無選擇下的選擇。
8. 時間…依然唔夠，而且強烈感覺 Time is running out
要OT的工種固然疲於奔命，但尤其在30歲起，你發現自己的Time commitment越來越多，家庭事業朋友進修，全部都係需要你本人的時間，讀一個Master就隨時係兩年時間，兩年後係咩光景？其實無咩人可以肯定。
然而，越想在人生各領域奮鬥及做得更好，越發現時間唔夠用。
兒童的一天好快過去，一年卻很漫長。
但大人的一日好漫長，一年卻轉眼過去。
大概感覺如此吧。然後到每年年底，無論係電視台的新聞回顧，定係FB上的朋友回顧，你再自己思考返，究竟呢一年自己過的怎麼樣？有否達成到當初的新年願望？成日話學好日文，結果年復一年都無Pick up返，依然流於50音多少少的基本水平。 畢竟，99.9%的人，就係被 Procrastination 奪取了所有夢想。
做任何事要成功，第一步，肯定係有「緊急感」 (Sense of urgency)，要做乜都好，今日就係最好的日子，無其他選擇，Do it today，呢個係唯一你可以做到任何事的Mindset。
9. 稜角抹掉 理想冷卻了
Credit: SCMP
呢個或者無係人生無奈，或者係「成熟」？
Well，視乎你點睇，同埋你係咩人。
或者咁講，傲氣應該甩掉，但心底裡的傲骨與理想的一團火，唔好俾佢熄滅。
成熟 =/= 放棄理想，同樣地 堅持理想 =/= 一成不變。
呢個係一個「Balancing exercise」，但華人本質上好難做到呢種平衡遊戲，非黑即白的心態，通常走往極端：一係就全身投入權貴吃喝玩樂，一係就要訓街甚至反社會或者浪跡天涯。
人生，活得好，談何容易。
10. 再不努力 你就要老了！(更甚者，父母)
無論想追求甚麼，必須呢刻就努力，你已經唔係20幾，唔係仲俾你慢慢探索的階段了。
固然，好多人都未搵到自己條路，或者好多人都好迷茫，但真係要急起直追啦。
相信大部分人，都好想早日同父母分享人生各領域的成功喜悅，可以Properly講一句：「阿媽，我得左啦！」
只能說，1) 確保父母身體健康，多督促飲食均衡 + 飲水 + 運動及作息 2) 自己更加努力了。
SJ結語
邁向30歲，唔同人有唔同感覺，有人興奮不已，但大部分人估計都仲係有點困惑甚至無奈，可能係因為呢個社會經濟環境？每人答案都好可能唔同。但可以肯定係，感受同感概呢回事，與其逃避，不如抒發出來，然後正面面對。
尤其係最近一單令人頗難過的新聞，或者亦間接地再提醒大家：人總需要勇敢生存。
希望大家多關心自己感受，多鼓勵身邊人，be positive 🙂
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
