殘酷的真相:10大原因 為什麼律師不接聽你的電話

今時今日「請律師」呢回事,唔少人都有經驗,無論買樓,打官司,定係其他形式的法律諮詢等。唔少人對請律師的最大抱怨,除了係律師費貴,主要就係「律師唔聽我電話」。

好多咩「法政隨筆」之類的專欄會話你知,律師有咩專業守則,尊貴的律師大人Ideally如何處理與每位有禮貌有學識的Client的通信之類的Legalese:又話要寫信又盛。

但實際上,無論係大行如孖士打(而家改左名叫Mayer Brown) 或者係陳李張黃何的街坊High Street Firm,無論你係$5000出封信定 $100萬 Retainer打場官司,你的律師不接聽你的電話,主要係以下原因,部分甚至係殘酷真相:



10. 你的律師忙緊 尤其係忙緊一些更重要的大Case大Deal

無論你係好似以上所講$5000出封信定 $100萬 Retainer打場大官司,你的律師基本上唔會只有你一位Client。要交燈油火蠟同維持合理水平的收入,一位律師好可能係任何同一時間處理緊10-50單Case屎,所以亦係要應付10-50個Clients。

更甚者,律師無野賣,只有自己的時間,好多野要親力親為:從開會到上庭,Drafting到Research,每一樣都需要大量時間專心處理。所有做得律師係肯定忙,肯定大壓力。 你任何時間Call你的律師,好可能佢都其實處理緊某一樣非常Urgent的事情,在趕某個法庭或合約方的Deadline。假如你$5000出封信追15萬之類,之後對方無回覆呢回事 (而你又決定左唔會請律師入稟吿對方),令你好唔開心而你想打電話俾你律師呻下對方點衰點衰?基本上,你的律師無咁得閒聽你抱怨。



9. 無新Update

除了一些如緊急禁制令之類的案件,絕大部分案件並非每日都有新的Update。例如民事訴訟往往係頗為冗長,你入了份Pleading後對方都有28日覆你,好多時又拿Extension就更長時間。 之後排期上庭亦係頗長的等待時間。好多時無野發生就無野發生。有野的話,你的律師自然就會Call你,就係咁簡單。當然,如果隔左好耐,Call下問一問都無妨。但唔好Call得太密囉。



8. 你太多野講

每個人都有自己的問題同壓力。你會覺得你的Case係你人生最重要問題,呢個無問題。但如果你單純想同人傾下,Chances are你的律師並非最佳聊天對象,除非佢主動表示願意同你傾。

無論Civil定離婚官司呢D重災區,好多Clients往往講講講對方點衰點衰,自己就好人過鄧肇堅,好唔公平啊,自己信錯人,自己覺得好委屈啊之類的抱怨說話,越講越激動,在律師面前不停鬧對方衰,更甚者就係在律師面前喊苦喊忽。一哭二鬧就係咁。

正如以上所講,你的律師好忙,但同時對你有一定的專業責任。有些事情是 Legally Relevant的,律師問你乜你就答乜,你覺得有關係的資料才補充。抱怨說話之類完全係浪費律師時間。正如你睇醫生 (Clin Psy與精神科除外),都唔會同醫生重重複複講你有幾唔開心幾委屈。

呢一點無野針對你,只係律師都需要get his/her job done,而佢的工作並不包括亦沒有時間及Expertise為你做心理輔導。

如果你下次打電話俾你律師「請教下」一些Retainer以內甚至以外的問題,你的律師同你講「可以快傾10分鐘,之後要開會」,你應該醒水啦,面斥不雅。



7. 你的律師放緊假

律師係一份事業以外,亦都係一份工。你的律師都會放假,例如星期六日,或者平日夜晚6點後,你的律師唔聽你電話好正常。有時候,你的律師 (同你一樣), 都需要食飯,都需要訓覺,有時都會做下Yoga踢下足球,呢D時候聽唔到電話好正常。 同理地,正如你一年可以去3次日本旅行,你的律師都可能會咁做。呢D時候,你的律師未必方便聽你電話。

