對唔同人來講，「香港」呢個地方有截然不同的意義：
香港係「獅子山下」的奮鬥，亦係「高山低谷」的無奈。
香港遍地黃金，亦係寸金尺土。有人在香港賺大錢，亦有人只能慨嘆香港無立足之處。
無論你係咩睇法，相信你都一定同意：今日的香港90後，打份工想買樓成家立室，比起80/90年代的年輕人難得多，至少，客觀數據都確定左呢個事實。
矯情的說話，已經講過無數次。今日SJ財經部只想同大家深度分析，甚至寫以下呢個Practical Guide，本地香港後生仔女，如何可以成為「有錢人」，尤其在這個Diffciult Mode下。
注意：此文觀點離地而且以偏概全，只想感慨的讀者可以按此閱讀另一篇文。
首先，要重新了解何謂「財富」
無論《窮爸爸富爸爸》，定係一眾「財務自由」KOL，都會教你財富的定義，簡單來講就係你擁有的「好資產」。
而好資產有內在價值，會為你產生「現金流」，同埋會「升值」的東西，例如生意，優質公司的股票，物業，以及債券等等。
現金其實並非「好資產」，因為在低息時代，唔會「生錢」之餘，每年仲因為通脹貶值3%左右，如果對比埋樓價升幅貶值得更多。
而其他野，好似汽車同大部分消費品，買回去每年都Depreciate，十年八年後價值歸零。
另外，好多人都問一個問題，黃金係咪好的投資？
股神巴菲特對此，就有一個完美答案，大概意思係：「假如將全世界已開採的黃金，溶掉後再做成一塊巨型金塊，大概可以造一塊20米 x 20米的正方體黃金，呢舊巨型黃金看起來金碧輝煌，而根據現市值係值 10兆美金。
但呢舊大黃金，唔會為你做任何野，唔會生產股息或者利息，it’s just standing there looking pretty! 但係，假如你有10兆，你只需用4000億美金，就可以買晒全美國的農地，每年可以賺取棉花玉米之類的農產品收成，然後仲可以買7間Exxon-Mobils石油公司，然後仲有1兆美金剩低。相比一舊大黃金，我寧願買晒全美國農地，同埋7間Exxon-Mobils。」 (Souce: https://www.youtube.com/watch?v=3ncS59taPkg)
入正題：如何從今日開始變「有錢人」
假設你月入15k左右，23-25歲，父母有工作，同父母同住。
1. 賺取第一桶金：第一個100萬資產 – 節流篇
100萬今時今日話多唔多，但依然係一個具象徵性的里程碑。連港幣100萬都無，難免人窮志短，終日鬱鬱不得志。
與其話第一桶金，不如話第一個心理關口。
好多人話「開源，節流」，其實兩者同樣重要，甚至可以話，節流更加優先。
節流並非一位死慳爛慳，而非首先要有一個「Low burn rate」的習慣與心態。
何謂Burn rate，其實就係源於矽谷的Startup，融資後的「燒錢率」，簡單來講燒錢燒得幾快。
其實個人的財務都一樣，一定要有Low burn rate，在身心健康前提下，盡量節儉。
咁係代表乜？
慳，但唔好下下食麥當勞。慳，但唔好連同朋友食飯見面聚舊都為了慳錢而推卻。慳，但都要對家人朋友好，而好多時「好」唔一定同錢掛鉤。
咁慳乜？自己飲$40一杯Starbucks，糖分好高，為乜？ 去某大Gym Franchise每個月$2000另加幾百請PT，其實可否落公園跑步同打波代替？一年去一次旅行，今時今日都可謂人權，但係咪一定要住五星級酒店，一定要Shopping爆買？
平心而論，唔同人有唔同偏好，但盡量減低無謂消費吧。 買車，更加係一個絕對No-no。
記住你15k收入，如何過得合理地快樂，而有可以剩下一筆錢的消費習慣。
到你月入100k時，盡量盡量要「不忘初心」，消費可以稍為提高，但切勿幾何式升高。
2. 賺取第一桶金：第一個100萬資產 – 開源篇
咁節流之後，又點開源？的確，月入15k，以呢個年頭來講，點儲都唔會變有錢人。
但正如以上所講，養成Low Burn Rate習慣同心態，尤其重要，陣間會再詳談。
呢度首先講開源。
在戶口得幾萬或者十幾萬時候，其實無乜投資價值可言，而且更大風險係令你Distracted。
呢個階段，可以唔使考慮Passive Income，因為本金太細。 反而，更重要係提高自己的Active Income，即係用你勞力同腦力來換取現金。
所謂「唔辛苦唔得世間財」，就係呢個階段。 如果份工15k但瘋狂OT，但有前景可以幾年內升到30-50k甚至更高，例如Big 4同好多大公司甚至政府，咁其實都OK既，努力做住先，爭取工作經驗同升遷機會。
假如15k，但工作壓力唔大而且有空餘時間，不妨考慮做多份工，有多一份收入之餘仲可以接觸到更多行業，為將來創業或投資打下更穩固根基。又或者有一技之長，在IG賣野之類的小生意亦係一個可行方法。
如果又OT又無晉升前景，學夠野後就可能考慮轉工啦。 如果又無野學，咁可能立即辭職了吧。
重點係要Maximise自己收入，盡量提升到4-5萬甚至更高水平，無論係一個渠道，定係經幾個渠道。
3. 幾年內儲夠100萬：人生財富新開始
假如你成功開源節流，好可能幾年時間已經儲到第一個100萬，而你可能依然30歲唔到。
呢個時候，有兩樣野會發生。 第一，銀行會叫你Upgrade上 Premier / Priority 之類的優越理財，以後入銀行入票之類可以有地方坐低，飲杯咖啡。
第二，你需要考慮結婚買樓。
首先講Premier Banking。SJ強烈建議接受銀行Offer去Upgrade，因為銀行熱線從此會有真人Service，有咩戶口問題唔使聽錄音，而且，銀行買賣股票佣金可能有所降低，而家下加息週期，銀行對你都有優惠利率，甚至仲可以幫你在英國美國等地另外開個Premier戶口，而跟返香港的同一個Account，其中好處，稍後再講。
所以其實Upgrade係有真實好處而且唔使錢，當然值得Upgrade。除此以外，都係一個心理關口，開始「有個錢旁身」，算係一種Low Burn Rate下的自我肯定，其實個心定好多。
至於結婚買樓，呢個好Tricky。假如你有個同你一樣Low Burn Rate的伴侶，咁當然係最理想。一味Low Burn Rate，辦一個寒酸婚禮，其實可能對財政造成更大傷害，尤其假如你身處講究Face屎的行業，好似金融，專業人士等等。
如何辦一個體面而可承擔的婚禮，其實大有學問。簡單而言，都係盡量親力親為，唔請Wedding Planner，凡事貨比三家，找出以「體面」為依歸，性價比最高的一個Solution。其實同做生意或者投資都係如出一徹。甚至可以話係一個很好的訓練。
買樓就要好小心了。在2018年樓價瘋狂的年代，係咪一定要入市？ 假如父母有地方住，住住先都係一個方法。假如因種種原因唔可行的話，一定要找地方住，咁有兩種作法。
第一個做法，就係租樓。呢個擺明係「看淡」的做法，但真係無人睇得清未來。 如非必要，其實都唔太建議咁做，除非你好有信心樓市會中短期內大跌，或者你好需要一大筆資金準備創業，否則可能永無止境乾等。
第二個做法，就係買樓，但係要買優質平樓，(暫時)犧牲居住要求。 何謂優質平樓，即係被市場低估的樓，可能係地區，可能係樓齡，可能係殘舊，但將來可能會升值而且跑贏大市，例如通地鐵，甚至2重建。買平樓自住，呢個財務山係最理想的，亦係充滿活力的後生仔女可以容忍的。第一個自住物業，切忌買靚豪宅而鎖死自己資金，甚至令自己債台高築，尤其Markup極高的新盤，更要小心。
假如父母願意而且有能力免息貸款比你，咁當然可以適量地降低按揭比例，利息都還少D。假如有慈父慈母送樓或首期，咁當然更加完美，但呢個唔在本文討論範圍了。底線係，切忌為呢種事傷和氣，記住父母完全無欠你任何野的。