咁講真,除非有咩緊急事情,好似係你俾警察拉左 / 銀行戶口被凍結 / 收到份法庭傳票之類的問題,無謂在明知律師放假的幾日或者Office hour以外時間打擾佢啦。



6. 你的律師正在經歷一些個人問題/事件

正如你一樣,律師都係人,都可能經歷一些個人問題/事件,而影響到佢的工作效率。例如你的律師可能俾女朋友飛左,咁佢可能有幾日唔太Responsive (或者反而可能超級Responsive),如果知道係咩事咪理解下囉。當然,假如長期都有影響,固然要考慮下點樣解決問題啦。

5. 你的律師達不到預期中的結果

呢個係一個真實的可能性。例如你需要設立一個複雜的信託 (Trust),你平時用開的律師可能唔熟呢方面,但又Commit 左幫你睇下點處理。假如佢睇完一輪,搵埋D行家問完又問,都未摸索到一個可行的法律方案,可能真係會唔覆你住,直到終於Figure out到答案為止。Honesty is the best policy。逃避往往唔係最佳方案,需要時都係Refer out,好過乜都攬來做, 咁當然,呢個絕對係Easier said than done。



4. 你唔交律師費 / 你係一個「Non-client」

呢個大概係最實際原因。好多人話律師見錢開眼,事實係各行各業都一樣。你試下行去診所,未俾錢你睇下醫生會唔會見你?你唔比錢,Auditors會否親自話你知你間公司有咩可以扣稅?

正如以上所講,律師唯一可賣的就係自己的時間。律師有限的時間,優先一定係處理Paying clients的案件與問題。 因此,在律師眼中,其實只有 Client 與 Non-client之分。 對於 Non-client,包括拒絕繼續支付律師費的Ex-clients,律師無咁多時間同你傾計。

當然啦,除非你真係親戚朋友,咁傾下閒計係OK。有法律問題,很General咁討論下都OK,但如果有個人實質的法律問題,最好都係約個時間正式諮詢啦。正如你有朋友開餐廳,都唔會每星期去食免費午餐,對嗎?



3. 你的理解力 / IQ好似有點問題

開始到戲肉。即使你係一個Paying client,一些事情由律師親自向你用簡單語言解釋過,你都唔明,或者你失憶一樣,聽日又打來問同一堆問題,後日又打來問同一堆問題。日日都問律師「點解XXX」 「呢封信講咩」,咁你的律師唔覆你 (住),都係基於對熱愛人生的人道理由。

有時候,有些人打俾律師,係打通左之後先捻自己要問乜:「喂律師。吖我頭先想問乜呢,你等等,我睇睇份文件先……(之後等3分鐘) 律師唔好意思,我而家有個電話入,轉頭Call 你。」 呢種Clients,咁無記性,大概都要準備定一份Enduring Power of Attorney了。



2. 你打死都唔聽人講

楊千嬅有首歌歌詞「是你麼 若有人愛我是你麼 」

係你啊,打死都唔聽人講個種Clients,重災區尤其係一些自以為是的中港生意廠佬,以為自己叻過晒全世界,殊不知自己踩中500年一遇的大陸開放時代機遇 + QE印銀紙樓價Gogogo bonanza。60歲拿住4-5層樓,市值幾千萬,就覺得自己係人中之龍,係獅子山下奮鬥故事的主角。

No offence to呢個年紀的人,但好多呢個Demographic的中老年人,係極度極度Stubborn,打死都唔聽人講。 有咩法律問題,雖然可能肯俾錢律師處理,但律師同你講解完 「根據終審庭LKW v DD , 長期婚姻離婚要分身家」,但你依然日日都Call律師個直線電話,堅稱「一蚊度唔分俾個衰婆」,原因係「律師你錯wor。 點解尋晚同個朋友傾計,佢同我分析左,話婚前資產一蚊都唔使分!?」 而對方並非律師,而係一名廠佬。