4. 打工：爆數 / 做Top Performer
唔重覆，睇呢篇文： 打工仔如何由15k爬升至月入十萬
重點係，目標係要做到「獨當一面」。
5. 再次考慮「行業大勢」
多得互聯網同AI，全世界有唔少夕陽行業。
但慶幸係，亦有唔少新興的「朝陽行業」。
據說，廣告Ad Agency近年就面臨頗大流失客戶的壓力，皆因客戶都可以輕易自己上網落Ad了，而傳統Agnecy做的平面廣告同電視廣告都被網絡的Native Ad同KOL微電影之類搶去唔少市場份額，而且呢個係個結構性轉變。行業好多人轉投大型科技公司，一旦成功轉型，則前途一片光明。
所謂「站在風口，連豬都可以飛起來」，你又是否站在風口？
但呢個都只可以好概括咁講，因為其實係幾複雜。所謂「風口」，其實都不停地轉變，而且你假如一直追逐在改變的風口，其實一樣會坐這山看那山，一事無成。
好似鄭秀文一首歌 「落錯車，如離開了幸福的高速路」，所以呢類決定真係要非常小心。
6. 開始學投資 認真投資
當你的可投資資產達到一定水平後，例如一百萬現金以上，其實「投資」呢樣野開始與你有關，而你的Premier RM亦會三五七時約你傾下幫你理財，簡單而言就係說服你幫佢買基金。
RM sell得的基金，大部分都係伏。
而銀行唔會Sell你的，就係開股票戶口買港股美股，因為銀行無得賺高昂的基金管理費，只賺到低微的佣金。
投資一點點股票，開始嘗試了解長線投資，了解騰訊/長實/Google/Apple等股票，其實(幾)十年過去，原來股值都以倍數增長，股東從中可以賺錢，就係「資本增值」了，同一筆現金，可以增值幾倍以上，因為你的股票伴隨呢D優質公司一齊增長。
尤其係好多香港人自己都熟悉的公司或者品牌，好似中意飲可口可樂的，無理由唔研究下呢隻股神巴菲特愛股 NYSE: Ko，中意買Under Armour運動服裝的，亦可以考慮睇下隻NYSE: UAA，起碼，你知道呢D公司產品係乜，消費者係邊個 (你自己)，點都容易了解過無數XX礦業之類，除非你本身有特別Insights則作別論。
Also on SJ: 同阿婆爭閱文？ 其實美股先係「倍升股」聖地
眼光加一點點運氣，個本有返幾十萬到過百萬，十年八年賺返幾百都上千萬都唔係天方夜譚，未必會發達，但起碼賺返好幾年的人工收入。
但當然，股票同所有投資一樣有風險，最緊要成熟地考慮唔同結果同風險。
同一道理，留意其他優質資產，盡量節省消費，而省下更多錢做優質投資。 唔會一夜暴富，但假以時日你會比其他人擁有更豐裕資產，延遲享樂，對自己同身邊人負責人，到身家較豐厚時，先增加消費都唔遲。
相反，今朝有酒今朝醉的朋友，多年過去，好可能只係一場空。
SJ結語
大家香港人，希望可以齊齊係呢個高度競爭的世代，依然可以在香港立足，甚至過上更好生活，而唔係好似坐以待斃而理所當然的階級往下流。
而要做到呢樣野，確實需要艱苦奮鬥。共勉之。
StealJobs全面透露各行各業人工，工時，晉升前景，以及入行攻略，歡迎匿名提供收入資料。
而家仲可以上埋SJ House ==> SJ House，一個網睇晒各區的住宅Rating，快D上來Rate下自己住緊個屋苑啦！
Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴，請按此聯絡本網，本網會盡快為您處理問題。以上內容僅為投稿者之個人意見，不代表本網立場，並非來自官方渠道，亦可能不準確，而評論亦僅限於投稿者對工作環境的意見及反饋，與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站，違者必究。
立即加入StealJobs@FB 更多90後上位攻略