咁仲有乜好講呢?年輕人成日講的 「廢中/廢老」,如果存在的話,可能就係呢種。



1. 你好黑人憎 令人由衷地心生厭惡感

呢個大概係最大原因,而且集上述原因之大成:

a. 你明知你律師好忙

b. 你明知律師無野Update你

c. 你Weekend 與假期都Call律師問埋D無關痛癢的問題

d. 你每日急Call律師直線,Call到律師聽電話為止,問埋D重重複複而且無聊問題,講埋D怨天尤人訴苦說話,律師講到明5分鐘後要開會,你仲「請教多你一個問題 」(而且之後仲會引伸多50個問題,大部分都係Legally irrelevant)

e. 你明知經你日日咁Call,日日向自己律師審犯咁審60分鐘,律師從Common Law的歷史講到終審庭案例,再講到民事程序高等法院規則與Whitebook,再逼你的律師要重複講返你單Case冗長 (而無聊) 的Facts如何用以上法律原則套用落去,每日將LLB + PCLL + 執業經驗同你重溫一次之後,律師費一早用完,而律師樓出張單叫你俾錢,如果唔係就無得玩落去,你依然急Call你律師,抱怨點解 「大家當朋友咁傾下計,你都要收我錢,咁不近人情」

f. 重重複複都算,你的律師講解左相關法律原則,點解你只能得到 XXX結果,或者視乎法庭如何看待 AAA證據或者證人 BBB表現如何,你依然問返律師點解唔可以得到YYY結果,然後要律師重新講多一次。

g. 在律師多次同你講 「啊陳生,正如我之前同你講,法庭考慮因素呢,就包括….. 你單Case強項就係你有證人BBB….. 但弱項係雖然你話咁重要的合作,但係無文件證據支撐….. 下刪20分鐘Monologue 」

你依然問 「啊律師,即係你話,我有證人BBB, 咁就一定贏,係咪咁意思?」

律師內心「 X$Q^Y! 」而長嘆一口氣後:「唔係,正如我剛剛所講,亦都講過好多次,法庭考慮因素呢,就包括….. 你單Case強項就係你有證人BBB….. 但弱項係雖然你話咁重要的合作,但係無文件證據支撐….. 」

能夠達到如此結果,好大機會係,你既無禮,又要求多,又唔找律師費,又唔聽律師意見,又唔明律師講乜,又浪費律師時間,又咋傻扮懵,又拒絕接受現實。如此黑人憎之人,實屬難得。

你應該問的問題,唔係點解律師唔聽你電話,而係點解仲有律師肯接你單Case? 假如你的律師仲未正式炒你的話,其實你已經應該感恩了。

TVB 劇集《愛回家之開心速遞》截圖


SJ結語

當然啦,其實絕大部分Clients,又有禮貌又乖,又恭敬,只會在辦公時間打個電話俾你,而且往往驚浪費你寶貴時間,而預先Send個Email請問能否「明天下午或待你有空時,希望通一趟電話」,然後電話才5分鐘已經通話完畢,因為Client只會問返同單Case有關的問題,而且已經準備好問乜才打過來問。

Be a good client!



關注高質內容,讀神科又想入行頂級MNC / Banking / Law Firm? 即時填妥以下表格,SJ將不定時推送獨家行業活動 (絕不SPAM)

* indicates required




StealJobs全面透露各行各業人工,工時,晉升前景,以及入行攻略,歡迎匿名提供收入資料

而家仲可以上埋SJ House ==> SJ House,一個網睇晒各區的住宅Rating,快D上來Rate下自己住緊個屋苑啦!

Employers who object to or otherwise wish to complain about the above content please contact us via email or press here. The above is mere opinion of the submitter(s) (not this website) only on the working environment of the said company, not from an official source, might be inaccurate, and in no way indicates the quality of any products or services or the level of competence or integrity of the above mentioned company and its staff. Unauthorised reposting of the contents herein is strictly prohibited.
如對本網任何內容有任何意見或投訴,請按此聯絡本網,本網會盡快為您處理問題。以上內容僅為投稿者之個人意見,不代表本網立場,並非來自官方渠道,亦可能不準確,而評論亦僅限於投稿者對工作環境的意見及反饋,與上述公司的員工或產品或服務質素或工作能力及品格誠信完全無關。未經授權切勿轉載以上內容至第三方網站,違者必究。 


立即加入StealJobs@FB 更多90後上位攻略

Tags: , , ,

Comments are closed.